༄༅།། མཚོ་ལྷོ་ཁུལ་མི་རིགས་མཐོ་འབྲིང་གསུམ་པས2021ལོའི་སློབ་གྲྭའི་ཏང་སྲིད་དང་སློབ་ཁྲིད་སློབ་གསོའི་བྱ་བའི་སྐུལ་འདེད་ཚོགས་འདུ་བསྡུས།
རྩོམ་པ་པོ།：བསེ་ཐར་འབུམ།
ཡོང་ཁུངས།：མཚོ་སྔོན་པོ་དྲ་བ།
དུས་ཚོད།：2021-03-23
ཀློག་གྲངས།：
༢༠༢༡ལོའི་ཟླ༣པའི་ཚེས༢༠ཉིན་གྱི་ཕྱི་དྲོའི་དུས་ཚོད་གཉིས་དང་ཕྱེད་ཀའི་སྟེང་མཚོ་ལྷོ་ཁུལ་མི་རིགས་མཐོ་འབྲིང་གསུམ་པས2021ལོའི་སློབ་གྲྭའི་ཏང་སྲིད་དང་སློབ་ཁྲིད་སློབ་གསོའི་བྱ་བའི་སྐུལ་འདེད་ཚོགས་འདུ་སློབ་གྲྭའི་ལྔ་ཐོག་ཚོགས་འདུའི་ཁང་དུ་གཟབ་རྒྱས་ངང་འཚོགས་པ་རེད།
ཐེངས་འདིའི་ཚོགས་འདུ་ལ་མཚོ་ལྷོ་ཁུལ་མི་རིགས་མཐོ་འབྲིང་སློབ་གྲྭའི་དགེ་རྒན་ཡོངས་ཞུགས་པ་དང་ཏང་ཨུ་ཧྲུའུ་ཅི། སློབ་གཙོ་བསོད་ནམས་རྡོ་རྗེ་ལགས་ནས་མདོ་འཛིན་གནང་བ་དང་། ཚོགས་འདུའི་གོ་རིམ་གསུམ་དུ་བགར་ཏེ་གཟབ་རྒྱས་ངང་དུས་ལྟར་འཚོགས།
གོ་རིམ་དང་པོར་སློབ་གྲྭའི་ཏང་ཨུ་ཧྲུའུ་ཅི་གཞོན་པ་ཚེ་རིང་བསམ་འགྲུབ་ལགས་ནས་ཐོག་མར་ལོ་སྔོན་མའི་སློབ་གྲྭའི་ཏང་སྲིད་བྱ་བར་སྤྱི་བསྡོམས་གནང་བ་སྟེ། ༢༠༢༠ལོར་སློབ་གྲྭའི་དགེ་བཟོ་བ་ཡོངས་ཀྱིས་ཏང་གི་ལས་དོན་ལ་འགོ་ཁྲིད་བྱེད་པར་རྒྱུན་འཁྱོངས་བྱས་ཏེ། ཆབ་སྲིད་ཀྱི་ཐག་གཅོད་ནུས་ཤུགས་དང་གོ་རྟོགས་ཀྱི་ནུས་པ། ལག་བསྟར་ནུས་པ་སོགས་མཐོར་འདེགས་བྱས་ནས། ཞི་ཅིན་ཕིང་གི་དུས་རབས་གསར་བའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་མཐའ་འཁྱོངས་གནངས་ཏེ་སློབ་གྲྭའི་བྱ་བ་ཕྱོགས་ཡོངས་ནས་གྲུབ་འབྲས་འབུར་ཐོན་བླངས་པ་དོན་ཚན་བཞི་རུ་བགར་ནས་གདེང་འཇོག་གནང་བ་མ་ཟད། གནས་པའི་གནད་དོན་གསལ་འདོན་དང་མ་འོངས་ཁ་ཕྱོགས་གསལ་སྟོན་གནངས། གཉིས་པ། ༢༠༢༡ལོའི་སློབ་གྲྭ་འཕེལ་རྒྱས་ཀྱི་དམིགས་འབེན་ལས་འགན་དང་གཙོ་གནད་བྱ་བར་བཀོད་སྒྲིག་གནང་བ་སྟེ། ༢༠༢༡ལོ་ནི་ལོ་ལྔའི་འཆར་གཞི་བཅུ་བཞི་བ་ལག་བསྟར་དང་དེང་རབས་ཅན་གྱི་སྤྱི་ཚོགས་རིང་ལུགས་འཛུགས་སྐྲུན་འགོ་རྩོམ་པའི་ལོ་ཕུད། ཏང་བཙུགས་ནས་ལོ་འཁོར་བརྒྱ་ལོན་པའི་ལོ་ཡིན་པས། ང་ཚོ་དགེ་བཟོ་བ་ཡོངས་ཀྱིས་ཀྲུང་དབྱང་། ཞིང་ཆེན་དང་ཁུལ་སྲིད་གཞུང་། ཁུལ་སློབ་གསོ་ཅུའི་རེ་བཀོད་ལག་བསྟར་མཐའ་འཁྱོལ་དང་མིག་སྔའི་གནས་ཚུལ་དངོས་ལ་དམིགས་ནས་ཀུན་སྤྱོད་སློབ་གསོ་དང་སློབ་རའི་བདེ་འཇགས། སློབ་གྲྭའི་སྒྲིག་སྲོལ་སོགས་ནན་ནན་ཏིག་ཏིག་གིས་བསྒྲུབ་དགོས་པའི་བྱ་བ་དོན་ཚན་ཆེ་བ་གསུམ་དང་ཆུང་བ་བཅུ་རུ་བགར་ནས༢༠༢༡ལོའི་སློབ་གྲྭའི་ཏང་སྲིད་བྱ་བ་བཀོད་སྒྲིག་གནངས། གསུམ་པ། སློབ་གྲྭའི་དགེ་རྒན་གྱི་ཀུན་སྤྱོད་འཛུགས་སྐྲུན་ཚད་འཛིན་སྲོལ་ཡིག་སྟེ་དོན་ཚན་ཉེར་གཅིག་ཅན་ཁྱབ་བསྒྲགས་གནངས་སོ།།
གོ་རིམ་གཉིས་པར་རང་རེའི་སློབ་གྲྭའི་སློབ་སྟོན་སློབ་གཙོ་གཞོན་པ་དགྲ་འདུལ་རྒྱལ་ལགས་ནས་ལོ་སྔོན་མའི་སློབ་ཁྲིད་སློབ་གསོའི་བྱ་བར་སྤྱི་སྡོམ་དང་གནས་པའི་གནད་དོན་གསལ་འདོན་གནང་སྟེ། ༢༠༢༡ལོའི་སློབ་ཁྲིད་སློབ་གསོའི་བྱ་བའི་དམིགས་ཚད་གཏན་འབེན་དང་བཀོད་སྒྲིག སློབ་སྒྲུབ་ཀྱི་སྒྲིག་གཞི་གསར་བའམ་སྒྲིག་སྲོལ་གསར་བ་གསལ་བསྒྲགས་གནངས་པ་མ་ཟད། སློབ་ཁྲིད་སློབ་གསོའི་དོ་དམ་ལ་ཤུགས་བསྣན་ཏེ་སློབ་སྒྲུབ་ཀྱི་ཚད་གཞི་མཐོར་འདེགས་གཏོང་བར་དོན་ཚན་བཅུ་གཉིས་དང་ཆ་འཕྲིན་ལག་རྩལ་ཁྱབ་སྤེལ་བཏང་སྟེ་སློབ་ཁྲིད་སྤུས་ཚད་མཐོར་འདེགས་གཏོང་བའི་སྐོར་ནས་དོན་ཚན་ལྔ། ཚོད་ལྟའི་ལག་ལེན་ལ་ཤུགས་བསྣན་ཏེ་ཕྱོགས་ཡོངས་ནས་རྩིས་ཚན་རིགས་ཀྱི་སྤུས་ཚད་མཐོར་འདེགས་གཏོང་བའི་སྐོར་ནས་དོན་ཚན་གསུམ་སྟེ་ཞིབ་ཅིང་གསལ་བའི་སྒོ་ནས་འདས་མ་ད་གསུམ་གྱི་བྱ་བར་སྤྱི་སྡོམ་དང་གདེང་འཇོག བཀོད་སྒྲིག འཆར་འགོད་གནངས་སོ།།
གོ་རིམ་གསུམ་པར་སློབ་གྲྭའི་སློབ་གཙོ་བསོད་ནམས་རྡོ་རྗེ་ལགས་ཀྱིས་གཅིག་ནས་ཉེ་ཆར་ཞིང་ཆེན་དང་ཁུལ་སྲིད་གཞུང་། ཁུལ་སློབ་གསོ་ཅུའུའི་བསྡུས་པའི་ཚོགས་འདུའི་ཡིག་ཆའི་དགོངས་དོན་བརྒྱུད་བསྒྲགས་བྱས་ཤིང་ཡིག་ཆའི་དགོངས་དོན་ལྟར་ལག་ལེན་མཐར་ཕྱིན་བྱེད་དགོས་པའི་རེ་བ་བཏོན་པ། གཉིས་ནས་༢༠༢༡ལོའི་སློབ་གྲྭའི་བྱ་བར་འཆར་བཀོད་ལྟར་ཏང་སྲིད་དང་སློབ་ཁྲིད་སློབ་གསོ་དོ་དམ་གྱི་འགན་འཛིན་པ་དག་ལ་རེ་བ་གལ་ཆེན་བཏོན་ཏེ་འོས་འགན་དུས་ལྟར་ལེགས་འགྲུབ་བྱེད་དགོས་པའི་རེ་བ་བཏོན་པ་རེད། གསུམ་ནས་དགེ་རྒན་དག་ལ༢༠༢༡ལོའི་སློབ་གྲྭའི་ཏང་སྲིད་དང་སློབ་ཁྲིད་སློབ་གསོའི་བྱ་བའི་འཆར་གཞི་དང་དམིགས་འབེན་ངེས་པར་དུ་ལེགས་འགྲུབ་བྱ་དགོས་པའི་རེ་བ་ནན་མོ་བཏོན། ལྷག་པར་དུ་མིག་སྔའི་རང་རེའི་སློབ་གྲྭའི་གནས་ཚུལ་དངོས་ལ་དམིགས་ནས་དགེ་རྒན་གྱི་ལས་འགན་དང་སྤྱོད་ལམ་སོགས་ཀྱི་ཐད་ནས་ཡང་རེ་བ་ནན་མོ་བཏོན་ཏེ་རྒྱུ་འབྲས་ལ་རྩིས་སྲུང་དང་ཁ་བཤད་དོན་ལ་གནས་པ། སྤྱིའི་བདེ་སྡུག་ལ་འགན་ཁུར་བ། དབུ་མའི་རང་ཚུགས་མི་བོར། བྱམས་བརྩེའི་རང་མདངས་མི་ཡལ་བའི་རྒྱལ་ཁབ་དང་མི་རིགས། ཁྱིམ་བདག སློབ་མ་སོགས་ལ་རྩིས་འཕྲོད་པའི་མི་དམངས་དགེ་རྒན་ཚད་ལྡན་ཞིག་བྱ་དགོས་ཞེས་རེ་བཞག་གི་ས་བོན་གཏོར་ཏེ་མཐོ་འབྲིང་གསུམ་པའི་འཕེལ་རྒྱས་ཀྱི་བཞུད་ལམ་ཁྲོད་ནས་འགེག་རྡོ་དང་ཉེས་ཅན་དུ་མི་གྱུར་བར་ལོ་རྒྱུས་ཀྱི་གཟི་བསོད་དུ་འགྱུར་བའི་སྨོན་འདུན་དང་བཅས་ཐེངས་འདིའི་ཚོགས་འདུ་གཟབ་རྒྱས་ངང་འཚོགས་ཤིང་རྒྱལ་ཁའི་ངང་མཇུག་བསྡུས་སོ།།
