༄༅༎མཚོ་ལྷོ་ཁུལ་གྱི་མཐོ་རྒྱུགས་ལ་ཞུགས་པའི་སློབ་བུ་དག་དེ་རིང་དངོས་སུ་མཐོ་རྒྱུགས་ལ་ཞུགས།

མཐོ་རྒྱུགས་ལ་ཞུགས་པའི་སློབ་མ་དག་གིས་དུས་ཡུན་རིང་བོར་སྔ་ལངས་འཕྱི་ཉལ་དང་། གཉིད་ཆག་ཟས་བརྗེད་ཀྱིས་དཀའ་སྤྱད་འབད་བརྩོན་བྱས་བྱས་མཐར། དེ་རིང་དངོས་སུ་ཛ་དྲག་གི་མཐོ་རྒྱུགས་ལ་ཞུགས་དགོས་བྱུང་།
ད་ནང་སྔ་མོའི་དུས་ནས་གསེར་ཆེན་རྫོང་སློབ་འབྲིང་གི་སྒོ་ཁར་འདུ་འཛི་ཤིན་ཏུ་ཆེ་སྟེ། སློབ་བུ་རྣམས་གྲལ་དག་པའི་སྒོ་ནས་གཅིག་རྗེས་གཉིས་མཐུད་དུ་ཚ་དྲོད་བླངས་རྗེས་རྒྱུགས་རར་ཞུགས་ཀྱི་ཡོད་པ་དང་། ཁྱིམ་བདག་དག་གིས་ཉེན་ཟོན་ཐིག་གི་ཕྱི་རུ་རེ་སྒུག་དང་འཚབ་འཚུབ་ངང་སློབ་གྲྭའི་ནང་ལ་ཅར་ནས་འདུག 
རྒྱུས་ལོན་པ་ལྟར་ན། གསེར་ཆེན་རྫོང་དུ2020ལོར་མཐོ་རྒྱུགས་ལ་ཞུགས་མཁན་གྱི་སློབ་མ1134དང་རྒྱུགས་ར39ཡོད། ད་ལོའི་མཐོ་རྒྱུགས་ནི་པྲོག་དབྱིབས་ནད་དུག་གསར་བའི་གློ་ནད་སྔོན་འགོག་རྒྱུན་ལྡན་ཅན་གྱི་གནས་ཚུལ་འོག་སྤེལ་བ་དང་། ཡང་གློ་ཚད་རིམས་ནད་འདི་བྱུང་བ་ནས་བཟུང་ཁུལ་ཡོངས་སུ་གཞི་རྒྱ་ཆེས་ཆེ་བའི་རྩ་འཛུགས་ཡོད་པའི་ཐུན་མོང་བྱ་འགུལ་ཞིག་ཡིན་པས། ཁུལ་ཡོངས་ཀྱི་སྡེ་ཁག་སོ་སོས་མཐུན་སྦྱོར་ལ་ཤུགས་སྣོན་དང་། གཟབ་ནན་དང་ཞིབ་ཚགས་ཀྱི་སྒོ་ནས་རིམས་འགོག་དང་རྒྱུགས་ལེན་བདེ་འཇགས་སོགས་ཀྱི་བྱ་བ་ལེགས་པོར་བསྒྲུབ་སྟེ། 2020ལོའི་མཐོ་རྒྱུགས་བདེ་བླག་ངང་ལེན་པར་ཁག་ཐེག་བྱས།
མཐོ་རྒྱུགས་ལེན་པའི་སྐབས་འདིར། རྒྱུགས་ཁུལ་སོ་སོའི་རྒྱུགས་གནས་ལ་སྔོན་དུ་རྒྱུགས་འབྲེལ་མི་སྣའི་བདེ་ཐང་ལྟ་སྐུལ་དོ་དམ་དང་། རིམས་འགོག་དངོས་ཟོག་གྲབས་གསོག་དང་མི་སྣ་སྒྲིག་བཀོད། རྒྱུགས་རར་ཞུགས་པའི་ཚ་དྲོད་ལེན་གནས་སྒྲིག་འཛུགས་དང་གྲབས་སྤྱོད་ལོགས་བཀར་རྒྱུགས་ར། རྒྱུགས་གནས་རྒྱུགས་རར་དུག་སེལ་གཙང་དག རིམས་འགོག་སྦྱོང་བརྡར་སོགས་ཀྱི་བྱ་བར་གཙོ་གནད་དུ་བཟུང་།
རྒྱུགས་ལེན་སློབ་མ་རྣམས་ལ་འགྲིམ་འགྲུལ་ཁོར་ཡུག་དང་རྒྱུགས་ལེན་ཁོར་ཡུག་ལེགས་པོ་ཞིག་བསྐྲུན་པར། ཁུལ་དང་རྫོང་སྤྱི་བདེ་ཉེན་རྟོག་སྡེ་ཁག་གིས་དུས་སྔོན་འཆར་ཇུས་དང་ཚན་རིག་སྒོས་བཀོད་འདོམས་གནང་ལ། ནུས་ཤུགས་ཡོད་རྒུས་མཐོ་རྒྱུགས་བདེ་བླག་ངང་སྤེལ་བར་ཁག་ཐེག་བྱས་ཏེ་འགྲིམ་འགྲུལ་གྱི་སྒྲིག་ལམ་ལེགས་པོས་རྒྱུགས་ལེན་སློབ་མ་རྣམས་ལ་གཡས་གཞོགས་གཡོན་འདེགས་བྱས།
རྒྱུགས་གནས་མཐའ་འཁོར་གྱི་རླངས་འཁོར་གང་འདོད་དུ་འཇོག་པ་དང་། འགུལ་སྤོ་ཚོང་ལས་ཀྱིས་གཞུང་ལམ་བཀག་སྟེ་ལས་གཉེར་བྱེད་པ་སོགས་ཀྱི་བྱ་སྤྱོད་ལ་དག་ཐེར་གཙང་སེལ་བྱེད་པར་ཤུགས་བསྣན་ཏེ། དུས་སྔོན་རྒྱུགས་གནས་མཐའ་འཁོར་གྱི་ཁོར་ཡུག་གཙང་སེལ་སྒོས་གཞུང་ལམ་བདེ་འཇགས་ཀྱིས་བརྒྱུད་པར་ཁག་ཐེག་བྱས།
རྒྱུས་ལོན་པ་ལྟར་ན། མཐོ་རྒྱུགས་སྐབས་སུ། ཉིན་ཧྲིལ་བོར་རྒྱུགས་གནས་སློབ་གྲྭ་སོ་སོའི་མཐའ་འཁོར་སྨི200ནང་དུ་འཛུགས་སྐྲུན་ཨར་ལས་ཀྱི་ལས་དང་ཁང་ནང་སྒྲིག་བཟོ་སོགས་འུར་སྒྲ་སྒྲོག་པའི་བྱ་འགུལ་བཀག་འགོག་བྱས་པ་དང་། མཁར་གྲོང་ཡོངས་སུ་ཤོག་སྦག་རྒྱག་པ་དང་རྔ་རྡུང་རོལ་དཀྲོལ་སོགས་སློབ་མའི་སློབ་སྦྱོང་དང་ངལ་གསོ། རྒྱུགས་ལེན་ལ་ཤུགས་རྐྱེན་ཐེབས་པའི་བྱ་སྤྱོད་བཀག་འགོག་བྱས།