མཚོ་ལྷོ་ཁུལ་གྱི་བོད་རྒྱ་གཞུང་ཡིག་ལོ་ཙཱའི་རྐང་འཛིན་གསོ་སྦྱོང་འཛིན་གྲྭ་བསྡུས་པ།

སྤྱི་ཟླ9བའི་ཚེས22ཉིན་གྱི་སྔ་དྲོར། མཚོ་ལྷོ་ཁུལ་མི་རིགས་སྐད་ཡིག་བྱ་བའི་ལྟེ་གནས་ཀྱིས་བསྒྲུབས་པའི་མཚོ་ལྷོ་ཁུལ་གྱི་བོད་རྒྱ་གཞུང་ཡིག་ལོ་ཙཱའི་རྐང་འཛིན་གསོ་སྦྱོང་འཛིན་གྲྭ་དེ་ཁུལ་ཡོངས་འཛིན་སྐྱོང་སྤེལ་རྟེན་གཞིའི་སུམ་ཐོག་རིག་གཞུང་སྙན་ཞུ་ཚོམས་ཆེན་དུ་བསྡུས་ཤིང་། ཁུལ་མི་རིགས་སྐད་ཡིག་བྱ་བའི་ལྟེ་གནས་ཀྱི་འགྱུར་ཞུས་གཞོན་པ་ལྷ་འབྲུག་རྒྱལ་གྱིས་མདོ་འཛིན་མཛད་པ་དང་ཁུལ་མི་རིགས་སྐད་ཡིག་བྱ་བའི་ལྟེ་གནས་ཀྱི་ཀྲུའུ་རེན་སྙིང་བྱམས་རྒྱལ་གྱིས་གཏམ་བཤད་གནང་།
ཐེངས་འདིའི་གསོ་སྦྱོང་ནི་སྤྱི་ཟླ9བའི་ཚེས22ནས་ཚེས26བར་དུས་ཡུན་ཉིན5ལ་བསྡུས་པ་ཡིན་ཞིང་། གསོ་སྦྱོང་ལ་ཞུགས་མཁན་གྱི་ལོ་ཙཱའི་རྐང་འཛིན་པ50ནི་ཁུལ་ཡོངས་ཀྱི་རྫོང་སོ་སོའི་མི་རིགས་སྐད་ཡིག་བྱ་བའི་ལྟེ་གནས་དང་། ཁུལ་རྒྱང་སྒྲོག་བརྙན་འཕྲིན་ཁང་། ཁུལ་བོད་ཡིག་ཆ་འཕྲིན་ལག་རྩལ་ཞིབ་འཇུག་ལྟེ་གནས། མཚོ་ལྷོའི་ཚགས་པར་ཁང་། སྲིད་ཁྲིམས་སྡེ་ཁག དེ་མིན་རྫོང་སོ་སོ་དང་ཤང་གྲོང་གི་འབྲེལ་ཡོད་སྡེ་ཚན་བཅས་ནས་ཡོང་བ་ཡིན་ཞིང་། མཚོ་སྔོན་ཞིང་ཨུའི་ཏང་གི་སློབ་གྲྭའི་དགེ་རྒན་བསོད་ནམས་དབང་རྒྱལ་དང་། མཚོ་སྔོན་དགེ་ཐོན་སློབ་ཆེན་གྱི་དགེ་རྒན་ཆེན་མོ་སྐལ་བཟང་འབུམ། མཚོ་སྔོན་མི་རིགས་སློབ་ཆེན་གྱི་དགེ་རྒན་ཆེན་མོ་ཚེ་དབང་རྡོ་རྗེ་དང་ཡུལ་ལྷ་ཐར་སོགས་ལོ་ཙཱའི་གཞུང་ལུགས་ལ་ཞིབ་འཇུག་ཅུང་གཏིང་ཟབ་པ་དང་ལོ་ཙཱའི་ཉམས་མྱོང་ཅུང་ཕུན་སུམ་ཚོགས་པའི་དགེ་རྒན་ཆེན་མོ4གདན་འདྲེན་ཞུས་ཏེ་སློབ་ཁྲིད་གནང་བ་ཡིན་ལ། ནང་དོན་གྱི་ཐད་དུ། 