ཧུང་ཡོན་རྫོང་ཨ་མཆོག་སློབ་ཆུང་ལ་སྒོར་ཁྲི་ལྷག་གི་ལེགས་སྐྱེས་འབྱོར་བ།
དང་བླངས་བས་སློབ་མ་ཚོར་སློབ་ཕྱིའི་དཔེ་ཆ་གནང་སྦྱིན་བྱེད་བཞིན་པ།
ཉེ་ཆར། ཧུང་ཡོན་རྫོང་ཨ་མཆོག་སློབ་ཆུང་གི་སློབ་གཙོ་འཇམ་དཔལ་སྐྱབས་ཀྱིས་འབྲོག་ཁུལ་སློབ་མར་སློབ་ཕྱིའི་བལྟ་ཀློག་དཔེ་ཆ་ཉུང་བ་དང་འཚོ་བའི་རྒྱུན་སྤྱོད་མཁོ་ཆས་དཀོན་པའི་དཀའ་ངལ་དག་སེལ་ཆེད། ཁྲི་འདུ་གྲོང་ཁྱེར་གྱི་རང་མོས་དང་བླངས་པའི་རྩ་འཛུགས་ཚོགས་པར་འབྲེལ་གཏུག་བྱས་ཏེ། དཔེ་ཁུག་དང་། དཔེ་ཆ། སྨྱུ་གུ སྟོད་གོས། དགུན་ལྷམ་སོགས་སྒོར་ཁྲི་ལྷག་གི་རིན་ཐང་ཡོད་པའི་སློབ་མའི་རྒྱུན་སྤྱོད་མཁོ་ཆས་སློབ་མའི་ལག་ལ་དངོས་སུ་འབྱོར་བྱུང་བ་དང་། ད་དུང་དང་བླངས་རྩ་འཛུགས་ཚོགས་པ་དེས་གླུ་དབྱངས་སློབ་གསོ་དང་མཛེས་རིས་སློབ་གསོ། བསམ་བློ་ཀུན་སྤྱོད་ཀྱི་སློབ་གསོ་སོགས་སློབ་གསོ་སློབ་ཁྲིད་ཀྱི་ཕུན་སུམ་ཚོགས་པའི་ཉམས་མྱོང་དག་ཨ་མཆོག་སློབ་གྲྭའི་དགེ་རྒན་རྣམས་དང་འབྲེལ་འདྲིས་བརྗེ་རེས་བྱས་པས། སློབ་མ་དང་དགེ་རྒན་ཡོངས་ཀྱི་བསམ་གཞིག་གི་རྒྱ་བསྐྱེད་ཅིང་བརྩོན་སེམས་ལ་ངར་ཤུགས་བསྐྲུན་ཡོད་པ་རེད།
རྒྱུས་ལོན་བྱས་པ་ལྟར་ན། རང་མོས་དང་བླངས་པའི་རྩ་འཛུགས་ཚོགས་པ་འདི་ནི་ཁྲི་འདུ་གྲོང་ཁྱེར་གྱི་བྱམས་བརྩེ་ཅན་གྱི་དགེ་རྒན་དང་ལས་བཟོ་བ་སོགས་ལས་རིགས་ཁག་གི་མི་སྣས་རང་མོས་ངང་རྩ་འཛུགས་བྱས་ནས་འབྲོག་ཁུལ་སློབ་གསོར་རང་ནུས་ཅི་ལྕོག་གིས་རམ་འདེགས་དང་ཆ་རྐྱེན་བསྐྲུན་རྒྱུའི་དམིགས་གཞི་ཡོད་པའི་སྤྱི་ཕན་ཚོགས་པ་ཞིག་ཡིན་པ་རེད།
ཁོ་ཚོས་གནང་སྦྱིན་མཛད་སྒོ་སྤེལ་བའི་རྗེས་སུ། ཁྱིམ་ཚང་གི་ཆ་རྐྱེན་ཧ་ཅང་ཞན་པའི་སློབ་མ12ཀྱི་འཚོ་བར་རྒྱུས་ལོན་ཟབ་མོ་བྱས་ཏེ་རྒྱུན་ཏུ་རོགས་སྐྱོར་རམ་འདེགས་བྱེད་པའི་གྲོས་གཞི་བཏོན་པ་དང་། ཁོ་ཚོས་སྔར་ལས་ལྷག་པར་དང་བླངས་པ་མང་བོར་འབོད་སྐུལ་བྱས་ཏེ་འབྲོག་ཁུལ་གྱི་དོན་དངོས་ཐོག་རོགས་སྐྱོར་རམ་འདེགས་མཁོ་བའི་སློབ་མ་མང་བོར་ཁེ་ཕན་བསྐྲུན་རྒྱུ་ཡིན་ཟེར།
