༄༅། །གསེར་ཆེན་རྫོང་མི་རིགས་སློབ་འབྲིང་གིས་རྫོང་སློབ་དཔྱོད་ཁང་གིས་སློབ་ཁྲིད་བྱ་བར་རྟོག་ཞིབ་བྱས་པའི་བསམ་འཆར་དང་རིམས་ནད་སྔོན་འགོག་དུས་རིམ་གྱི་འོས་འགན་ལེགས་འགྲུབ་བྱས་པར་སྤྱི་བསྡོམས་ཚོགས་འདུ་བསྡུས།

སློབ་ཁྲིད་ཀྱི་བྱེད་ཐབས་བཅོས་བསྒྱུར་དང་སློབ་མའི་བདེ་ཐང་གི་འཚར་ལོངས་ལ་རང་ནུས་གང་ཡོད་འདོན་རྒྱུ་ནི་དགེ་རྒན་ཞིག་གིས་ངེས་པར་དུ་སྒྲུབ་དགོས་པའི་ལས་དོན་གལ་ཆེན་ཞིག་ཏུ་གྲུབ་ཕྱིར། ང་ཚོས་དུས་དང་རྣམ་པ་ཀུན་ཏུ་རིམས་ནད་སྔོན་འགོག་གི་ལས་འགན་གང་ཡོད་ལེགས་འགྲུབ་བྱས་པའི་རྨང་གཞི་སྟེང་ནས་སློབ་ཁྲིད་ཀྱི་བྱེད་ཐབས་གསར་བ་བེད་སྤྱོད་བྱས་ཏེ་སློབ་མའི་ནུས་པ་སྔོག་འདོན་དང་སློབ་མའི་དགའ་ཕྱོགས་སྐྱེད་སྲིང་། སློབ་མའི་སྤྲོ་སྣང་ཆེར་བསྐྱེད་དང་སློབ་མའི་ཕུགས་འདུན་མངོན་འགྱུར་ཡོངས་ཐབས་ལ་སྔ་ན་མེད་པའི་ཇུས་གཞི་གསར་བ་ཞིག་དང་ཁྲིད་ཐབས་གསར་བ་ཞིག ལག་ལེན་གསར་བ་ཞིག་ལག་བསྟར་བྱེད་དགོས་པ་ནི་སྨོས་མ་དགོས་པ་ཞིག་རེད། ལྷག་པར་དུ་རིམས་ནད་སྔོན་འགོག་གི་ཛ་དྲག་ཆེ་བའི་དུས་སྐབས་སུ་གཅིག་ནས་གོང་རིམ་འབྲེལ་ཡོད་སྡེ་ཁག་གིས་གཏན་འབེབས་བྱས་པའི་བསླབ་གཞིའི་ནང་དོན་གཞིར་བཟུང་ནས་སློབ་ཁྲིད་ཀྱི་བྱ་བཞག་འཐུས་ཚང་སྒོས་འགྲུབ་པར་བྱེད་པ་དང་། གཉིས་ནས་ནད་ཡམས་སྔོན་འགོག་གི་འོས་འགན་ཐམས་ཅད་ཕྱི་བཤོལ་དང་འགོར་འགྱངས་མེད་པའི་སྒོ་ནས་དང་ལེན་བྱས་ཏེ་སློབ་མའི་ལུས་སེམས་བདེ་ཐང་དང་སློབ་གྲྭའི་རྣམ་པ་དྭངས་གཙང་ཅན་དུ་འགྱུར་བར་མ་བསྐུལ་དང་ལེན་གྱིས་བརྩོན་པ་ཐེར་ཆགས་བྱེད་དགོས་པ་མ་ཟད། དགེ་རྒན་རང་སྟེང་གི་མི་ལེགས་པའི་ཞན་ཆ་བཅོས་བསྒྱུར་དང་ལེགས་པའི་ཆ་དག་རྒྱུན་འཁྱོངས་ཀྱིས་སྤྱོད་ཡོན་གཉིས་ལྡན་གྱི་སློབ་མ་ཚད་ལྡན་ཞིག་གསོ་སྐྱོང་བྱེད་པར་ནུས་པ་ཡོད་རྒུ་འདོན་དགོས་པ་རེད། ཁྱད་པར་དུ་རིམས་ནད་སྔོན་འགོག་གི་གནས་བབ་འདིའི་བྱེད་སྒོ་མཐའ་དག་ཕྲ་ཞིང་ཞིབ་པའི་ངང་ནས་གཙིགས་ཆེན་དུ་བཟུང་ནས་དུས་ལྟར་སྒྲུབ་པའི་གཞན་ཕན་གྱི་བསམ་བློའི་འདུ་ཤེས་སྐྱེད་སྲིང་བྱེད་རྒྱུ་ནི་ཤིན་ཏུ་གལ་འགངས་ཆེ་བའི་ལས་དོན་ཞིག་ཏུ་བགྲངས་དགོས་སོ། །
2020ལོའི་ཟླ4ཚེས3ཉིན་གྱི་ཕྱི་དྲོའི་དུས་ཚོད་བཞིའི་སྟེང་། གསེར་ཆེན་རྫོང་མི་རིགས་སློབ་འབྲིང་གིས་རྫོང་སློབ་དཔྱོད་ཁང་གིས་སློབ་ཁྲིད་བྱ་བར་རྟོག་ཞིབ་བྱས་པའི་བསམ་འཆར་དང་རིམས་ནད་སྔོན་འགོག་དུས་རིམ་གྱི་འོས་འགན་ལེགས་འགྲུབ་བྱས་པར་སྤྱི་བསྡོམས་ཀྱི་ཚོགས་འདུ་དེ་སློབ་གྲྭའི་གྲོས་ཚོགས་ཁང་དུ་དུས་ལྟར་བསྡུས་མགོ་ཚུགས་ཤིང་སློབ་གྲྭའི་སློབ་སྟོན་ཁང་གི་ཀྲུའུ་རིན་བཀྲ་ཤིས་མཚོས་ཐེངས་འདིའི་ཚོགས་འདུ་ལ་མདོ་འཛིན་བྱས་པ་རེད། ཚོགས་ཞུགས་པ་ནི་སློབ་གྲྭའི་སློབ་སྤྱི་ཚེ་རིང་དོན་འགྲུབ་གཙོས་སློབ་སྤྱི་གཞོན་པ་བསོད་ནམས་ཚེ་རིང་དང་ཚེ་གཟུངས་སོགས་སྲིད་འཛིན་ཁག་གི་མགོ་ཁྲིད་ཡོངས་དང་ལོ་རིམ་ཁག་གི་སྣེ་ཁྲིད་པ། ད་དུང་འཛིན་བདག་ཐམས་ཅད་ཞུགས་པའི་ཚོགས་འདུ་དེ་རིམ་པ་བཞི་ཡིས་གྲུབ་ཡོད་པ་ཡིན་ལ། རིམ་པ་དང་པོ་ནི་སློབ་གྲྭའི་སློབ་སྟོན་ཁང་གི་ཀྲུའུ་རིམ་བཀྲ་ཤིས་མཚོས་གཏམ་བཤད་སྤེལ་བ་དང་རིམ་པ་གཉིས་པ་ནི་སློབ་སྤྱི་གཞོན་པ་ཚེ་གཟུངས་ལགས་ཀྱིས་གཏམ་བཤད་སྤེལ་བ། རིམ་པ་གསུམ་པ་ནི་སློབ་སྤྱི་གཞོན་པ་བསོད་ནམས་ཚེ་རིང་ལགས་ཀྱིས་གསུངས་བཤད་གནང་བ་དང་རིམ་པ་བཞི་བ་ནི་སློབ་སྤྱི་ཚེ་རིང་དོན་འགྲུབ་ལགས་ཀྱིས་གལ་ཆེ་བའི་གསུངས་བཤད་གནང་བ་བཅས་རེད།
