༄༅།།ཁྲི་ཀ་རྫོང་མི་རིགས་བཅའ་སྡོད་སློབ་གྲྭས་ཁྱིམ་བདག་ཚོགས་འདུ་བསྡུས།

       སློབ་གྲྭའི་སློབ་གསོ་ཇེ་བཟང་དུ་གཏོང་བར་དགེ་རྒན་དང་སློབ་མ། ཁྱིམ་བདག་བཅས་ནི་ཕྲེང་ཐག་གཅིག་ལ་བརྒྱུས་པའི་ཕྲེང་རྡོག་ཇི་བཞིན་ཕན་ཚུན་གཅིག་ལ་གཅིག་བརྟེན་དུ་གནས་པ་ཞིག་ཡིན། དཔེ་དེ་བཞིན་དུ་ཁྱིམ་ཚང་སློབ་གསོ་དང་སློབ་གྲྭའི་སློབ་གསོ་གཉིས་ཀྱང་ཕན་ཚུན་གཅིག་སྟེང་གཅིག་གིས་སྐྱོར་རྒྱུ་ནི་ད་ལྟའི་ཆར་སློབ་མའི་ཕྱོགས་ཡོངས་ཀྱི་ནུས་པ་ཇེ་མཐོ་རུ་འགྲོ་བའི་རྨང་གཞིའོ།།
       ཁྲི་ཀ་རྫོང་མི་རིགས་བཅའ་སྡོད་སློབ་གྲྭས་ཀྱང་གནས་ཚུལ་དེར་དམིགས་ཏེ་སྤྱི་ཟླ12པའི་ཚེས2ཉིན་མཐར་ཕྱིན་ལོ་རིམ་དགུ་བའི་གནས་བབ་ལ་སྤྱི་སྡོམ་བྱས་ཤིང་འབྲིང་རྒྱུགས་ལ་ཁ་ཕྱོགས་པར་འབད་འབུངས་བྱེད་དགོས་པའི་སྐུལ་སློང་ཚོགས་འདུ་བསྡུས་པ་དང་ལོ་རིམ་གཞན་དག་གིས་ཀྱང་འཛིན་གྲྭ་སོ་སོའི་ངོས་ཐད་ནས་དཀྱིལ་རྒྱུགས་ཀྱི་བྱ་བར་ཕྱིར་ལྟོས་དང་མིག་སྔའི་གནས་བབ་ལ་གསེད་འགྲོལ་སྒོས་ཁྱིམ་བདག་དང་དགེ་རྒན། སློབ་གྲོགས་རྣམས་སློབ་ཁང་གཅིག་ལ་མཉམ་དུ་འཛོམས་ནས་དོན་སྙིང་ལྡན་པའི་ཚོགས་འདུ་ཐེངས་ཤིག་བསྡུས།
       ཚོགས་ཐོག་ཏུ་ཐོག་མར་སློབ་གཙོ་མཆོག་རིས་ལགས་ཀྱིས་ལོ་རིམ་དགུ་བའི་མཐར་ཕྱིན་སློབ་མ་རྣམས་ལ་རང་གི་སྲོག་ལ་གཅེས་པ་བཞིན་དུ་དུས་ཚོད་ལ་དམ་འཛིན་བྱེད་དགོས་པ་དང་། ཁྱིམ་བདག་ཚོས་སློབ་གྲྭའི་བྱ་བར་རྒྱབ་སྐྱོར་བྱས་ཏེ་གུང་གསེང་གི་སྐབས་སུ་སློབ་མའི་འགྲོ་འདུག་སྤྱོད་གསུམ་ལ་དག་ཐེར་དང་སློབ་གསོ་ཡག་པོ་བརྒྱབ་ནས་གུང་གསེང་ལས་བྱ་ལེགས་པོར་སྒྲུབ་དགོས་ཤིང་། བསླབ་ཁག་ཐམས་ཅད་ལ་ཕྱོགས་རིས་མེད་པར་སྦྱང་བརྩོན་བྱས་ཏེ་མཐར་མཇུག་རང་གི་ཕ་མ་ལ་སྐར་འབྲས་ལེགས་པོ་ཞིག་གིས་དྲིན་གཟོ་བྱེད་དགོས་པའི་སྐོར་གླེང་བ་རེད།
