ཁྲི་ཀ་རྫོང་མི་རིགས་བཅའ་སྡོད་སློབ་གྲྭས་བསྡུས་གྲྭའི་སྦྱངས་འབྲས་ངོམ་པའི་དཔྱད་འཇོག་བྱ་འགུལ་སྤེལ་པ།
སྔ་རྒོལ་དང་ཕྱི་རྒོལ་གྱི་ཛ་དྲག་རྩོད་པའི་ཁྲོད་ནས་མཐའ་མཇུག་གི་རྒྱལ་ཁར་སྙེག་པ།
ཟླ12པའི་ཚེས25ཉིན་གྱི་ཕྱི་དྲོར། ཁྲི་ཀ་རྫོང་མི་རིགས་བཅའ་སྡོད་སློབ་གྲྭའི་སྐབས་དང་པོའི་བསྡུས་གྲྭའི་སྦྱངས་འབྲས་ངོམ་པའི་དཔྱད་འཇོག་བྱ་བའི་བྱ་འགུལ་དེ་སློབ་གྲྭའི་རྩལ་སྦྱང་ར་བ་ནས་བསྡུས། ཕྱི་དྲོའི་ཚོགས་བརྡ་བརྒྱབ་མ་ཐག་ལོ་རིམ་བརྒྱད་པའི་འཛིན་གྲྭ་དགུ་བོའི་སློབ་བུ་དག་གིས་ལུས་ལ་མི་རིགས་ཀྱི་ཁྱད་ཆོས་དོད་པའི་བོད་ལ་གྲ་དག་གྱོན་ཞིང་སྤོབས་སེམས་དང་སྤྲོ་ཉམས་འདྲེས་མས་ཚར་དུ་དངར་བའི་གྲལ་བསྒྲིགས་ཏེ་ཚོགས་རར་ཞུགས།
འཛིན་གྲྭ་སོ་སོའི་འཐུས་ཚབ་རེ་རེ་ནས་རིགས་ལམ་འཕྲུལ་གྱི་འཁོར་ལོ་བསྐོར་བ།
བྱ་འགུལ་གྱི་འགྲོ་རིམ་ལྟར་དུ་ཐོག་མར་ལོ་རིམ་བརྒྱད་པའི་འཛིན་གྲྭ་སོ་སོ་ནས་འགྲོས་མཉམ་ཞིང་གདངས་མཐོ་བའི་བློར་འཛིན་གྱི་འུར་སྒྲ་དེ་རེ་ཞིག་ཁོད་ཡངས་པའི་རྩལ་སྦྱོང་ར་བའི་མཁའ་དབྱིངས་སུ་བྲག་ཅར་བསྐྱིལ། དེ་མུར་སློབ་གྲྭའི་ལོ་རིམ་གཞན་པའི་སློབ་བུ་དག་མ་བགྲོས་རང་འདུས་ངང་ཕྱོགས་གང་ས་རུ་འཚང་ཁ་ཤིག་ཤིག་གིས་ལྟད་མོར་རུབ་ནས་མཚར་སྣང་གི་མིག་ཟུང་བགྲད་དེ་རིམ་གྱིས་ཚོགས་རའི་ལྟད་མོ་བལྟ་སའི་གྲལ་གནས་སུ་བཀོད། གདངས་དབྱངས་འཇེབས་པའི་མདོ་འཛིན་པའི་དབུ་མཛད་ཀྱི་མཆོད་ཚིག་སྙན་མོས་ཚོགས་རའི་འུར་སྒྲ་རེ་ཞིག་འཇགས་པར་བྱས་ཤིང་། འཁྲུག་ཆ་དོད་པའི་བྱ་འགུལ་ཡང་དེར་བསྟུན་སྒོས་དངོས་སུ་འགོ་བརྩམས་བྱུང་།
སློབ་གྲྭའི་ཚད་མའི་དགེ་རྒན་འགས་དཔེ་སྟོན་གྱི་ཚུལ་དུ་རྟགས་གསལ་འཕེན་བཞིན་པའི་ཚུལ།