རིམ་པ་དང་པོ། སློབ་གྲྭའི་སློབ་སྟོན་ཁང་གི་ཀྲུའུ་རིན་བཀྲ་ཤིས་མཚོས་རིམ་པ་གསུམ་གྱི་སྟེང་ནས་གཏམ་བཤད་གནང་བ་སྟེ་གཅིག་ནི་ཟླ4ཚེས1ཉིན་གསེར་ཆེན་རྫོང་གི་སློབ་དཔྱོད་ཁང་གི་ཞིབ་དཔྱོད་མི་སྣས་སློབ་གྲྭའི་སློབ་ཁྲིད་གྲ་སྒྲིག་བྱས་པའི་བྱ་བར་ཞིབ་དཔྱོད་བྱས་པ་མ་ཟད། སློབ་ཁྲིད་གྲ་སྒྲིག་ཐད་ཀྱི་ལེགས་པའི་ཆ་དང་མི་ལེགས་པའི་ཆ་སོགས་གནད་དུ་བཟུང་ནས་སློབ་ཁྲིད་ཀྱི་བྱ་བར་བཅོས་བསྒྱུར་བྱེད་དགོས་པའི་སྐོར་གྱི་གནས་ཚུལ་ཁྱབ་བསྒྲགས་བྱས་པ་རེད། གཉིས་ནི་སློབ་སྐབས་འདིའི་སློབ་མགོ་ཚུགས་པ་ནས་བཟུང་དགེ་རྒན་དག་གིས་ལས་བྱར་ཞུ་དག་དང་དཔྱད་གཏམ་འགོད་ལུགས་གཙོ་གནད་དུ་བཟུང་ནས་དུས་ཡུན་གཏན་འཁེལ་མེད་པའི་སྒོ་ནས་སློབ་སྟོན་ཁང་གིས་མི་སྣ་སྒྲིག་འཛུགས་བྱས་ཏེ་ལས་བྱའི་ཁ་གྲངས་དང་མང་ཉུང་། དཀའ་གཙོ་གནད་སོགས་འཐུས་ཚང་དང་དུས་ལྟར་ལེགས་འགྲུབ་བྱེད་མིན་སོགས་ཀྱི་ཞིབ་བཤེར་བྱེད་རྒྱུ་ཡིན་ཚུལ་གྱི་གནས་ཚུལ་སྤྱི་བསྒྲགས་བྱས་པ་རེད། གསུམ་ནི་ལོ་རིམ་བརྒྱད་པའི་བསླབ་གཞི་གཅིག་གྱུར་བྱེད་ཚུལ་སྐོར་དང་འབྲིང་རྒྱུགས་ལེན་སྟངས་ཕྱོགས་ཀྱི་དགོས་ངེས་རང་བཞིན་གྱི་ལས་གཞི་ཕྱོགས་ཡོངས་ནས་ལེགས་འགྲུབ་བྱེད་དགོས་པའི་སྐོར་གྱི་གསུངས་བཤད་གནང་བ་བཅས་སོ། །
རིམ་པ་གཉིས་པ། སློབ་སྤྱི་གཞོན་པ་ཚེ་གཟུངས་ལགས་ཀྱིས་སློབ་མགོ་ཚུགས་པ་ནས་ད་ལྟའི་བར་གྱི་སློབ་ཁྲིད་ཀྱི་གནས་ཚུལ་དང་དགེ་རྒན་གྱི་རྣམ་འགྱུར། སློབ་མའི་སློབ་སྦྱོང་གི་གནས་བབ། སྒྲིག་ལམ་ལག་བསྟར་གྱི་སྣང་ཚུལ་སོགས་གཞིར་བཟུང་ནས་སློབ་སློབ་སྐབས་འདིར་གསར་སྣོན་བྱས་པའི་སློབ་ཁྲིད་བྱེད་ཐབས་སྐོར་གྱི་སྒྲིག་ལམ་གསར་བ་སྤྱི་བསྒྲགས་སྒོས་སློབ་ཁྲིད་ཀྱི་བྱ་བཞག་ཆད་ལྷག་དང་ནོར་འཆུག་མེད་པའི་སྒོ་ནས་ལེགས་འགྲུབ་བྱེད་དགོས་པའི་རེ་བ་བཏོན་པ་རེད། ཁོང་གིས་གསུངས་དོན། མིག་སྔར་གྱི་སློབ་ཁྲིད་ཀྱི་གནས་ཚུལ་ལ་གཞིགས་ཚེ་དགེ་སློབ་ཟུང་གི་ཐད་ནས་ལེགས་དང་མི་ལེགས་པའི་གནད་དོན་མང་པོ་ཞིག་ཡོད་པ་གང་མགྱོགས་ཀྱིས་བཅོས་བསྒྱུར་བྱས་ཏེ་སློབ་ཁྲིད་ཀྱི་ནང་དོན་གཏན་འཁེལ་བྱས་པའི་དུས་ཚོད་ལྟར་སློབ་ཁྲིད་ལ་གྲ་སྒྲིག་བྱེད་པ་དང་སློབ་ཁྲིད་ཀྱི་རྗེས་སུ་མི་ལུས་པ། སློབ་ཁྲིད་ཀྱི་ཡོ་ཆས་བེད་སྤྱོད་གཏོང་དགོས་པ། བསླབ་གཞི་ནང་དོན་དང་སློབ་ཁྲིད་ཀྱི་ནང་དོན་གཅིག་མཚུངས་ཡིན་དགོས་པ། སློབ་ཐུན་རེ་རེར་སློབ་མའི་ཁ་གྲངས་ལེན་པ་དང་སྐར་མ་ལྔའི་དུས་ཡུན་བེད་སྤྱད་དེ་བསམ་བློ་ཀུན་སྤྱོད་སྐོར་གྱི་སློབ་གསོ་གཏོང་བ། གང་འདོད་ཀྱིས་སློབ་ཁྲིད་བརྗེ་རེས་བྱས་མི་ཆོག་པའི་ལམ་ལུགས་གསལ་བསྒྲགས་དང་ཐག་གཅོད་བྱེད་ཐབས་སྐོར་ནས་གསུངས་བཤད་འགངས་ཆེན་གནང་བ་རེད། གཞན་ཡང་ཁོས་ལས་བྱའི་ཁ་གྲངས་གཏན་འཁེལ་བྱེད་ཐབས་སྐོར་ནས་བསླབ་གཞི་ཁག་གི་གནས་ཚུལ་དང་དགེ་རྒན་དག་གི་བསམ་ཚུལ་ལྟར་ཐག་གཅོད་བྱས་པ་མ་ཟད། དགེ་རྒན་གྱིས་སློབ་མའི་ལས་བྱ་དང་སྦྱང་གཞིའི་ལྷན་ཐབས་དག་བཅོས་བྱེད་ཐབས་ཀྱི་ཆ་ནས་རེ་བ་ཆེན་པོ་གཉིས་བཏོན་པ་སྟེ་གཅིག་ནས་དུས་ལྟར་སློབ་མའི་ལས་བྱ་གང་ཡོད་དག་བཅོས་ལེགས་པོ་བྱེད་དགོས། གཉིས་ནས་འགྲིག་མིན་གྱི་བརྡར་གསལ་ཐག་བཅད་དེ་ལས་བྱའི་གནས་ཚུལ་ལྟར་དགེ་རྒན་གྱིས་སློབ་མས་སློབ་སྦྱོང་བྱེད་འདོད་ཀྱི་འདུན་པ་འཕེལ་ནུས་པའི་དཔྱད་གཏམ་འགོད་དགོས་པའི་ཕྱོགས་ནས་ཕྲ་ཞིང་ཞིབ་པོའི་གསུངས་བཤད་གལ་ཆེན་གནང་བ་རེད།
རིམ་པ་གསུམ་པ། སློབ་སྤྱི་གཞོན་པ་བསོད་ནམས་ཚེ་རིང་ལགས་ཀྱིས་ཐེངས་འདིའི་རིམས་ནད་སྔོན་འགོག་གི་ལས་འགན་ལེགས་འགྲུབ་བྱས་པར་སྤྱི་བསྡོམས་དང་མུ་མཐུད་དུ་རིམས་ནད་སྔོན་འགོག་བྱེད་དགོས་པའི་སྐོར་ནས་བླང་བྱ་གལ་ཆེན་གནང་བ་སྟེ་གཅིག་ནི་རིམས་ནད་སྔོན་འགོག་གི་ལུས་བཤེར་ཚ་གྲངས་ཀྱི་གནས་ཚུལ་ཇི་བཞིན་འགོད་པ་ལས་རྫུན་བཟོ་བྱས་མི་ཆོག་པ། གཉིས་ནས་གནང་བ་ཞུས་པའི་སློབ་མའི་གནས་ཚུལ་གསལ་བོར་འགོད་དགོས་པ། གསུམ་ནས་སློབ་མས་དོ་སྣང་བྱེད་དགོས་པའི་རིམས་ནད་སྔོན་འགོག་གི་བྱ་བ་འཐུས་ཚང་ངང་སྒྲུབ་དགོས་པ། བཞི་ནས་སློབ་མར་ལུས་བཤེར་བྱེད་པའི་དུས་ཚོད་དང་བྱེད་མཁན་གྱི་མི་སྣ། ཞིབ་བཤེར་བྱས་པའི་མཇུག་འབྲས་སོགས་དྲང་བདེན་དང་དོན་དངོས་ཀྱིས་ཞུ་འབུལ་བྱེད་དགོས་པ་ལས་འགོར་འགྱངས་དང་བཟོ་བཅོས་བྱས་མི་ཆོག་པའི་སྒྲིག་ལམ་ཁྱབ་བསྒྲགས་བྱས་པ་དང་བསྟུན་ནས་ཐེངས་འདིའི་རིམས་ནད་སྔོན་འགོག་གི་ལས་དོན་ལེགས་འགྲུབ་བྱེད་པའི་ཐད་ལ་སྔ་ན་མེད་པའི་མཐོང་ཆེན་དང་གཟབ་ནན་བྱེད་དགོས་ཚུལ་གྱི་གསུངས་བཤད་ཡང་དག་གནང་བ་རེད།
རིམ་པ་བཞི་པ། སློབ་སྤྱི་ཚེ་རིང་དོན་འགྲུབ་ལགས་ཀྱིས་སློབ་གྲྭས་བཀོད་སྒྲིག་བྱས་པའི་འབྲེལ་ཡོད་ལས་འགན་མཐའ་དག་ལེགས་འགྲུབ་བྱེད་དགོས་པ་གཞིར་བྱས་ནས་སློབ་ཁྲིད་བྱེད་ཐབས་དང་སློབ་མ་གསོ་སྐྱོང་། དགེ་རྒན་གྱི་འདུ་ཤེས་དང་སློབ་སྦྱོང་གི་རྣམ་འགྱུར་བཅས་ཀྱི་ཆ་ནས་བཅོས་བསྒྱུར་དང་རྒྱུན་འཁྱོངས་བྱེད་དགོས་པའི་སྐོར་ནས་རྣམ་དག་གིས་སློབ་སྟོན་གནང་བ་རེད། ཁོང་གིས་ནན་གྱིས་གསུངས་རྒྱུར་ནངས་དགོང་གི་རང་སྦྱོང་བྱེད་པའི་དུས་ཚོད་བེད་སྤྱོད་གང་ལེགས་བྱེད་དགོས་པ་དང་དུས་དང་རྣམ་པ་ཀུན་ཏུ་སློབ་མའི་དོན་དུ་ཡོད་ཚད་བློས་སུ་གཏོང་ཐུབ་པ་དང་སློབ་མའི་ཆེད་དུ་རང་གིས་དཀའ་བ་གང་མྱངས་བཟོད་བསྲན་བྱེད་ནུས་པའི་ཀུན་སློང་རྒྱུན་འཁྱོངས་བྱས་ཏེ་མཐའ་གཅིག་ཏུ་སློབ་མའི་རེ་འདུན་མངོན་གསལ་སྒོས་ཡར་རྒྱས་སུ་གཏོང་བའི་ཐད་ལ་