ཁྲི་ཀ་མི་རིགས་བཅའ་སྡོད་སློབ་གྲྭས་དམའ་འབྲིང་གསུམ་པའི་སློབ་མའི་ཁྱིམ་བདག་ཚོགས་འདུ་བསྡུས་པ།

ལོ་རིམ་དགུ་བའི་མགོ་གཙོ་ཚེ་རིང་རྡོ་རྗེ་ལགས་ཀྱིས་གསུང་བཤད་གནང་བཞིན་པ།

         ཟླ10བའི་ཚེས5ཉིན་གྱི་དུས་ཚོད10སྟེང་དུ། ཁྲི་ཀ་རྫོང་མི་རིགས་བཅའ་སྡོད་སློབ་གྲྭས་ཆེད་དུ་མཐར་ཕྱིན་འཛིན་གྲྭའི་ཕྱོགས་ཡོངས་ཀྱི་སྤུས་ཚད་མཐོར་འདེགས་དང་ལྷག་པར་ཕྱི་ལོའི་ཟླ་དྲུག་པར་འབྲིང་རྒྱུགས་ལ་ཞུགས་དགོས་པའི་སྟ་གོན་ལེགས་པོ་ད་ནས་བཟུང་མགོ་བརྩམ་པ་དང་འཆར་གཞི་འོས་འཚམ། དམིགས་འབེན་གསལ་བོ་ཡོད་པའི་སྒོ་ནས་མ་འོངས་འབྱུང་འགྱུར་གྱི་འགག་སྒོ་དེ་ལས་བདེ་ལེགས་ངང་བརྒལ་བའི་ཇུས་གཞི་ཚོགས་འདུ་དེ་སློབ་གྲྭའི་སྐས་རིམ་ཚོམས་ཆེན་ནས་བསྡུས།

ཕ་བུ་མཉམ་འདུས་ཀྱི་ཁྱིམ་བདག་ཚོགས་འདུའི་ཟུར་ཞིག

         ཐེངས་འདིའི་ཚོགས་འདུ་ཁྱིམ་བདག་རྣམས་ལ་སྟབས་བདེ་དང་གོ་སྐབས་བཟང་བོ་བསྐྲུན་ཆེད་སློབ་གྲྭའི་ཟླ་གནང་ཚར་རྗེས་ཕྱིར་སློབ་གྲྭར་འཚོགས་པའི་དུས་ལ་འཁེལ་བར་བྱས་ནས་བསྡུས་པ་ཡིན་ཞིང་།  ཚོགས་འདུར་ཁྱོན་སྡོམ་ཁྱིམ་བདག་བརྒྱ་དང་ལྔ་བཅུ་ལྷག་འདུས་པ་ལས་གཞན་ལོ་རིམ་དགུ་བའི་འཛིན་བདག་དང་ཁྲིད་སྟོན་པ་ཉེར་ལྔ་ལྷག་ཚོགས་འདུར་ཞུགས།  ལོ་རིམ་དགུ་བའི་མགོ་གཙོ་དགེ་རྒན་ཚེ་རིང་རྡོ་རྗེ་ནས་སློབ་སྐབས་གསར་བའི་གནས་བབ་དང་ད་ལྟའི་སློབ་སྦྱོང་གི་རྣམ་འགྱུར། མ་འོངས་ལོ་རིམ་དགུ་བའི་སྤྱིའི་འཆར་གཞི་དང་དམིགས་ཡུལ། ཁ་ཕྱོགས་སོགས་ཁ་གསལ་དོན་འདུས་སྒོས་དཔེ་དོན་ཟུང་དུ་སྦྱར་ནས་ཁྱིམ་བདག་རྣམ་པའི་སྙན་ལ་ཞུས་ཤིང་། སྔོན་མའི་ལོ་འགའི་རིང་གི་མཐར་ཕྱིན་སློབ་མའི་རྒྱུགས་འཕྲོད་ཚུལ་དང་འབྲིང་རྒྱུགས་ལ་ཕྱོགས་པའི་གྲ་སྒྲིག  སློབ་སྦྱོང་གི་གནས་བབ། སྒྲིག་ལམ་དང་མཐུན་སྒྲིལ་བཅས་དགེ་སློབ་མཉམ་འབྲེལ་གྱི་དཔེ་ལེགས་མིག་དཔེ་རུ་བཟུང་ནས་རྗེས་ཕྱོགས་ཀྱི་དུས་ཚོད་རེ་རེའི་གོ་རིམ་ཁྲོད་དུ་ཕྱོགས་གང་དག་གཙོ་བོར་འཛིན་དགོས་པ་དང་། གནད་གང་དག་ཉན་འཇོག་བྱ་དགོས་པའི་ཐད་ཀྱི་གསུང་བཤད་གལ་ཆེན་གནང་བ་ལས་གཞན། དགེ་རྒན་ཡོངས་ཀྱིས་སློབ་བུ་ཚོའི་སློབ་སྦྱོང་ཁྲོད་མཛུབ་སྟོན་ལེགས་པོ་བྱེད་པ་དང་ཤ་ཚའི་ཟུར་ཁྲིད་ལ་རེམ་པའི་སྐུལ་མ་གནང་བ་རེད། 
         དེར་མ་ཟད་ཁྱིམ་བདག་རྣམ་པས་ཁྱིམ་གྱི་སློབ་གསོ་ཐད་དུ་རེ་བ་ནན་མོ་འདོན་པ་དང་དགེ་རྒན་རྣམས་དང་མཛའ་སེམས་གཅིག་ཏུ་སྦྲེལ་ནས་འབྱུང་འགྱུར་བུ་ཕྲུག་གི་ཆེད་ལ་བསམ་འཆར་ཅི་མཆིས་གསོང་བོར་བརྗོད་པ། ཕན་ཚུན་བར་རྒྱུན་དུ་བསམ་ཚུལ་བརྗེ་རེས་བྱེད་པའི་སྐུལ་སློང་ཡང་ཡང་བྱས། དེར་མཐུད་དགེ་རྒན་འཐུས་ཚབ་དང་སློབ་མའི་འཐུས་ཚབ། ཁྱིམ་བདག་འཐུས་ཚབ་བཅས་རེ་རེ་ནས་རང་རང་གི་འདོད་ཕྱོགས་དང་སེམས་ཀྱི་འཆར་སྒོ་ལྷུག་པོར་བརྗོད་ནས་ཚང་མས་ཁ་སེམས་གཅིག་མཐུན་སྒོས་སློབ་མ་འདི་དག་གི་འབྱུང་འགྱུར་མཚར་སྡུག་འོད་སྟོང་ལྡན་ཞིང་། དམིགས་ཡུལ་ཅི་བཞིན་འགྲུབ་པའི་རེ་སྨོན་བརྗོད་དེ་དོན་སྙིང་གསལ་ལྷང་ངེར་འཆར་ལ་ནུས་པ་བརྒྱ་འགྱུར་ཐོན་སྙམ་པའི་རེབ་འདིའི་ཚོགས་འདུ་ལྷང་ལྷང་མཐེབ་མོའི་རྡེབ་སྒྲའི་ཁྲོད་བདེ་ལེགས་ངང་གྲོལ་བ་རེད།