༄༅།།དགེ་རྒན་ཆེན་མོ་སྐལ་ལོ་ལགས་ཀྱིས་མཚོ་ལྷོའི་མཐོ་འབྲིང་བོད་སྐད་ཡིག་དགེ་རྒན་རྣམས་ལ་འཆད་ཁྲིད་གནང་བ།
རྩོམ་པ་པོ།：རིག་བུ་ཟླ་བྷེ།
ཡོང་ཁུངས།：མཚོ་སྔོན་པོ་དྲ་བ།
དུས་ཚོད།：2020-12-17
ཀློག་གྲངས།：
སློབ་གསོ་ནི་མིའི་རིགས་འཕེལ་རྒྱས་ཀྱི་གྲུབ་ཆ་གཙོ་བོ་དེ་ཡིན་ལ། སློབ་གསོའི་རྩ་བའི་དམིགས་འབེན་ནི་སྤྱོད་ཡོན་གཉིས་ལྡན་གྱི་མི་སྣ་གསོ་སྐྱོང་བྱ་བ་དེ་ཡིན། དུས་རབས་འཕེལ་འགྱུར་གྱི་རླུང་རླབས་དགོད་པའི་དེང་གི་དུས་འདིར་སློབ་གསོ་སློབ་ཁྲིད་ཀྱི་བྱ་བ་དེའང་དུས་རབས་དང་མཐུན་པར་ལེགས་བཅོས་སུ་གཏོང་རྒྱུ་ནི་ཁ་ཚ་དགོས་གཏུག་གི་བྱ་བ་ཞིག་ཡིན། དེ་བས་མཚོ་ལྷོ་ཁུལ་སློབ་གསོ་ཅུས་མི་རིགས་སློབ་གསོ་འཕེལ་རྒྱས་ཀྱི་བྱ་བ་གཙོ་གནད་དུ་བཟུང་ཞིང་། དེར་མཐུན་གྱི་སྲིད་ཇུས་དང་ཐབས་ཇུས་རབ་དང་རིམ་པ་དངོས་བསྟར་སྒོས་སློབ་ཁྲིད་བཅོས་བསྒྱུར་གྱི་བྱ་བ་ཤུགས་སྣོན་གང་ལེགས་བགྱི་བཞིན་ཡོད། ཐེངས་འདིར་ཡང་ཁུལ་སློབ་གསོ་ཞིབ་འཇུག་ཁང་གིས་ཡང་དག་པའི་མཛུབ་ཁྲིད་འོག མཚོ་ལྷོ་ཁུལ་མཐོ་འབྲིང་བོད་སྐད་ཡིག་མཚན་ལྡན་དགེ་རྒན་ལས་སྒྲུབ་ཁང་གིས་སྤྱི་ཟླ༡༢ཚེས༡༤ཉིན་མཚོ་སྔོན་ཞིང་ཆེན་སློབ་གསོ་ཐིན་གྱི་ཐད་གཏོགས་ལས་ཁུངས་མཚོ་སྔོན་མི་རིགས་བསླབ་གཞི་རྩོམ་བསྒྱུར་ཁང་གི་དགེ་རྒན་ཆེན་མོ་སྐལ་ལོ་ལགས་གདན་དྲངས་ནས་མཚོ་ལྷོ་ཁུལ་མི་རིགས་མཐོ་འབྲིང་དང་པོ་རུ་ཉིན་གཉིས་ཀྱི་རིང་ལ《མཐོ་འབྲིང་བོད་སྐད་བསླབ་ཚན་ཚད་གཞིའི་དགོངས་དོན་དང་མཐོ་རྒྱུགས་འཕེལ་ཕྱོགས་སྐོར་གླེང་བ》ཞེས་པ་བརྗོད་གཞིར་བྱས་པའི་འཆད་ཁྲིད་ཀྱི་བྱ་འགུལ་སྤེལ། མཚོ་ལྷོ་ཁུལ་གྱི་མི་རིགས་མཐོ་འབྲིང་སོ་སོ་ནས་འབྱོར་བའི་བོད་སྐད་ཡིག་དགེ་རྒན༥༠ལྷག་འཆད་ཁྲིད་ལ་ཞུགས།
ཉིན་དང་པོར་མཐོ་འབྲིང་བོད་སྐད་ཡིག་གི་བསླབ་ཚན་ཚད་གཞིའི་དགོངས་དོན་དང་བསླབ་དེབ་སྒྲིག་སྟངས་དང་འབྲེལ་ནས་སྤྱིར་སྐད་ཡིག་གི་གོ་དོན་དང་། སྐད་ཡིག་བསླབ་ཚན་གྱི་རྩ་བའི་ཁྱད་ཆོས་ཏེ་ལག་ཆའི་རང་བཞིན་དང་མི་ཆོས་རིག་གནས་ཀྱི་རང་བཞིན། དེ་མིན་བསླབ་ཚན་ཚད་གཞིའི་ནང་དོན་དང་ངོ་བོ། དམིགས་ཚད། ཚད་གསུམ་དམིགས་ཚད། སྐད་ཡིག་གི་ངོ་བོ་དང་ཚད་གསུམ་དམིགས་ཚད་ཀྱི་འབྲེལ་བའི་སྐོར་ནས་འཆད་ཁྲིད