ལུང་པ་དོན་འགྲུབ་ལ་སྐབས་དྲུག་པའི་ན་གཞོན་གླེང་སྟེགས་བྱ་དགའ་ཨང་དང་པོ་ཐོབ་པ།

གཟེངས་རྟགས་དཔང་ཡིག

          ཀྲུང་གོ་ཁྲིམས་ལུགས་རིག་པ་ཚོགས་པའི་དྲ་བ་དང་།  ཀྲུང་གོ་ཁྲིམས་ལུགས་རིག་པའི་གསར་གཏོད་དྲ་བ།  དྲང་བདེན་དྲ་བ།  ཀྲུང་གོ་ཁྲིམས་ལུགས་རིག་པ་ཚོགས་པའི་ཁྲིམས་ལུགས་ཆ་འཕྲིན་པུའི་དྲ་བ་སོགས་ཀྲུང་དབྱང་ཁྲིམས་ལུགས་རིག་པའི་དྲ་བ་ཁག་དང་། ཞིང་ཆེན་དང་རང་སྐྱོང་ས་ཁུལ་སོགས་ཀྱི་ཁྲིམས་ལུགས་རིག་པའི་དྲ་བ་རྣམས་ཀྱིས་ཁྱབ་བསྒྲགས་བྱས་པ་ལྟར།  ནུབ་བྱང་མི་རིགས་སློབ་ཆེན་ཁྲིམས་ལུགས་རིག་པའི་གླིང་གི་འཆད་ཁྲིད་དགེ་རྒན་ནམ་ཀྲུང་གོའི་སྲིད་ཁྲིམས་སློབ་ཆེན་གྱི་ཁྲིམས་ལུགས་རིག་པའི་འབུམ་རམས་པ་ལུང་པ་དོན་འགྲུབ་ཀྱིས་བོད་རིག་པ་དང་།  ནང་བསྟན་ཆོས་ལུགས།  ཁྲིམས་ལུགས།  མི་རིགས་རིག་པ།  བོད་བརྒྱུད་ནང་བསྟན་མཚན་ཉིད་རིག་པ་སོགས་རིག་ཚན་མང་པོ་སྤྱད་དེ་བརྩམས་པའི《ཀྲུང་གོའི་ཉེས་དོན་ཁྲིམས་སྐྱོང་འཛུགས་སྐྲུན་གྱི་ས་གནས་ལམ་ཕྱོགས》ཞེས་པའི་དཔྱད་རྩོམ་འདིར་ཀྲུང་གོ་ཁྲིམས་ལུགས་ཚོགས་པས་གཙོ་སྒྲུབ་དང་།  པེ་ཅིན་དགེ་ཐོན་སློབ་ཆེན་དང་ཁྲིམས་ལུགས་ཚགས་པར་ཁང་།  མི་དམངས་ཁྲིམས་ཁང་ཚགས་པར་ཁང་།  ཞིབ་དཔྱོད་ཚགས་པར་ཁང་།  ཀྲུང་གོ་ཁྲིམས་ལུགས་རིག་པའི་དུས་དེབ་ཁང་།  དེ་མིན་ཀྲུང་གོ་ཁྲིམས་ལུགས་རིག་པ་ཚོགས་པའི་ཁྲིམས་ལུགས་ཆ་འཕྲིན་པུའུ་བཅས་ཀྱིས་འགན་སྒྲུབ་གནང་བའི་སྐབས་དྲུག་པའི་ཀྲུང་གོ་ཁྲིམས་ལུགས་རིག་པའི་ན་གཞོན་གླེང་སྟེགས་ཏེ“སྤྱི་ཚོགས་དོ་དམ་གསར་གཏོད་དང་ཀྲུང་གོ་ཁྲིམས་སྐྱོང་འཕེལ་རྒྱས”བརྗོད་བྱ་བྱས་པའི་བྱ་འགུལ་ཁྲོད་དགའ་རྟགས་ཨང་དང་པོ་ཐོབ་པ་རེད། 
          དཔྱད་རྩོམ་འདི་ནི་སྐབས་འདིའི་རྩ་འཛུགས་ཨུ་ཡོན་ལྷན་ཚོགས་ཀྱིས་རྩ་འཛུགས་གནང་བའི་ཁྲིམས་ལུགས་རིག་པའི་དབང་གྲགས་ཆེད་མཁས་པ་རྣམས་ཀྱིས་ནན་ཏན་སྒོས་ཐོག་མའི་དཔྱད་འཇོག་དང་བར་གྱི་དཔྱད་འཇོག་གོ་རིམ་ཁྲོད་གདེང་འཇོག་ཆེན་པོ་བྱས་པ་མ་ཟད།  ཟླ12བའི་ཚེས25ཉིན་པེ་ཅིན་དགེ་ཐོན་སློབ་ཆེན་དུ་གཟབ་རྒྱས་ངང་སྤེལ་པའི་གླེང་སྟེགས་དང་བྱ་དགའ་གནང་བའི་མཛད་སྒོ་སྟེང་གི་རྒྱལ་ཡོངས་རྒན་དར་གཞོན་གསུམ་གྱི་ཁྲིམས་ལུགས་རིག་པ་བ་དག་དང་།  རྒྱལ་ཡོངས་དམངས་ཆེན་དང་ཀྲུང་གོ་ཁྲིམས་ལུགས་རིག་པ་ཚོགས་པ།  ཆེས་མཐོའི་མི་དམངས་ཁྲིམས་ཁང་།  ན་གཞོན་མཐུན་ཚོགས་ཀྲུང་དབྱང་ཧྲུའུ་ཅི་ཁྲུའུ་སོགས་ཀྱི་འབྲེལ་ཡོད་འགོ་ཁྲིད་སོགས་ཀྱིས་ཀྱང་ཚད་མཐོའི་གདེང་འཇོག་གནང་ཞིང་།   འདི་ནི་ལུང་པ་དོན་འགྲུབ་པེ་ཅིན་དུ་ཁྲིམས་ལུགས་རིག་པ་སྦྱོང་བའི་དུས་ཡུན་ལོ་གཅིག་གི་ཁྲོད་ཆེས་གཟེངས་སུ་ཐོན་པའི་གྲུབ་འབྲས་ལས་ཀྲུང་གོ་ཁྲིམས་ལུགས་རིག་པའི་ཁྱབ་ཁོངས་ནང་ཐོབ་པའི་བྱ་དགའ་བཞི་བ་ཡིན་པ་རེད། 

