དཔལ་ལྡན་ཁྲི་བརྟན་ནོར་བུ་རྩེའི་ལོ་འཁོར་བྲིས་རྒྱུགས་ཆེན་མོ་མཇུག་གྲུབ་པ།

 གཡུང་དྲུང་བོན་གྱི་གདན་ས་ཆེན་མོ་དཔལ་ལྡན་ཁྲི་བརྟན་ནོར་བུ་རྩེ།

            གཡུང་དྲུང་བོན་གྱི་ཆེས་མཐོའི་གཙུག་ལག་སློབ་གཉེར་ཁང་གི་གཞི་རྩའི་སྒྲིག་ལམ་ལྟར་ལོ་རེ་བཞིན་བོད་ཟླ8པའི་ནང་གི་རྩོད་རྒྱུགས་ཆེན་མོ་དང་། བོད་ཟླ10པའི་ནང་གི་ཚད་མ་རིགས་སྒྲ་ཆེན་མོ་དང་། བོད་ཟླ11ནང་གི་བྲིས་རྒྱུགས་ཆེན་མོ་བཅས་ཀྱི་སྒོ་ནས་བཤད་སྒྲུབ་སློབ་གཉེར་བ་རྣམས་ཀྱི་རིགས་ལམ་ལ་སྐུལ་ལྕག་དང་སློབ་སྦྱོང་གོང་འཕེལ་གཏོང་བའི་ཐབས་ལམ་ཇི་དགེ་འདོན་བཞིན་ཡོད་པ་མ་ཟད། ཚོགས་དང་འཆད་རར་ཞུགས་ཚད་དང་། དེ་བཞིན་རིག་གནས་དང་རྩ་གཞུང་འགྲེལ་བ་བཅས་ངག་རྒྱུགས། དཔེ་བརྗོད། ཤོག་ཁྲ་བཅས་དུས་ཐོག་ཏུ་འབུལ་ཐུབ་མིན་བཅས་ཀྱི་སྒོ་ནས་ལོ་རེའི་བརྒྱ་ཆའི་ཚད་གཞིའི་སྟེང་འཛིན་རིམ་གོང་འོག་འཕར་ཆག་གནང་བཞིན་ཡོད་པ་ནི། ཆེས་མཐོའི་སློབ་གླིང་ཁང་གང་ཞིག་གིས་ཤེས་ཡོན་དང་། སློབ་གསོ་གོང་འཕེལ་གཏོང་སྟངས་ཀྱི་ཚད་གཞི་འཛིན་ས་ལྟ་བུ་ཞིག་ཡིན་པ་རེད།
            གཡུང་དྲུང་བོན་གྱི་ཆེས་མཐོའི་གཙུག་ལག་སློབ་གཉེར་ཁང་གི་ཚད་མའི་རིགས་སྒྲ་ཆེན་མོ་དང་རྩོད་རྒྱུགས་ཆེན་མོ་གཉིས་རིམ་བཞིན་ལེགས་གྲུབ་ཟིན་པ་དང་། བྲིས་རྒྱུགས་ཆེན་མོ་འདིར་འཛིན་རིམ13གྱི་རིམ་པ་ལྟར་རྒྱུགས་ཤོག་རྣམས་དཔོན་སློབ་རིན་པོ་ཆེ་དང་སྒྲུབ་མཁན་རིན་པོ་ཆེ་རྣམ་གཉིས་གཙོས་དགེ་རྒན་རྣམ་པས་ཚད་མཐུན་གྱི་སྒོ་ནས་གཏན་འབེབ་གནང་སྟེ།  འདི་ལོའི་ལོ་འཁོར་གྱི་བྲིས་རྒྱུགས་ཆེན་མོ་དེ་ཉིད་ཕྱི་ཟླ2པའི་ཚེས1ཉིན་གྱི་ཞོགས་པར་དབུ་འཛུགས་ཞུས་ཏེ་སྔ་དྲོ་འཛིན་གྲྭ་རྒན་པ་རྣམས་དང་།  ཕྱི་དྲོར་འཛིན་གྲྭ་གཞོན་པ་རྣམས་བྲིས་རྒྱུགས་བཏང་ནས་ཕྱི་དྲོའི་ཆུ་ཚོད5པའི་ཐོག་མཇུག་བསྡུ་ལེགས་གྲུབ་བྱུང་བ་རེད།