《བོད་ཀྱི་སྐད་ཡིག་དང་རྩོམ་རིག་གི་ལོ་རྒྱུས་འཕེལ་རིམ》དང་། 《བོད་ཡིག་ཆ་འཕྲིན་ཅན་གྱི་འཕེལ་རིམ་རགས་ཙམ་གླེང་བ》།《ཀྲུང་དབྱང་མི་རིགས་བྱ་བའི་གྲོས་ཚོགས་ཀྱི་དགོངས་དོན་གསལ་འགྲེལ》།《རྒྱ་བོད་སྒྲ་སྒྱུར་གྱི་ཚད་གཞི་དང་ལག་ལེན་དངོས་ལ་འཇུག་པ》།《བརྡ་ཆད་གསར་བའི་ཆེད་དོན་བགྲོ་གླེང》།《བརྡ་ཆད་གསར་བའི་ལོ་ཙཱའི་རྩ་དོན་དང་ཐབས་ལམ》།《རྩོམ་རིགས་དང་ལོ་ཙཱའི་འབྲེལ་བ་བཤད་པ》སོགས་འདུས་ཤིང་། ཟུར་མི་འདྲ་བའི་སྒོ་ནས་ལོ་ཙཱའི་ཐད་གཏིང་ཟབ་ཏུ་མཚམས་སྦྱོར་གནང་བ་མ་ཟད། དེའི་ལོ་རྒྱུས་འཕེལ་རིམ་གླེང་བ་དང་མཚུངས་སུ་དངོས་ཡོད་ཀྱི་གནད་དོན་བསྟན་པ་དང་། གཞུང་ལུགས་ལ་དོ་སྣང་བྱེད་པའི་མཚུངས་སུ་དངོས་ཡོད་ལ་འབྲེལ་བ་དམ་ཟབ་བྱེད་ལ། རྒྱ་ཆེ་བའི་ལོ་ཙཱའི་རྐང་འཛིན་པ་དག་གི་མིག་རྒྱ་བསྐྱེད་པ་མ་ཟད་ལག་ལེན་གྱི་སྟེང་ནས་ཀྱང་མྱོང་ཚོར་ཟབ་མོ་གནང་།
ཐེངས་འདིའི་གསོ་སྦྱོང་ནི་ལོ་ཙཱའི་སྤུས་ཚད་མཐོར་འདེགས་དང་ལོ་ཙཱའི་དཔུང་སྡེའི་ལས་སྒོ་འཛུགས་སྐྱོང་ལ་ཤུགས་སྣོན།  ལོ་ཙཱའི་དཔུང་སྡེ་ཚད་ལྡན་ཅན་དང་ཆེད་ལས་ཅན་གྱི་ཆུ་ཚད་མཐོར་འདེགས་སུ་གཏོང་བར་དགེ་མཚན་ཆེན་མོ་ལྡན།
ཟླ9བའི་ཚེས22ཉིན་གྱི་ཕྱི་དྲོ་དང་ཚེས23ཉིན་གྱི་སྔ་དྲོར། མཚོ་སྔོན་མི་རིགས་སློབ་ཆེན་གྱི་དགེ་རྒན་ཆེན་མོ་ཡུལ་ལྷ་ཐར་གྱིས《བོད་ཀྱི་སྐད་ཡིག་དང་རྩོམ་རིག་གི་ལོ་རྒྱུས་འཕེལ་རིམ》དང《བོད་ཡིག་ཆ་འཕྲིན་ཅན་གྱི་འཕེལ་རིམ་རགས་ཙམ་གླེང་བ》ཞེས་པའི་ནང་དོན་དང་སྦྱར་ནས་སློབ་ཁྲིད་གནང་བ་ཡིན།