ནུས་པ་གང་ཡོད་འདོན་དགོས་པ་ཡིན་ལ། ཁྱད་པར་དུ་མ་འོངས་པའི་མེས་རྒྱལ་གྱི་བདག་པོར་འགྱུར་སྲིད་པའི་སློབ་མ་ཚོའི་ཕྱིར་དུ་དགེ་རྒན་ཚོས་མ་བསྐུལ་དང་ལེན་གྱིས་སློབ་མའི་བློ་ཁ་དང་འཚམ་པའི་སློབ་ཁྲིད་བཟང་བོ་ཞིག་བྱེད་པར་གདེང་ཚོད་ཡོད་དགོས་པ་མ་ཟད། ཏང་གི་མི་རིགས་སློབ་གསོའི་དགོངས་དོན་གཞིར་བཟུང་ནས་རྒྱལ་གཅེས་རིང་ལུགས་ཀྱི་བསམ་བློ་དར་སྤེལ་དང་མི་རིགས་མཐུན་སྒྲིལ་གྱི་དགོངས་དོན་ལག་ལེན་བྱེད་པའི་ཆ་ལ་དགེ་སློབ་ཡོངས་ཀྱིས་འབད་པ་ཆེར་བསྐྱེད་བྱེད་དགོས་པའི་རེ་འདུན་ནན་མོ་བཏོན་པ་རེད། ཁོང་གིས་གསུངས་རྒྱུར“རང་འགན་དང་ལེན་དང་རང་གི་ལས་དོན་ལ་འགན་ཁུར་བའི་དགེ་རྒན་ཞིག་གིས་དུས་ནམ་ཡང་རང་དོན་ལེགས་འགྲུབ་ཀྱི་ཆ་ནས་དཀའ་ཁག་གང་ལ་འཕྲད་ཀྱང་དུས་ལྟར་ཐག་གཅོད་བཟང་བོ་བྱེད་པ་ལས་འཁང་ར་དང་ལེ་བདའ་གཏན་ནས་བྱེད་མི་སྲིད་དོ། ། ”ཞེས་པ་ལྟར་དགེ་རྒན་རྣམ་པས་ཏང་གི་མི་རིགས་སློབ་གསོའི་ལས་དོན་ལ་བློ་དཀར་ཞིང་ལྷག་བསམ་རྣམ་དག་གིས་སྤྱོད་ཡོན་གཉིས་ལྡན་གྱི་མ་འོངས་པའི་འཇོན་ཐང་ལྡན་པའི་མེས་རྒྱལ་གྱི་བདག་པོ་གསོ་སྐྱོང་བྱེད་པའི་ཐད་ལ་སྔར་ལས་ལྷག་པའི་འབད་པ་ཆེན་པོ་བྱེད་དགོས་པའི་དགོངས་དོན་དྲིལ་བསྒྲགས་བྱས་པ་རེད།
ཐེངས་འདིའི་ཚོགས་འདུ་བསྡུས་པ་བརྒྱུད་ནས་སློབ་གྲྭའི་མགོ་ཁྲིད་དང་དགེ་རྒན་དག་གིས་རྗེས་ཕྱོགས་ཀྱི་སློབ་ཁྲིད་བྱེད་ཐབས་དང་ལས་འགན་ལེགས་འགྲུབ། རང་ནུས་འདོན་ཐབས་བཅས་ཀྱི་ཆ་ལ་སྔ་ན་མེད་པའི་ཡང་དག་གི་ཁ་ཕྱོགས་གསར་བར་འབད་འབུངས་དང་འཆམ་མཐུན་གྱི་སློབ་ར་འཛུགས་སྐྲུན་བྱེད་ཐབས་སོགས་ལ་ཚན་རིག་དང་མཐུན་པའི་ཐབས་ལམ་གསར་བ་འདོན་སྤེལ་བྱེད་པའི་བསམ་བློའི་འཁྱེར་སོ་ལ་རྣམ་དག་གི་མཐུན་རྐྱེན་གང་ལེགས་སྦྱར་བ་རེད།