༄༅།། མཚོ་ལྷོ་ཁུལ་མི་རིགས་མཐོ་འབྲིང་དང་པོས་བོད་ཡིག་ཡིག་གཟུགས་འགྲན་བསྡུར་གྱི་བྱ་འགུལ་སྤེལ་བ།
དེ་ཡང་ཇི་སྐད་དུ། རྩོམ་པ་ལེགས་ཀྱང་སུག་བྲིས་མི་འབྱོར་ན། ། དཔའ་རྩལ་ཆེ་བའི་དཔའ་བོ་ལག་རྡུམ་འདྲ། ། ཞེས་གསུངས་པ་བཞིན་བོད་ཀྱི་རིག་གནས་ལ་སློབ་གཉེར་བྱེད་པའི་སློབ་མ་ཞིག་ལ་མཚོན་ན་ཡིག་གཟུགས་ནི་ངེས་པར་རྒྱུད་ལ་འཛོམས་དགོས་པའི་ཡོན་ཏན་སྣ་གཅིག་ཡིན་ལ། མེས་པའི་ཤུལ་བཞག་གི་རིག་གནས་ཏེ་ཡིག་གཟུགས་ཀྱི་ཕྱག་རྒྱུན་འཛིན་བྱ་རྒྱུ་ནི་ཕྲག་ཏུ་བབས་པའི་ལྡོག་མེད་འགན་འཁྲི་ཞིག་ཡིན། དེ་བས་མཚོ་ལྷོ་ཁུལ་མི་རིགས་མཐོ་རིམ་སློབ་འབྲིང་དང་པོས་ཉེ་ལམ་སློབ་རའི་རིག་གནས་འཚོ་བ་ཕུན་སུམ་ཇེ་ཚོགས་དང་། སློབ་མའི་བསླབ་ཕྱིའི་བྱ་འགུལ་སྣ་མང་ཅན་དུ་བསྒྱུར་བ། ལྷག་པར་དུ་རྒྱལ་ཡོངས་བོད་ཀྱི་ཡིག་གཟུགས་དུས་ཆེན་བསུ་བའི་གོ་སྐབས་དང་བསྟུན་ནས་ཡིག་གཟུགས་ལ་དགའ་བའི་བསམ་བློ་སྐྱེད་སྲིང་དང་བོད་ཀྱི་ཡིག་གཟུགས་ལ་སྤྲོ་བ་ཡོད་པའི་སློབ་བུ་དག་ལ་རང་རང་གི་འཇོན་ནུས་ངོམས་སའི་སྟེགས་བུ་ཞིག་བསྐྲུན་ཆེད་སློབ་རའི་བྲིས་པ་ཆུང་ཆུང་རྟགས་མའི་བོད་ཡིག་ཡིག་གཟུགས་འགྲན་བསྡུར་སྐབས་གསུམ་པ་གཟབ་རྒྱས་ངང་སྤེལ།
ཐེངས་འདིའི་བྱ་འགུལ་གྱི་འགྲན་ཞུགས་སློབ་གྲོགས་རྣམས་ཀྱི་སྨྱུག་རྩེ་ལས་འཁྲུངས་པའི་ཡིག་གཟུགས་སྣ་ཚོགས་ཀྱི་བརྩམས་ཆོས་དག་སློབ་གྲྭའི་དགེ་སློབ་ཡོངས་ཀྱི་འདྲེན་བྱེད་རྒྱལ་མོའི་དཔྱིད་དུ་བཀྲམ་པས་ཡིད་ཀྱི་དང་བ་ཅིག་ཅར་ཏུ་བཀུག་ལ། བསྟོད་པའི་མཐེ་བོང་མི་བགྲང་བ་གཅིག་ཀྱང་མི་འདུག
མཚོ་ལྷོ་ཁུལ་མི་རིགས་མཐོ་འབྲིང་དང་པོས་བོད་ཡིག་ཡིག་གཟུགས་འགྲན་བསྡུར་གྱི་བྱ་འགུལ་སྤེལ།
ཐེངས་འདིའི་བྱ་འགུལ་བརྒྱུད་ནས་སློབ་རའི་གླིང་འདིར་མི་རིགས་རང་གི་རྩམ་དྲི་དང་མར་དྲི་མ་ཡལ་བའི་སྲོལ་རྒྱུན་རིག་གནས་མ་ཉམས་གོང་དུ་སྤེལ་བར་ནུས་པ་བླ་ལྷག་ཐོན་ཡོད་པ་མ་ཟད། སློབ་ཕྲུག་ཚོ་ཡིག་གཟུགས་ལ་དགའ་བའི་བསམ་བློ་སྐྱེད་སྲིང་བྱས་པ་མ་ཟད། སློབ་རའི་རིག་གནས་འཛུགས་སྐྲུན་ལ་མཛེས་སྡུག་གསར་བ་ཞིག་གི་ཁ་དོག་བསྣན་ཡོད།
