༄༅།།མཚོ་ལྷོ་ཁུལ་གྱིས་སློབ་ཁྲིད་སྤུས་ཚད་དབྱེ་ཞིབ་བགྲོ་གླེང་ཚོགས་འདུ་ཚོགས།

        ཟླ10ཚེས9ཉིན་མཚོ་ལྷོ་ཁུལ་སློབ་གསོ་ཞིབ་འཇུག་ཁང་གིས་རྩ་འཛུགས་བྱས་ཏེ་འབྲིང་རིམ་སློབ་ཞུགས་རྒྱུགས་ལེན་དང་མཐོ་རིམ་སློབ་འབྲིང་གི་སློབ་ཁྲིད་སྤུས་ཚད་ཞིབ་དཔྱད་ཚད་ལེན་གྱི་གྲུབ་འབྲས་དབྱེ་ཞིབ་བྱེད་པའི་སྐོར་གྱི་བགྲོ་གླེང་ཚོགས་འདུ་འཚོགས་པ་རེད། དབྱེ་ཞིབ་བགྲོ་གླེང་ཚོགས་ར་གཙོ་བོ1དང་ཡན་ལག་ཚོགས་ར14ལ་དབྱེ་ཡོད་པ་རེད།
        ཚོགས་འདུའི་ཐོག2021ལོའི་འབྲིང་རྒྱུགས་དང་། དམའ་རིམ་དང་མཐོ་རིམ་སློབ་འབྲིང་གི་སློབ་ཁྲིད་སྤུས་ཚད་ཞིབ་དཔྱད་ཚད་ལེན་གྱི་གཞི་རྩའི་གནས་ཚུལ་ལ་དབྱེ་ཞིབ་བྱས་པ་དང་། 2021ལོའི་མཚོ་ལྷོ་ཁུལ་མཐོ་རིམ་སློབ་འབྲིང་གི་སློབ་བསྡུའི་གནས་ཚུལ་དང་ཁུལ་ཡོངས་ཀྱི་སློབ་ཁྲིད་སྤུས་ཚད་ཞིབ་དཔྱད་ཚད་ལེན་གྱི་སྦྱངས་འབྲས་ཀྱི་གནས་ཚུལ་ལ་དབྱེ་ཞིབ་བྱས་ལ། དེའི་རྗེས་ཀོས་ནན་རྫོང་དང་ཞིན་ཧེ་རྫོང་། གཞན་སློབ་གྲྭ་ཁག་ཀྱི་འགན་འཁུར་བས་སློབ་གསོའི་སློབ་ཁྲིད་ཀྱི་སྤུས་ཚད་མཐོ་རུ་གཏོང་རྒྱུའི་ཐད་ཕན་ཚུན་བགྲོ་གླེང་དང་གཏམ་བཤད་གནང་བ་རེད།         ཚོགས་འདུའི་སྟེང་བསྟན་དོན། ཉེ་བའི་ལོ་ཤས་རིང་རང་ཁུལ་གྱིས་ཞིང་ཆེན་ཡོངས་ཀྱི་སྣེ་ཁྲིད་དེ་འབྲིང་རིམ་སློབ་ཞུགས་རྒྱུགས་ལེན་ལམ་ལུགས་ཀྱི་བསྒྱུར་བཅོས་ལེགས་གྲུབ་བྱུང་བའི་སྔོན་འགྲོའི་ཆ་རྐྱེན་འོག མི་རིགས་སློབ་གྲྭའི་ཕུལ་བྱུང་སློབ་མ་དང་ཚད་གