༄༅།།མཚོ་སྔོན་པོ་དྲ་བའི་ལྕགས་ཕོ་བྱི་ལོའི་ལོ་སར་ཤིས་ཚིག་ལ།

ལྕགས་ཕོ་བྱི་ལོའི་གནམ་ལོ་གསར་བར་སླེབས་ལ་ཉེ་བའི་སྐབས་འདིར། གུས་པོ་འཕྲིན་གཏོང་བ་ཕལ་བ་ཞིག་གི་ངོས་ཐད་ནས་མཚོ་སྔོན་པོ་དྲ་བའི་རྩོམ་སྒྲིག་པ་ཡོངས་ཀྱི་སྐུ་གཟུགས་གསལ་ཐང་དང་། བྱ་བ་ཡར་ལྡན། འཚོ་བ་བདེ་སྐྱིད་ལྡན་པའི་སྨོན་འདུན་དང་ཆབས་ཅིག འདས་སོང་གི་གཡུར་ཟའི་འབྲས་བུ་ལ་ལག་ཟུང་སྙིམ་པ་བྲང་ཁར་གཏད་དེ་ཡི་རང་དགའ་གུས་ཞུས་པ་ཡིན་ཞིང་། མ་འོངས་འབྱུང་འགྱུར་ལ་མུ་མཐུད་དུ་རྒྱལ་ཁབ་ཕྱི་ནང་ཀུན་དང་བོད་ཁུལ་གྱི་ས་ཆ་སོ་སོའི་ཆབ་དཔལ་རིག་གསུམ་གྱི་གསར་བྱུང་དོན་བྱ་མཐའ་དག་ཆ་འཕྲིན་གྱི་སྐུད་མེད་གློག་རླབས་བརྒྱུད་དེ་གོ་ལ་ཧྲིལ་བོ་དང་ཡུལ་གྲུ་སོ་སོར་ཁྱབ་རྒྱ་ཆེ་རུ་བཏང་སྟེ་བསམ་བློའི་རྒྱགས་ཕྱེ་གྱ་ནོམ་པ་དང་། རིག་གནས་ཀྱི་གན་མཛོད་ཇེ་ཕྱུག་ཏུ་གཏོང་བའི་རེ་འདུན་ཞུ་རྒྱུ་ལགས། སླད་མར་ཡང་མཚོ་སྔོན་པོ་དྲ་བ་དང་མཚོ་སྔོན་པོ་ཟིན་བྲིས། ཡོངས་འཛིན་འཚོལ་བཤེར་མ་ལག་སོགས་རིག་གཞུང་གི་ཆུ་གཏེར་ཆེན་པོ་ལྟ་བུའི་དྲ་བའི་ཁྱད་ནུས་མུ་མཐུད་དུ་འཐུས་སྒོ་ཕུན་ཚོགས་སུ་བཏང་སྟེ་བོད་རང་གི་ཐུན་མིན་གྱི་ཁྱད་ཆོས་སྲོག་ཤིང་དུ་འཛིན་པའི་སྟེང་དུས་རབས་གསར་བའི་གསར་གཏོད་ཀྱིས་ཟུར་བརྒྱན་ཏེ་རྒྱ་ཆེའི་ལྟ་མཁན་རྣམ་པའི་ཡིད་ཀྱི་བརྟན་པ་ཅིག་ཅར་དུ་འཕྲོག་ཅིང་། འདོད་པའི་བློ་ཡིད་བཅོས་མིན་དུ་སྐོང་ཐུབ་པའི་སྡིངས་ཆ་ལེགས་ཤོས་ཤིག་ཏུ་འགྱུར་བར་བཀྲ་ཤིས་སྨོན་འདུན་ཞུའོ།།