མེ་འོད་ལོ་དེབ་འདོན་ཐེངས་བདུན་པའི་རྩོམ་བརྡ།

བརྩེ་ལྡན་གྱི་སྨྱུག་འཛིན་པ་ཡོངས་ལ།
        ད་ནི་མེ་འོད་འདོན་ཐེངས་བདུན་པར་ཐོན་ཞིང་། འདོན་ཐེངས་དྲུག་ལྷག་གི་བཞུད་ལམ་ལ་ཕྱིར་མིག་ལྟ་དུས་རྒྱལ་ཕམ་དང་ལེགས་ཉེས། དགའ་སྐྱོ་དང་འགྱུར་ལྡོག་གང་མང་ཞིག་ཡོད་ལ་ཡོད་ངེས་ཀྱང་ཡིན། སྔོན་ཆད་ཀྱི་སློབ་རའི་ཚགས་པར་ཞིག་ནས་སྤྱི་ཚོགས་ཡོངས་ལ་ཁ་གཏད་པའི་ལོ་དེབ་ཅིག་ལ་འགྱུར་རྒྱུ་ནི་ཧ་ཅང་དཀའ་ཁག་མང་པོ་ཞིག་ཡོད་ལ། ལྷག་པར་ཏུ་ང་ཚོ་ནི་སློབ་མ་དག་དག་ཡིན་པས་ཀུན་གྱི་དོ་སྣང་དབེན་ཞིང་གཞན་གྱི་དམའ་སར་ཡང་འཕེན་མྱོང་། ཡིན་ཡང་ང་ཚོ་ལ་ང་ཚོའི་རེ་སྙེག་ལྡན་ཞིང་ང་ཚོ་ལ་ཡང་རང་དང་འོས་འཚམས་ཀྱི་ལྷག་བསམ་ཡོད་པས། དཀའ་ཁག་གང་མང་མང་གི་ལྟེབ་ཁུགས་དང་ལམ་ཕྲན་ཀྱག་ཀྱོག་གི་མདོ་ཁ་ནས་ང་ཚོ་སྔར་བཞིན་ལམ་ལ་ཆས་ཤིང་འབྱུང་འགྱུར་ཡང་ལམ་ལ་ཆས་རྩིས་ཡོད། དེའི་ཁྲོད་དུ་ང་ཚོར་ཡིད་ཆེས་དང་སྤོབས་པ་བསྩོལ་བའི་རྩོམ་མཁན་རྒན་གཞོན་རྣམས་དང་མཆེད་གྲོགས་ཉེ་དུ་སོགས་ལ་བཀའ་དྲིན་སྙིང་ནས་ཞུས་པ་ཡིན། རྒྱུ་མཚན་ནི་ཁོ་ཚོས་མཚན་སྙན་གྲགས་དང་རྒྱུ་འབྱོར་བ་ལ་མ་ལྟོས་པར་རྩོམ་གྱི་རྒྱབ་བསྐྱོར་དང་ཚིག་གི་སེམས་གསོ་གང་མང་སྦྱིན། མདོར་ན་ང་ཚོར་ཡིད་ཆེས་གནང་མཁན་གྱི་མི་སྣ་ཡོངས་ལ་ཐུགས་རྗེ་ཡང་ཡང་ཞུས་པ་ཡིན།
        སློབ་སྦྱོང་གི་བྲེལ་གསེང་དང་བྱ་བ་ཙག་ཙིག་གི་དབང་གིས་རྩོམ་སྒྲིག་པ་ཇེ་ཉུང་ལ་སོང་ཡོད་པས་རྩོམ་སྒྲིག་དང་ཞུ་དག་པར་སྐྲུན་སོགས་ལ་ལྟོས་ས་ལྟོས་འཇོག་གི་ལས་ཁུར་ལྕི་རུ་སོང་ཡོད།  ཡིན་ཡང་ང་ཚོས་རང་ནུས་ཡོད་དགུས་ལས་འདི་འདྲ་ཞིག་སྐྱོང་རྩིས་ཡིན་ལ།  ལས་འདི་ལ་ང་ཚོ་སྤྲོ་བ་ཡོད་པས།  ལོ་དེབ་འདིའི་མཇུག་མ་བསྡུས་ཤིང་མཚམས་མ་བཅད་པར་ད་ཐེངས་ཀྱང་དཔར་ཐེངས་བདུན་པ་དེ་འདོན་རྩིས་ཡོད་པས།  རྒྱ་ཆེ་བའི་སྨྱུག་ཐོག་པ་ཡོངས་ཀྱིས་རྒྱབ་སྐྱོར་གྱི་ཚུལ་གྱིས་རྩོམ་ལུས་ཚིགས་བཅད་ཀྱི་ལམ་ནས་རྩོམ་ཡིག་རེ་བསྐུར་གནང་ཡོང་བར་བཀའ་དྲིན་རབ་ཏུ་ཞུས་པ་ཡིན།
        གསལ་ཁ་ཡིན་ཁུལ་གྱི་རེ་བ་འདི་འདྲ་འགའ་ཡོད་དེ།  དགག་བཞག་གི་རྣོ་ཟུར་ཆེ་ཞིང་ཕྱིར་རྟོག་གི་མིག་མདངས་གསལ་བ། གསར་ཤེས་དང་ཡར་སྐུལ་གྱི་ཆ་ལྡན་པའི་བརྩམས་ཆོས་དག་དམིགས་གསལ་གྱིས་འདེམས་རྒྱུ་ཡིན། ནང་དོན་ཡར་ཐོན་ཡིན་དགོས་ལ། དཔལ་འབྱོར་གྱི་རྐྱེན་གྱིས་ཤོག་ངོས་ལ་ཚད་དཀག་ཡོད་པས་ཧ་ཅང་རིང་བའི་རིགས་ཀྱང་ལེན་རྩིས་མེད།  ཡིན་ཡང་ཁྱེད་ཚོ་ནི་ང་ཚོ་ལ་རྒྱབ་སྐྱོར་བྱེད་མཁན་ཞིག་དང་རྩོམ་རིག་ལ་དོ་ཁུར།   སྤྱི་ཚོགས་ལ་དྲང་བདེན་གྱི་ལྟ་མཁན་ཞིག་ཡིན་པའི་ངོས་ནས་མང་པོ་ཞིག་ཁྱེད་ཚོས་རྟོགས་ངེས། དེའི་ཐད་ནས་ཁྱེད་ཚོ་ལ་ཡིད་ཆེས་ཟབ་མོ་ཡོད།
རྩོམ་ཡིག་སྐུར་བའི་དུས་ཡུན། སྤྱི་ཟླ12པའི་སྔོན་ལ་འབྱོར་དགོས།
རྩོམ་ཡིག་བསྐུར་ཡུལ། maiao2010@qq.com
འབྲེལ་གཏུག་བྱེད་ས། མཁར་རིག་འོད།15196053711  ལྡོང་ཚེ་རྡོར།18095707311