མཚོ་ལྷོ་ཁུལ་གྱི་འཇང་དགུན་ཆོས་ཆེན་མོ་སྐབས་བཅུ་བ་བདེ་བླག་ངང་མཇུག་རྫོགས་པ།

མཚོ་ལྷོ་ཁུལ་གྱི་འཇང་དགུན་ཆོས་ཆེན་མོ་སྐབས་བཅུ་བ་བདེ་བླག་ངང་མཇུག་རྫོགས་པ།

གྲྭ་བཙུན་རྣམས་ཀྱིས་རྟགས་གསལ་གཏོང་བཞིན་པའི་ཡུལ་དངོས།

　　ཟླ10བའི་ཚེས29ཉིན། ཉིན8ལ་སྤེལ་བའི་མཚོ་ལྷོ་བོད་རིགས་རང་སྐྱོང་ཁུལ་གྱི་འཇང་དགུན་ཆོས་ཆེན་མོ་སྐབས་བཅུ་བ་ཡོངས་སུ་མཇུག་རྫོགས་ཤིང་། ཁུལ་ཡོངས་ཀྱི་བོད་བརྒྱུད་ནང་བསྟན་གྱི་ཆོས་སྡེ22ནས་ཡོང་བའི་བླ་སྤྲུལ་དང་། གྲྭ་བཙུན། འབྲེལ་ཡོད་སྡེ་ཁག་གི་འགོ་ཁྲིད་སོགས་མཛད་སྒོའི་སྟེང་ཞུགས་པ་རེད།
　　ཐེངས་འདིའི་བོད་བརྒྱུད་ནང་བསྟན་གྱི་རིག་གཞུང་བགྲོ་གླེང་ལ་མངོན་སུམ་གྱི་ཕན་འབྲས་ཐོན་འདུག་པ་སྟེ། གཅིག་ནི་བོད་རིག་པའི་ཆེད་མཁས་པ་གྲགས་ཅན་གདན་འདྲེན་ཞུས་ནས་གྲྭ་བཙུན་རྣམས་ལ་འཆད་ཁྲིད་གནང་བས། རིག་གཞུང་བགྲོ་གླེང་འདི་ཟབ་སྦྱོང་གི་བྱ་འགུལ་རྒྱ་ཆེན་པོ་ཞིག་ཏུ་འཕེལ། གཉིས་ནི་འབྲེལ་ཡོད་སྡེ་ཁག་གིས་བོད་བརྒྱུད་ནང་བསྟན་གྱི་གྲུབ་མཐའ་སོ་སོ་རིས་སུ་མ་ཆད་པར་གསེར་ཆེན་རྫོང་ཏིང་ཀྱཱ་རྙིང་མ་བའི་དགོན་པ་དང་ཁྲི་ཀའི་སྟོང་ཆེ་ཁྱུང་མོ་གཡུང་དྲུང་བོན་དགོན་སོགས་ཀྱི་གྲྭ་བཙུན་རྣམས་གདན་འདྲེན་ཞུས་ཏེ་ཕན་ཚུན་ལ་བཀུར་བསྟི་དང་འཆམ་མཐུན་སྒོས་རྟགས་གསལ་བཏང་བ་འདིས་ཕན་ཚུན་གྱི་ཐུན་མོང་མ་ཡིན་པའི་ལྟ་གྲུབ་དག་བརྗེ་རེས་དང་སློབ་སྦྱོང་བྱེད་པར་ནུས་པ་མངོན་སུམ་ཐོན། གསུམ་ནི་མཚོ་ལྷོ་ཁུལ་ནང་བསྟན་ཁྱབ་ཁོངས་ཀྱི་བླ་སྤྲུལ་སྙན་གྲགས་ཅན་གདན་འདྲེན་ཞུས་ནས་དད་ལྡན་མང་ཚོགས་ལ་བོད་བརྒྱུད་ནང་བསྟན་གྱི་རྩ་བའི་བསྟན་བྱ་ལྟར་ནམ་རྒྱུན་གྱི་འཚོ་བའི་ཁྲོད་རྣམ་དཀར་དགེ་བའི་ལས་ལྷུར་ལེན་པ་དང་སྡུག་པ་མི་དགེ་བའི་ལས་སྤང་དགོས་པའི་ཚུལ་གྱི་བསླབ་བྱ་གནང་བས་ངེས་པ་དོན་གྱི་ཕན་འབྲས་ཆེན་པོ་ཐོན་པའོ།།