རྨ་ཆུ་རྫོང་བོད་རིགས་སློབ་འབྲིང་གིས་རང་རྩོམ་གྱེར་འགྲན་གྱི་མཛད་སྒོ་སྤེལ་པ།
སྤོབས་སེམས་ཀྱིས་ཉི་ཟླ་མཁའ་ལ་འདེགས་པའི་སློབ་གྲོགས་བློ་བཟང་བཀྲ་ཤིས།
ཉེ་སྔོན། བསླབ་གཞི་གསར་བའི་བཅོས་བསྒྱུར་དང་བསྟུན་ཏེ་དུས་རབས་གསར་བའི་ལམ་ཆེན་ལ་རྐང་སྟེགས་འཆའ་བཞིན་པའི་དུས་འདིར། འཚོ་བའི་གྲུ་ཟུར་རེ་རེ་དང་དུས་ཀྱི་གོམ་འགྲོས་མྱུར་མོ་ལས་རང་ཉིད་ཀྱི་འཇོན་ཐང་གི་མེ་ཏོག་རེ་རེ་བློ་དང་ཐབས་ཀྱིས་འཐུ་བཞིན་ཡོད་ལ། རྨ་ཆུ་རྫོང་བོད་རིགས་སློབ་འབྲིང་གིས“ཟིལ་ཤུགས་ཀྱིས་འཕྱོ་བའི་རླབས་སྒྲ”ཞེས་པའི་རང་རྩོམ་གྱེར་འགྲན་གྱི་མཛད་སྒོ་སྤེལ་པ་རེད།
སེམས་ཀྱིས་ཚོར་ཤེས་རྣོན་པོས་ཨ་མ་གླེང་བཞིན་པའི་སློབ་གྲོགས་གསང་འདུས་སྐྱབས།
ཐེངས་འདིར་ཡང་མ་གྲོས་རང་མཐུན་སྒོས་གསར་རྩོམ་མཛད་ཅིང་སྙན་པའི་གདངས་དང་སྤོབས་པའི་ཉམས་ཀྱིས་ཕྱུག་པའི་སློབ་གྲོགས་ཉེར་གཅིག་གིས་སྙན་ངག་གི་ཚིག་སྦྱོར་དང་སེམས་ཁོང་གི་དྭངས་གཙང་མཐོ་རུ་བཏེགས་ནས་རྒྱ་ཆེ་བའི་དགེ་སློབ་ཡོངས་ལ་ངོ་མཚར་བའི་འཁྲབ་སྟོན་བྱས་ཏེ་གཅིག་ནས་མི་སྒེར་གྱི་འཇོན་ནུས་དང་གཉིས་ནས་ལོ་རིམ་གྱི་ཟིལ་ཤུགས་ངོམ་ནས། སྙན་ངག་ནི་དུས་རབས་ཀྱི་སྙིང་ཁ་ན་འཕར་ལྡིང་བྱེད་ཀྱིན་པའི་འབོད་སྐུལ་ཅིག་དང་ངག་གི་སྒྱུ་རྩལ་ལས་འཕགས་པའི་སེམས་ཀྱི་ཚོར་བ་མཐོ་ཤོས་དེ་ཡིན་པ་ར་སྤྲོད་བྱས།
དུངས་པའི་འཕྲིན་པ་ཁྲུང་ཁྲུང་ལ་བསྐུར་གྱིན་པའི་སློབ་གྲོགས་ཤེས་ལུ།
དྲན་གདུང་དབྱངས་ལ་འགུག་པའི་སློབ་གྲོགས་ཚེ་རྡོ་སྐྱབས།
བོད་ཀྱི་རིག་གནས་ཉམས་རྒུད་དང་སྙན་ངག་གི་སྲོག་རྩ་གཉོམ་དུ་འགྲོ་བའི་དུས་སྐབས་འདིར། སྙན་ངག་སེམས་ཀྱིས་བྲིས་ཏེ་སྤོབས་པའི་གདངས་ཀྱིས་གྱེར་བ་ནི་ཐུན་མིན་གྱི་ཁྱད་ཆོས་གཙོ་གྲས་སུ་བགྲང་ཆོག་ལ་སློབ་གྲྭ་བཙུགས་ནས་ལོ་འཁོར་སུམ་ཅུ་ལྷག་འགོར་བའི་རིང་གི་སྐབས་དང་པོ་དེ་ཡིན་ཞེས་བཤད་ཀྱང་ཆོག
བར་གསེང་གི་སྣང་བ་གླུ་སྒྲས་སྐྱོམས་པའི་སློབ་རའི་དབྱུག་ལྡེམ་རོལ་མོ་ཚན་སྡེབ།
སློབ་གྲྭའི་བོད་ཡིག་ཁྲིད་དཔྱོད་ཁང་གི་འགོ་གཙོ་རྒན་སྒྲོལ་མ་སྐྱབས་ཀྱིས་བྱ་དགའ་ཨང་དང་པོ་
ཐོབ་པའི་སློབ་གྲོགས་ཕུན་ཚོགས་རྡོ་རྗེ་ལ་བྱ་དགའ་གནང་བཞིན་པ།
