སྐབས་དང་པོའི་བོད་ཀྱི་བུད་མེད་རྩོམ་རིག་གསར་རྩོམ་དཔྱད་གླེང་ཚོགས་འདུ་ཟི་ལིང་དུ་ཚོགས་པ།
སྐབས་དང་པོའི་བོད་ཀྱི་བུད་མེད་རྩོམ་རིག་གསར་རྩོམ་དཔྱད་གླེང་ཚོགས་འདུ་ཟི་ལིང་དུ་ཚོགས་པ།
2013ལོའི་ཟླ7པའི་ཚེས24ཉིན“སྐབས་དང་པོའི་བོད་ཀྱི་བུད་མེད་རྩོམ་རིག་གསར་རྩོམ་དཔྱད་གླེང་ཚོགས་འདུ”གནའ་མཁར་ཟི་ལིང་དུ་གཟབ་རྒྱས་ངང་ཚོགས།
ཚོགས་འདུར་རྩོམ་རིག་ཆེད་མཁས་པ་ཟླ་བ་བློ་གྲོས་དང་། དགེ་བསྙེན་རྡོ་རྗེ། རྒྱ་ཡེ་བཀྲ་བྷོ། རྩོམ་རིག་དཔྱད་བརྗོད་པ་བདུད་ལྷ་རྒྱལ་དང་ཚེ་གྲུབ། སྒྲོལ་མ། པི་ཡན་ཅུན་སོགས་དང་། སྙན་ངག་པ་འཇུ་སྐལ་བཟང་དང་། སྨྲེང་བུ། མཛེས་སེ། ཁྲི་སེམས་དཔའ། ཁྱུང་བཟང་། མདོ་སྨད་ཧེ་རུ་ཀ གེ་སར། འཕྲིན་ཁྱུང་། དཔའ་རྡོ་ཐར། རྡོ་སྦིས་རྡོ་རྗེ། མུན་འཇོམས་སྒྲོན་མེ། སྒྲུང་གཏམ་པ་ཚེ་རིང་དོན་གྲུབ་དང་བཀྲ་བྷ་སོགས་དང་། བུད་མེད་རྩོམ་པ་པོ་འཆི་མེད། ཚེ་རིང་དབྱངས་སྐྱིད། འོད་ཟེར་འཚོ། གཡང་མཚོ་སྐྱིད། དཔལ་མོ། མཁའ་མོ་རྒྱལ། ལྷ་མོ་སྐྱིད ། བོད་ཀྱི་སློབ་གསོ་བ་འཇིགས་མེད་རྒྱལ་མཚན་དང་། གླིང་ཚ་པད་དབང་། ཚེ་རིང་དོན་གྲུབ། རྨེ་རུ་ཡུལ་ལྷ་ཐར། རྩེར་སྙེག་རྩོམ་སྒྲིག་ཁང་གི་གཙོ་སྒྲིག་པ་ཚེ་བརྟན་རྡོ་རྗེ། སྤང་རྒྱན་མེ་ཏོག་རྩོམ་སྒྲིག་ཁང་གི་གཙོ་སྒྲིག་པ་ཆུང་བདག གངས་རྒྱན་མེ་ཏོག་གི་གཙོ་སྒྲིག་པ་ཀླུ་འབུམ་རྒྱལ། ཟླ་ཟེར་རྩོམ་སྒྲིག་ཁང་གི་གཙོ་སྒྲིག་པ་ཕྱག་རྡོར་ཚེ་རིང་། བོད་ཀྱི་རྩོམ་རིག་སྒྱུ་རྩལ་རྩོམ་སྒྲིག་ཁང་གི་རྩོམ་སྒྲིག་པ་དཔལ་ལྷ། མང་ཚོགས་སྒྱུ་རྩལ་རྩོམ་སྒྲིག་ཁང་གི་ཚེ་རྒྱལ། ཁྲིམས་ལུགས་ཚགས་པར་ཁང་གི་རམས་ཚེ་བྷོ་དང་ལོ་བརྒྱ་ཚེ་རིང་སོགས་དང་། ད་དུང་མཚོ་སྔོན་མི་རིགས་དཔེ་སྐྲུན་ཁང་དང་སྦྲང་ཆར་རྩོམ་སྒྲིག་ཁང་གི་མགོ་ཁྲིད་དང་རྩོམ་སྒྲིག་པ་ལྷན་རྒྱས། གངས་རིའི་བུ་མོ་རྩོམ་སྒྲིག་པ་སོགས་ཚོགས་མི་བརྒྱ་ལྷག་ཞུགས།
སྐབས་དང་པོའི་བོད་ཀྱི་བུད་མེད་རྩོམ་རིག་གསར་རྩོམ་དཔྱད་གླེང་ཚོགས་འདུ་ཟི་ལིང་དུ་ཚོགས་པ།
དཔྱད་གླེང་ཚོགས་འདུའི་སྟེང་ཆེད་མཁས་དང་དཔྱད་བརྗོད་པ18ཀྱིས་བོད་ཀྱི་བུད་མེད་ཀྱི་རྩོམ་རིག་གསར་རྩོམ་གྱི་ད་ལྟའི་གནས་བབ་དང་། མིག་སྔའི་གནད་དོན། འཕེལ་རྒྱས་ཀྱི་མདུན་ལྗོངས་བཅས་སུ་འབྲེལ་ནས་བོད་ཀྱི་དེང་རབས་ཀྱི་རྩོམ་རིག་གི་སྤྱིའི་རྣམ་པ་སོགས་སུ་དབྱེ་ཞིབ་ཕྲ་ཞིང་ཞིབ་པ་བྱས་ནས། གནད་ལ་འཐིངས་པའི་ལྟ་བ་དང་གྲོས་འཆར་བཏོན་ཞིང་། ཐེངས་འདིའི་དཔྱད་གླེང་ཚོགས་འདུའི་སྟེང་བོད་ཀྱི་བུད་མེད་ཀྱི་རྩོམ་རིག་གསར་རྩོམ་དེ་བོད་ཀྱི་དེང་རབས་རྩོམ་རིག་གི་གྲས་སུ་བཞག་ནས་བགྲོ་གླེང་བྱས་པ་ནི་ཐེངས་དང་པོ་ཡིན་ལ། དེས་བོད་ཀྱི་རྩོམ་རིག་གསར་རྩོམ་དེ་འཕེལ་རྒྱས་ཀྱི་སྐས་རིམ་གསར་པ་ཞིག་ཏུ་བསླེབས་པ་མཚོན་ཐུབ་པའི་ཁར། བོད་ཀྱི་བུད་མེད་ཀྱི་རྩོམ་རིག་གསར་རྩོམ་ལ་ཤན་སྟོབས་ངེས་ཅན་ཞིག་ཐོབ་ངེས་པ་རེད།
