གངས་ལྗོངས་ཤེས་རིག་ཡར་སྐུལ་ཚོགས་པའི་སྐབས་དྲུག་པའི་ཐ་སྙད་འགྲན་ཚོགས།

གངས་ལྗོངས་ཤེས་རིག་ཡར་སྐུལ་ཚོགས་པའི་སྐབས་དྲུག་པའི་ཐ་སྙད་འགྲན་ཚོགས་ཡུལ་དངོས།

དཔྱད་འདེམས་པ་དག

          ཟླ11པའི་ཚེས27ཉིན།  མཚོ་སྔོན་ཞིང་ཆེན་མགོ་ལོག་བོིད་རིགས་རང་སྐྱོང་ཁུལ་གངས་ལྗོངས་ཤེས་རིག་ཡར་སྐུལ་ཚོགས་པས་སྐབས་དྲུག་པའི་ཐ་སྙད་འགྲན་ཚོགས་ཀྱི་བྱ་འགུལ་སྤེལ་ཞིང་།  མགོ་ལོག་ཁུལ་དམངས་ཆེན་རྒྱུན་ལས་ཨུ་ཡོན་གྱི་འགོ་གཙོ་གཞོན་པ་ནོར་བདེ་དང་།  སྔོན་མགོ་ལོག་ཁུལ་རྒྱུན་ལས་ཨུ་ཡོན་གྱི་འགོ་གཙོ་གཞོན་པ། མགོ་ལོག་པར་ལེན་མཐུན་ཚོགས་ཀྱི་འགོ་གཙོ་ཧྥུ་ལོ།  ཁུལ་མི་རིགས་སྐད་ཡིག་གཞུང་སྒྲུབ་ཁང་སོགས་འབྲེལ་ཡོད་སྡེ་ཁག་གི་འགོ་ཁྲིད་ཐེངས་འདིའི་ཤེས་བྱའི་འགྲན་བསྡུར་གྱི་བྱ་འགུལ་ལ་ཞུགས་པ་རེད། 

ཡུལ་དངོས་སུ་དྲིས་ལན་འདེབས་པ།

          འགྲན་བསྡུར་གྱི་གོ་རིམ་ཁྲོད་དམངས་གླུ་དང་རྡུང་ལེན་སོགས་སྒྱུ་རྩལ་འཁྲབ་སྟོན་བྱས་ཤིང་།  ཛ་དྲག་གི་རྣམ་པ་དེ་གནས་སྐབས་སུ་ཞི་ལྷོད་དུ་བཟོས་པ་དང་།  དགའ་སྡེ་རྫོང་གོང་མ་ཡུལ་ཚོ་ནས་ཡོང་བའི་ལོ་བཞི་ཅན་གྱི་བྱིས་པ་གསེར་མོ་མཚོ་ཡིས་ཡུལ་དངོས་སུ་ཐ་སྙད་གསར་བ་ཉིས་བརྒྱ་ལྷག་བློར་བཟུང་ནས་འདིར་བཞུགས་ལྷན་ཚོགས་ཀྱི་སྤྲོ་སེམས་འཁོལ་བའི་དགའ་བསུ་ཐོབ་པ་རེད། 

རྡུང་ལེན་དཀྲོལ་བ།

བྱིས་པ་ཆུང་ཆུང་གསེར་མོ་མཚོ་ཡིས་ཐ་སྙད་བློར་བཟུང་བཞིན་པ།

          མགོ་ལོག་ཁུལ་བོད་ཡིག་སློབ་འབྲིང་དང་།  བཀྲ་ཤིས་ཀུན་ཕན་བོད་སྨན་སློབ་གྲྭ།  དགའ་སྡེ་རྫོང་བོད་ཡིག་སློབ་འབྲིང་སོགས་ཚབ་བྱེད་སྡེ་ཁག་དྲུག་ཐེངས་འདིའི་འགྲན་བསྡུར་ལ་ཞུགས་ཤིང་།  ཛ་དྲག་གི་འགྲན་བསྡུར་བརྒྱུད་དེ་བཀྲ་ཤིས་ཀུན་ཕན་བོད་སྨན་སློབ་གྲྭས་དགའ་རྟགས་ཨང་དང་པོ་བླངས་པ་དང་།  དགའ་སྡེ་རྫོང་བོད་ཡིག་སློབ་འབྲིང་དང་མགོ་ལོག་ཁུལ་བོད་ཡིག་སློབ་འབྲིང་གཉིས་ཀྱིས་སོ་སོས་ཨང་གཉིས་པ་དང་ཨང་གསུམ་པ་བླངས།  དེ་མིན་འགྲན་ཞུགས་སློབ་གྲྭ་གཞན་དག་ལ་གཟེངས་རྟགས་ཀྱི་བྱ་དགའ་ཐོབ་པ་རེད།

གཟིགས་མོ་བའི་ཟུར་ཞིག

བྱ་དགའ་གནང་བ།

          ཉེ་བའི་ལོ་འགའི་རིང་ལ།  བོད་ཁུལ་ཡོངས་ཀྱི་ཡིག་བསྒྱུར་བས་ཆབ་སྲིད་དང་དཔལ་འབྱོར།  ཁྲིམས་ལུགས།  ལག་རྩལ།  སྤྱི་ཚོགས་འཚོ་བ་སོགས་ཀྱི་ཁྱབ་ཁོངས་སུ་བྱུང་བའི་ཐ་སྙད་གསར་བ་དག་དུས་བཅད་ནང་བོད་སྐད་དུ་བསྒྱུར་བ་དང་།  མགོ་ལོག་ཁུལ་གངས་ལྗོངས་ཤེས་རིག་ཡར་སྐུལ་ཚོགས་པས་ཐེངས་དུ་མར་ཐ་སྙད་འགྲན་ཚོགས་ཀྱི་བྱ་འགུལ་སྤེལ་ཞིང་།  རྒྱ་ཆེ་བའི་བོད་རིགས་མང་ཚོགས་དང་སློབ་མ།  ལས་ཁུངས་སོགས་སུ་བོད་སྐད་ཐ་སྙད་གསར་བ་ཁྱབ་སྤེལ་བྱེད་པར་དགེ་མཚན་ཆེན་པོ་ལྡན་གྱི་ཡོད།