རེབ་འདིའི་རྩོད་པའི་བྱ་འགུལ་ལ་ཡང་གོ་རིམ་ངེས་ཅན་ཞིག་བསྒྲིགས་ཡོད་དེ། དང་པོ་ཐུན་མོང་གི་རྩོད་པ། གཉིས་པ་དྲི་བ་དྲིས་ལན་འདེབས་པ། གསུམ་པ། མི་སྒེར་གྱི་རྩོད་པ། བཞི་བ། ཟླ་བོ་ཁ་སྤྲོད་ཀྱི་རྩོད་པ། ལྔ་བ་དགེ་རྒན་གྱི་དཔེ་སྟོན་རྩོད་པ། དྲུག་པ་གདེང་འཇོག་དང་བྱ་དགའ་སྟེར་བ་བཅས་ཚགས་དམ་པའི་སྒྲིག་རིམ་གསལ་བོར་མངོན། མ་ཟད་སློབ་གྲྭའི་བཤད་སྦུག་གི་སྒྲིག་ཆས་ལེགས་པོས་སྔ་རྒོལ་བ་དང་ཕྱི་རྒོལ་པའི་ཚིག་འབྲུ་རེ་རེ་གསལ་ཅིང་དག་ལ། སྙན་པའི་བུ་གར་ཞིབ་ཕྲའི་ངང་སིམ་པར་བྱེད་པའི་ནུས་པ་ལྡན་པས། ལྟ་མཁན་མང་པོའི་དགའ་བསུའི་ཐལ་མོ་ལྷང་ལྷང་དུ་མཆེད་ཅིང་བོད་རང་གི་རིག་གནས་ཀྱི་ཐུན་མོང་མ་ཡིན་པའི་ཁྱད་ཆོས་མངོན་པར་མཚོན་ཁར་སློབ་གྲོགས་ཚོས་བྱང་ཆ་ལྡན་ལ་ཁུངས་བཙུན་པའི་ཐལ་འགྱུར་འཕེན་སྟངས་རེ་རེ་དང་ཉམས་འགྱུར་འཛོམས་པའི་ཕྱག་རྒྱ་སྐོར་སྲོལ་ལ་ལྟ་མཁན་པ་རྣམས་ཧ་ལས་ཤིང་ཡ་མཚར་ནས་ཧྲིག་ཧྲིག་མིག་གིས་མགོ་ནས་མཇུག་བར་དུ་དགའ་སྤྲོའི་ངང་ལོངས་སུ་སྤྱོད་ཐུབ་པ་བྱུང་། དུས་ཚོད་གཉིས་གྱི་ཛ་དྲག་དང་བྲེལ་འཚུབ་ཀྱི་རྣམ་པ་འདྲེས་པའི་འགྲན་བསྡུར་རེ་ཞིག་མཇུག་རྫོགས་རྗེས་འཛིན་གྲྭ་དྲུག་པ་དང་འཛིན་གྲྭ་དགུ་བ། འཛིན་གྲྭ་དང་པོ། འཛིན་གྲྭ་གཉིས་པ་བཅས་ལ་རིམ་པར་ཨང་དང་པོ་དང་གཉིས་པ།གསུམ་པ།བཞི་བ་བཅས་ཀྱི་ཐུན་མོང་གི་བྱ་དགའི་འཛིན་ཡིག་དང་ལེགས་སྐྱེས་གྱ་ནོམ་པ་གནངས་པ་རེད།
སྐབས་དང་པོའི་སྦྱངས་འབྲས་ངོམ་པའི་འབྲས་རྟགས་ལས་རྒྱལ་ཁའི་ལེགས་སྐྱེས་ཐོབ་པའི་སློབ་གྲོགས་རྣམས།
འགྲན་བསྡུར་འདི་སྤེལ་བ་བརྒྱུད་ད་དུང་སློབ་བུ་རེ་འགའི་སྨྲ་བརྗོད་ཀྱི་བྱང་ཆ་དང་སློབ་བུའི་སྤོབས་སེམས། རིགས་ལམ་གྱི་ལྡེམ་མྱུར་སོགས་སུ་མི་འདང་ས་ཅུང་ཙམ་ཡོད་པ་མཐོང་ཐུབ་ལ། སློབ་བུའི་ཆུ་ཚད་དོ་མི་མཉམ་པའི་རྣམ་པ་ཡང་རེ་ཞིག་ཤེས་ཐུབ། ཡིན་ཡང་འདི་ནི་ཏག་ཏག་འགོ་རྩོམ་པའི་སྐབས་ཤིག་སྟེ་དགེ་སློབ་ཀུན་ལ་མཚོན་ན་སྔ་ན་མེད་པའི་ཚོད་ལྟ་དང་གསར་བརྗེ་ཞིག དེ་བས་ལྟོས་བཅས་ཀྱིས་བཤད་ན། འདི་ལྟ་བུའི་བྱ་འགུལ་ནི་སློབ་གྲྭ་འདིའི་བོད་ཡིག་དགེ་རྒན་དང་བོད་ཡིག་སློབ་ཁྲིད་བྱེད་ཐབས་ཐད་ལ་འཕོ་འགྱུར་ཆེན་པོ་ཞིག་དང་མཆོངས་བསྐྱོད་ཆེན་པོ་ཞིག ཐོལ་བརྒལ་གསར་བ་ཞིག་ཏུ་གྲུབ་པ་གདོན་མི་ཟའོ།།
