༄༅།།གུང་ཧོ་རྫོང་མི་རིགས་སློབ་འབྲིང་གི་སློབ་མགོ་རྩོམ་པའི་བརྡ་ཐོ།

རྒྱ་ཆེ་བའི་ཁྱིམ་བདག་དང་སྙིང་ཉེ་བའི་སློབ་གྲོགས་རྣམ་པ།
མི་འགྱངས་པར་སློབ་མགོ་རྩོམ་ལ་ཉེ་བས། གུང་ཧོ་རྫོང་མི་རིགས་སློབ་འབྲིང་གིས་གོང་རིམ་འབྲེལ་ཡོད་སྡེ་ཁག་གི་ཡིག་ཆའི་དགོངས་དོན་ལྟར། པྲོག་དབྱིབས་ནད་དུག་གསར་པའི་ཉེན་ཚབས་རང་བཞིན་ལ་ཡང་དག་པའི་ངོས་འཛིན་དང་། ཚན་རིག་དང་མཐུན་པའི་སྒོ་ནས་འགོག་སྲུང་བྱེད་པ། ལྷག་དོན་ནད་ཡམས་ཅི་རིགས་སློབ་གྲྭའི་ནང་མི་ཡོང་བར་ཁག་ཐེག་བྱ་ཆེད། སློབ་མགོ་རྩོམ་པའི་དུས་ཚོད་དང་ཡིད་འཇོག་བྱ་དགོས་པའི་དོན་ཚན་ཁག་ཅིག་ནན་ཏུར་དུ་བརྗོད་པ་གཤམ་གསལ་ལྟར།
གཅིག སྤྱི་ཟླ3པའི་ཚེས18ཉིན་ལོ་རིམ་དགུ་བ་སྟེ་དམའ་གསུམ་སློབ་མས་འབྱོར་ཐོ་འགོད་པ་དང་། ཚེས19ཉིན་ལོ་རིམ་བརྒྱད་པ་སྟེ་དམའ་གཉིས་སློབ་མས་འབྱོར་ཐོ་འགོད་པ།ཚེས20ཉིན་ལོ་རིམ་བདུན་པ་སྟེ་དམའ་གཅིག་སློབ་མས་འབྱོར་ཐོ་འགོད་རྒྱུར་གཏན་འཁེལ་བྱས་ཡོད།
གཉིས། སློབ་མགོ་མ་བརྩམ་པའི་ཉིན་འདི་དག་ཏུ་སློབ་མར་ཚ་རྒྱག་པ་དང་གློ་ལུ་བྱེད་པ། ཆམ་ནད་ཅན་སོགས་ཡོད་ན་སྔ་ས་ནས་སྨན་བཅོས་བྱས་ཏེ་སངས་དྲག་འབྱུང་དུ་འཇུག་དགོས།
གསུམ། འབྱོར་ཐོ་འགོད་པའི་ཉིན་མོར་ངེས་པར་ཁ་ཐུམ་རྒྱག་དགོས་པ་དང་། སློབ་མ་སྐྱེལ་མཁན་ཁྱིམ་བདག་རྣམས་སློབ་རའི་ནང་རོལ་དུ་ཡོང་མི་ཆོག གལ་ཏེ་ལུས་པོའི་ཚ་དྲོད37℃ལས་བརྒལ་བའི་སློབ་མ་ཡོད་ན་གནས་སྐབས་སུ་འབྱོར་ཐོ་མི་འགོད་པར་ཁྱིམ་དུ་སྡོད་དགོས།
བཞི། འབྱོར་ཐོ་འགོད་པའི་ཉིན་མོར་དགུན་གནང་གི་ལས་བྱ་མ་ལུས་པར་ཁྱེར་ཡོང་དགོས་པ་ལས་གཞན་ལྕོགས་ཚོད་ཀྱིས་གཅིག་སྤྱོད་ཁ་ཐུམ་བཟུང་ཡོང་རྒྱུ་དང་སློབ་མའི་དབྱར་དགུན་ལྭ་དང་སློབ་སྦྱོང་ཡོ་བྱེད་སོགས་མཁོ་ཆས་ཐམས་ཅད་ཚགས་སུ་ཆུད་དུ་བཅུག་ནས་དུས་ལྟར་ཐོན་དགོས།
ལྔ། དགུན་གནང་ལ་ཞིང་ཆེན་གཞན་དུ་སོང་མྱོང་བའི་སློབ་མས་སོ་སོའི་སྡེ་ཁུལ་དང་། སྡེ་དམངས་ཨུ་ཡོན་ལྷན་ཁང་ནས་ཉིན་བཅུ་བཞིའི་ལོགས་བཀར་དུས་ཚོད་ལོངས་པའི་འབྲེལ་ཡོད་བདེན་དཔང་འཁྱེར་ཡོང་དགོས།
དྲུག སློབ་མགོ་བརྩམས་པའི་རྗེས་སུ་སློབ་གྲྭས་བཀག་སྡོམ་དོ་དམ་ལམ་ལུགས་ལག་བསྟར་བྱས་ཏེ། སློབ་མ་སློབ་གྲྭའི་ཕྱི་རོལ་དུ་འགྲོ་བ་དང་ཁྱིམ་བདག་རྣམས་སློབ་གྲྭའི་ནང་རོལ་ཡོང་བ་གཏན་འགོག་བྱ་རྒྱུ་དང་། སློབ་གྲྭའི་ཕྱི་རོལ་གྱི་འབྲེལ་མེད་མི་སྣ་སུ་ཡིན་རུང་སློབ་གྲྭའི་ནང་བཏུད་དུ་མི་འཇུག
བདུན། ཁྱིམ་བདག་ཚོས་རང་ཉིད་ནས་མགོ་བརྩམས་ཏེ་ནད་ཡམས་འགོག་སྲུང་གི་ཤེས་བྱར་སློབ་སྦྱོང་དང་ནད་ཡམས་འགོག་སྲུང་ལས་ཀ་རྒྱུན་འཁྱོངས་བྱས་ཏེ། སློབ་གྲྭའི་བྱ་བར་རྒྱབ་སྐྱོར་དང་ཐུགས་ཁུར་གནང་བའི་རེ་བ་དང་བཅས་སོ།།