་གནང་བ་དང་། ཉིན་གཉིས་པར་མཐོ་རྒྱུགས་ཀྱི་བོད་སྐད་ཡིག་གི་རྒྱུགས་མཛོད་འཛུགས་སྐྲུན་དང་འབྲེལ་ནས་རྒྱུགས་ཀྱི་རྩ་དོན་དང་ཁྱབ་ཁོངས། གྲུབ་ཚུལ། རྣམ་པ་སོགས་རེ་རེ་ནས་གཞུང་ལུགས་ཀྱི་ལྟ་གྲུབ་དང་རྒྱལ་ཁབ་ཀྱི་སྲིད་ཇུས། རང་གི་མྱོང་བ་དང་སྦྲགས་ནས་འཆད་ཁྲིད་ཞིབ་རྒྱས་སུ་གནང་བ་དེས་དགེ་རྒན་རྣམས་ལ་རྗེས་ཕྱོགས་ཀྱི་སློབ་ཁྲིད་བྱེད་ཐབས་དང་དཀའ་གཙོ་གནད་འཛིན་ཚུལ། རྒྱུགས་གཞི་བཟོ་ཚུལ་ཐད་ལ་མཛུབ་མོས་རི་སྟོན་གྱི་ཚུལ་དུ་ནུས་པ་མི་དམན་པ་ཐོན་པ་མ་ཟད། བསླབ་ཚན་ཚད་གཞི་ནི་སློབ་ཁྲིད་ཀྱི་སྦྱོར་དངོས་རྗེས་གསུམ་དང་ཁ་འབྲལ་ཐབས་མེད་པའི་ངེས་ཤེས་འདྲོངས་སུ་བཅུག
དགེ་རྒན་ཆེན་མོ་སྐལ་ལོ་ལགས་ནི་སྤྱི་ལོ༡༩༦༦ལོར་མདོ་སྨད་ཁྲི་ཀ་རུ་སྐྱེས་ཤིང་། མཚོ་སྔོན་མི་རིགས་སློབ་ཆེན་སོགས་སུ་འགྲིམས་ནས་སློབ་གཉེར་བྱས། སྤྱི་ལོ༡༩༩༢ལོའི་ཟླ༧པར་བྱ་བའི་ལས་རྐང་དུ་ཞུགས་པ་ནས་ད་ལྟའི་བར་མཚོ་སྔོན་ཞིང་ཆེན་སློབ་གསོ་ཐིན་གྱི་ཐད་གཏོགས་ལས་ཁུངས་མཚོ་སྔོན་མི་རིགས་བསླབ་གཞི་རྩོམ་བསྒྱུར་ལྟེ་གནས་སུ་ཕྱག་ལས་གནང་ཞིང་། ལྗོངས་ཞིང་ལྔའི་སློབ་གྲྭ་ཆུང་འབྲིང་གི་བོད་སྐད་ཡིག་བསླབ་དེབ་དང་ཆ་འཕྲིན་ལག་རྩལ་གྱི་བསླབ་དེབ་རྩོམ་སྒྲིག་གི་འགན་ཁུར། ད་ལྟ་ཞུས་ཆེན་གཞོན་པའི་ལས་ཐོབ་བླངས་ཡོད།
རིག་གཞུང་ཆེད་རྩོམ་ལྔ་ལྷག《བོད་ལྗོངས་སློབ་གསོ》དང《བོད་ཀྱི་སློབ་གསོ》སོགས་སུ་སྤེལ་ཟིན་པ་དང་། 《བོད་ཡིག་རྩིས་འཁོར་གྱི་རྩ་བའི་བཀོལ་སྤྱོད་དང་ལག་ལེན》༼སྟོད་སྨད་ཆ༽མཚོ་སྔོན་མི་རིགས་དཔེ་བསྐྲུན་ཁང་གིས་པར་དུ་བསྐྲུན། ཐེངས་མང་པོར་མཚོ་སྔོན་ཞིང་ཆེན་གྱི་འབྲིང་རྒྱུགས་དང་མཐོ་རྒྱུགས་ཀྱི་བོད་སྐད་ཡིག་གི་རྒྱུགས་གཞི་བཟོ་བའི་ལས་སུ་ཞུགས་ཤིང་། རྒྱལ་ཡོངས་བོད་ཡིག་བསླབ་དེབ་ཞིབ་བཤེར་ལྷན་ཁང་གིས་རྩ་འཛུགས་བྱས་པའི་ཞིབ་བཤེར་གྱི་བྱ་བའི་གྲས་སུ་ཐེངས་གང་མང་ལ་ཞུགས། སློབ་གྲྭ་ཆུང་འབྲིང་གི་བོད་སྐད་ཡིག་གི་བསླབ་དེབ་དང་དགེ་རྒན་གྱི་སྤྱོད་དེབ། སྦྱང་གཞི་ལྷན་ཐབས། དབྱར་དགུན་གནང་གི་ལས་བྱ་སོགས་སྣ་ཁ་བརྒྱ་ལྷག་དང་ཡིག་འབྲུ་ཁྲི༣༠༠ལྷག་མཚོ་སྔོན་མི་རིགས་དཔེ་སྐྲུན་ཁང་གིས་པར་དུ་བསྐྲུན་ཡོད།
སྤྱི་ལོ༢༠༢༠ལོའི་ཟླ༡༢ཚེས༡༦ཉིན།
