《མཚོ་སྔོན་ཞིང་ཆེན་གྱི་བོད་སྨན་འདུལ་ཐབས་ཀྱི་ཚད་གཞི》བོད་ཡིག་པར་གཞི་པར་བསྐྲུན་འགྲེམ་སྤེལ་བྱས།

　　ཉེ་ཆར《མཚོ་སྔོན་ཞིང་ཆེན་གྱི་བོད་སྨན་འདུལ་ཐབས་ཀྱི་ཚད་གཞི》(2010ལོའི)བོད་ཡིག་པར་གཞི་དེ་མཚོ་སྔོན་ཞིང་ཆེན་ཟས་རིགས་དང་སྨན་རྫས་ལྟ་སྐུལ་དོ་དམ་ཅུས་འབྲེལ་ཡོད་ཀྱི་ཆེད་མཁས་པ་རྣམས་རྩ་འཛུགས་བྱས་ཏེ་ལོ་གཉིས་ཀྱི་རིང་དུ་བསྒྱུར་སྒྲིག་བྱས་ཚར་ནས། མཚོ་སྔོན་ཞིང་ཆེན་མི་རིགས་དཔེ་སྐྲུན་ཁང་གིས་པར་བསྐྲུན་འགྲེམ་སྤེལ་བྱས། 《བོད་སྨན་འདུལ་ཐབས་ཀྱི་ཚད་གཞི》ནི་མཚོ་སྔོན་ཞིང་ཆེན་གྱི་ས་གནས་རང་བཞིན་གྱི་བོད་སྨན་ཐོན་སྐྱེད་ཁེ་ལས་དང་མི་རིགས་སྨན་བཅོས་སྡེ་ཁག་གི་བོད་སྨན་འདུལ་ཐབས་ཀྱི་ཚད་གཞི་ཐོག་མ་ཡིན་ཞིང་། འདུལ་སྦྱོང་བྱས་པའི་སྨན་རྫས་ཀྱི་རྒྱུ་སྤུས་ཁག་ཐེག་དང་། སྤྱི་དམངས་ཀྱིས་བདེ་འཇགས་ཀྱིས་སྨན་བསྟེན་པར་འགན་སྲུང་བྱས་ཏེ་མཚོ་སྔོན་ཞིང་ཆེན་གྱི་བོད་ཀྱི་གསོ་རིག་ལས་དོན་གོ་རིམ་ལྡན་ཞིང་བདེ་བླག་ངང་གོང་དུ་སྤེལ་བར་ནུས་པ་ཆེན་པོ་ཐོན་པ་རེད།
　　《བོད་སྨན་འདུལ་ཐབས་ཀྱི་ཚད་གཞི》ཞེས་པའི་ནང་དུ་སྲོག་ཆགས་ཀྱི་རིགས་དང་། རྩི་ཤིང་གི་རིགས། གཏེར་རྫས་རིགས་ཀྱི་འདུལ་བྱའི་སྨན་སྣ244བསྡུ་ཉར་བྱས་ཡོད་ཅིང་། དཀྱུས་སུ་བོད་རྒྱ་ཡིག་རིགས་གཉིས་ཀྱི་མིང་དང་། འབྱུང་ཁུངས། འདུལ་ཐབས། རྣམ་པ། ཕན་ནུས། བསྟེན་ཚུལ་སོགས་བཀོད་འདུག  དེར་མ་ཟད་མཚོ་སྔོན་གྱི་ས་གནས་རང་ནས་ཐོན་པ་དང་ཐོན་སྐྱེད་བྱེད་བཞིན་པའི་སྨན་ཟོང་ལས་འདུལ་སྦྱོང་བྱས་པའི་སྨན་རྫས་ཀྱི་ཚོན་རིས་རིགས36བསྡུ་ཉར་བྱས་ཡོད་ལ། 《བོད་སྨན་འདུལ་ཐབས་ཀྱི་ཚད་གཞི》ནི་མཚོ་སྔོན་ཞིང་ཆེན་གྱི་འདུལ་སྦྱོང་བྱ་བའི་བོད་སྨན་ཐོན་སྐྱེད་དང་། འཁོར་རྒྱུག  བཀོལ་སྤྱོད། ཞིབ་བཤེར། ལྟ་སྐུལ་དོ་དམ་བྱེད་པའི་ཁྲིམས་བཀོད་ལག་རྩལ་གྱི་ཚད་གཞི་ཞིག་ཡིན་པ་རེད།