       དེའི་འཕྲོར་སློབ་གཙོ་གཞོན་པ་ཚེ་རིང་རྡོ་རྗེ་ལགས་ཀྱིས་སྔོན་བྱོན་མཁས་པའི་དཔེ་ལུང་རིགས་གསུམ་གྱིས་ཟུར་བརྒྱན་ཏེ་སྤྱོད་ཡོན་གཉིས་ལྡན་གྱི་སློབ་མ་ཞིག་ལ་ཚང་དགོས་པའི་ཆ་རྐྱེན་དང་། ཁྱིམ་བདག་བཟང་བོ་ཞིག་བྱེད་ན་གནད་གང་དག་ལ་ཡིད་འཇོག་བྱེད་དགོས་པ། དགེ་རྒན་ཚོའི་ཁྲོད་ཀྱི་མི་འདང་བའི་ཆ་དང་ཡོ་བསྲང་བྱེད་དགོས་པའི་སྐོར་སོགས་ཁ་གསལ་དོན་འདུས་སྒོས་གསུངས་པ་རེད། དེར་མཐུད་དེ་འཛིན་བདག་འཐུས་ཚབ་པ་དང་སློབ་མའི་འཐུས་ཚབ་པ། ཁྱིམ་བདག་འཐུབ་ཚབ་པ་བཅས་ཀྱིས་རང་རང་གི་མྱོང་བ་དང་མིག་སྔར་འཕྲད་པའི་དཀའ་ཁག ད་དུང་བཅོས་བསྒྱུར་བྱ་དགོས་པའི་གནད་དོན་སོགས་མ་གསང་མ་སྦས་པར་མངོན་སུམ་འཛེམ་མེད་དུ་ཚོགས་ཞུགས་ཁྱིམ་བདག་ཡོངས་ལ་གདོང་གཏད་དེ་ཤར་མར་གསུངས་པ་མ་ཟད། ཁྱིམ་བདག་ལ་ཤས་དང་སློབ་མ་ལ་ཤས་ཀྱིས་ད་ལྟའི་སྤྱི་ཚོགས་གསར་བའི་སློབ་སྒྲུབ་ཆ་རྐྱེན་ཆེས་ལེགས་པའི་མཐུན་རྐྱེན་འོག་ཏུ་ད་དུང་སྒྲིག་ལམ་ལ་གཏོར་བརླག་དང་སློབ་སྦྱོང་ལ་ཧུར་བརྩོན་མི་བྱེད་པ། གཙང་སྦྲར་དང་དོད་མི་བྱེད་པ། ཁྱིམ་བདག་གིས་སློབ་མར་ཁ་ཏ་སློབ་གསོ་མི་གཏོང་བར་དཀྲུག་ཤིང་དང་སློབ་སྦྱོང་ལ་བར་ཆད་བཟོ་བའི་ཐ་ཤལ་གྱི་སྤྱོད་ངན་ལ་དགག་པ་བརྒྱབ་སྟེ་དུས་རབས་དང་སྤྱི་ཚོགས་གསར་བར་མཐུན་པའི་སློབ་མ་འཇོན་ཐང་ཅན་ཞིག་སྐྱེད་སྲིང་བྱེད་དགོས་ན་དཔེ་ཐོག་ཤེས་བྱ་ཁོ་ནས་མི་ཆོག་པར་སྒྱུ་རྩལ་དང་ལུས་རྩལ། མཛེས་རྩལ་སོགས་སྒོ་ཀུན་ལ་སྦྱང་བ་བྱེད་དགོས་པར་ནན་སྐུལ་བྱས། ཕྱིས་སུ་འཛིན་གྲྭ་སོ་སོའི་འཛིན་བདག་གིས་སློབ་གྲྭ་སྤྱིའི་གནས་ཚུལ་དང་། འཛིན་གྲྭའི་གནས་ཚུལ། སློབ་མའི་འཚོ་བ།  སློབ་མའི་རྒྱུགས་འབྲས་དང་ལས་བྱ་འགྲེམ་སྟོན་བགྱིས་པ་མ་ཟད། སློབ་མ་རེ་རེའི་སློབ་སྦྱོང་དང་སྒྲིག་ལམ། གཙང་སྦྲ་བཅས་ལ་ཕྱོགས་ཡོངས་ནས་སྤྱི་སྡོམ་བྱས་པའི་ཁར། ཁྱིམ་བདག་རྣམ་པར་རེ་བ་དང་བསམ་འཆར་བརྗོད་དེ་མངོན་ལྐོག་བྲལ་བར་ཕན་ཚུན་བསམ་བློ་བརྗེ་རེས་བྱས་ཤིང་སློབ་གྲྭ་དང་དགེ་རྒན་དག་ལ་བསམ་འཆར་ག་འདྲ་ཡོད་པའི་ཐད་དུ་བསམ་འཆར་ཡི་གེ་འབྲི་རུ་བཅུག་སྟེ2019ལོའི་ཁྱིམ་བདག་ཚོགས་འདུ་དོན་སྒོ་འཁྱོངས་པ་ཞིག་ཚོགས་ཐུབ་པ་བྱུང་ངོ་།།