གནའ་ནས་ད་ལྟའི་བར་དུ“ལང་ཚོའི་རྦབ་ཆུ”དང“ས་སྒང་སྔས་སུ་བྱས་པའི་སྐར་མ་འོད་ཆེན” “འདི་ནའང་དྲག་ཏུ་མཆོང་ལྡིང་བྱེད་པའི་སྙིང་གསོན་པོ་ཞིག” “ནོར་ནག” “གླག་རྒོད” “གངས་ལྗོངས་ལགས། མ་ཡུམ”སོགས་གཞན་རྩོམ་ཁོ་ན་གྱེར་ཏེ་མི་ཚེ་འདའ་བཞིན་འདུག་ལ་རང་སེམས་གསོ་བཞིན་འདུག དེས་ནི་ང་ཚོ་ནི་ནམ་ཡང་གཞན་གྱི་ཟས་ལྷག་དང་ཚོར་ཤེས་ཙམ་གྱིས་བློ་ཡིད་ཚིམ་སྟེ་མདུན་བསྐྱོད་དང་གསར་གཏོད་ཀྱི་སྒོ་མོ་གཏན་ནས་རྒྱབ་འདུག་པ་ར་སྤྲོད་བྱེད་ཀྱིན་མེད་དམ། ང་ཚོའང་བོང་བུ་མིན་ལ། བ་ལང་མིན། ཧ་པ་ནི་དེ་བས་ཀྱང་མིན་པས་རང་ཉིད་ཀྱི་བློ་གྲོས་དང་ནུས་པ། བསམ་བློ་དང་དབང་ཤེས་ལ་བརྟེན་ཏེ་མདུན་བསྐྱོད་བྱ་རྒྱུ་ནི་ཅི་འདྲའི་གལ་ཆེའང་། དེ་བས་རང་ནུས་ཅི་ལྕོགས་ཀྱིས་ཁ་ཕྱོགས་གསར་བ་ཞིག་འཚོལ་གྱིན་ཡོད་ལ་ཕུགས་བསམ་ཆེན་པོ་ཞིག་ལ་སྙེག་གིན་ཡོད་པས“ཟིལ་ཤུགས་ཀྱིས་འཕྱོ་བའི་རླབས་སྒྲའི”རང་རྩོམ་གྱེར་འགྲན་འདི་ཡང་དེའི་མཚོན་རྟགས་ཤིག་ལས་མ་འདས།
ཐེངས་འདིའི་འགྲན་ལ་ཞུགས་པའི་སློབ་གྲོགས་ཡོངས་ཀྱི་མཉམ་པར།
ཐེངས་འདིའི་རང་རྩོམ་གྱེར་འགྲན་ལ་སློབ་གྲྭའི་བོད་ཡིག་ཁྲིད་དཔྱོད་ཁང་གི་སྙན་ངག་ལ་ཅུང་ཙམ་འདྲིས་ཆ་ཆེ་ཞིང་དགའ་ཞེན་ཡོད་པའི་བོད་ཡིག་དགེ་རྒན་བརྒྱད་ལྷག་ཙམ་གདན་འདྲེན་ཞུས་ཏེ་ཞལ་བདམས་པའི་འགན་ཁུར་ཕྲག་ཏུ་བླངས་ཤིང་དྲང་བདེན་དང་རྒྱུ་འབྲས་ཀྱི་དཔྱད་བསྡུར་ཁྲོད་ནས་སློབ་གྲྭོགས་ཕུན་ཚོགས་རྡོ་རྗེས་བྲིས་ཤིང་གྱེར་བའི“ཡིད་ཀྱི་ཟབ་སར་འདྲིས་པའི་ཐ་སྙད་ཀྱི་ཚོ་ཁག”ལ་བྱ་དགའ་ཨང་དང་པོ་དང་། སློབ་གྲོགས་བློ་བཟང་བཀྲ་ཤིས་དང་བསོད་ནམས་སྒྲོལ་མ་གཉིས་ཀྱིས་སོ་སོར་བྲིས་ཤིང་གྱེར་བའི་སྙན་ངག“འབྲོག་ཀྱི་ལ་བོ”དང“གཙང་ཆབ་སྔོན་མོ”གཉིས་ལ་བྱ་དགའ་ཨང་གཉིས་པ། སློབ་གྲོགས་གསང་འདུས་སྐྱབས་ཀྱིས་གྱེར་འདོན་བྱས་པའི“ཨ་མ”དང་སློབ་གྲོགས་བློ་བཟང་དོན་ཡོད་ཀྱིས་གྱེར་འདོན་པའི“མདོ་སྨད་པ”སློབ་གྲོགས་མཁས་དབང་གིས་གྱེར་འདོན་བྱས་པའི་སྙན་ངག“རླུང་ནང་གི་མར་མེ་ཁེར་འབར”བཅས་ལ་བྱ་དགའ་ཨང་གསུམ་པ། སློབ་གྲོགས་ཤེས་ལུ་དང་ཚེ་རྡོ་སྐྱབས་སོགས་སློབ་གྲོགས་བཞི་ལ་ཕུལ་བྱུང་བྱ་དགའ་གནང་ལ། སྡོམ་པའི་སློབ་གྲོགས་བཅུ་ལ་བྱ་དགའི་དངོས་པོ་གནང་སྟེ་སྐུལ་ལྕག་བྱས་པ་ཡིན།