ཞར་བཀོད། 
          བྱ་དགའ་ཐེངས་བཞི་སྟེ།  དང་པོ་ནི2011ལོའི་ཟླ4བར་ཁོ་རང་ཉིད་ཀྱིས་འགན་བླངས་བའི་རྒྱལ་ཁབ་སྤྱི་ཚོགས་ཚན་རིག་ཐེབས་རྩའི་ན་གཞོན་ལས་གཞི་སྟེ《སྤྱི་ཚོགས་རིང་ལུགས་ཀྱི་ཁྲིམས་སྐྱོང་འཛུགས་སྐྲུན་དང་བོད་ཀྱི་ཁྲིམས་ལུགས་རིག་གནས་བར་གྱི་འབྲེལ་བ་ཞིབ་འཇུག》ཞེས་པར་རྒྱལ་ཁབ་སྤྱི་ཚོགས་ཚན་རིག་འཆར་འགོད་ལས་ཁུངས་ཀྱིས་ཕུལ་བྱུང་རིམ་པར་གཏན་འཁེལ་བྱས།  གཉིས་པ་ནི2011ལོའི་ཟླ5བར་ཀྲུང་གོ་སྲིད་ཁྲིམས་སློབ་ཆེན་གྱི“སྐབས་བརྒྱད་པའི་རིག་གཞུང་མི་གསར”གྱི་བྱ་དགའ་ཐོབ།  གསུམ་པ་ནི2011ལོའི་ཟླ11པར“སྐབས་གཉིས་པའི་ཀྲང་ཅིན་ཕན་ཁྲིམས་ལུགས་ལོ་རྒྱུས་རིག་པའི་ཐེབས་རྩ་ཚོགས་པའི་ཕུལ་བྱུང་དཔྱད་རྩོམ”གྱི་བྱ་དགའ་ཐོབ།  བཞི་བ་ནི2011ལོའི་ཟླ12བའི་ཚེས25ཉིན་གྱི་སྐབས་དྲུག་པའི་ཀྲུང་གོ་ཁྲིམས་ལུགས་རིག་པའི་ན་གཞོན་གླེང་སྟེགས“སྤྱི་ཚོགས་དོ་དམ་གསར་གཏོད་དང་ཀྲུང་གོ་ཁྲིམས་སྐྱོང་འཕེལ་རྒྱས”ཀྱི་བྱ་དགའ་ཐོབ་པ་བཅས་སོ།།  འདི་ནི“ཀྲུང་གོ་ཁྲིམས་ལུགས་རིག་པའི་ན་གཞོན་གླེང་སྟེགས”རྩོམ་བསྡུའི་འགྲན་བསྡུར་ལོ་རྒྱུས་ཁྲོད་ཐེངས་དང་པོར་ཐོབ་མྱོང་བའི་བོད་རིགས་ཁྲིམས་ལུགས་རིག་པ་བ་ཞིག་ཡིན་ཞིང་།  ནུབ་བྱང་མི་རིགས་སློབ་ཆེན་དང་ཀྲུང་གོ་སྲིད་ཁྲིམས་སློབ་ཆེན།  དེ་མིན་བོད་ཀྱི་ཁྲིམས་ལུགས་རིག་པའི་ལས་རིགས་ལ་དགེ་མཚན་ངེས་ཅན་ལྡན་པ་རེད།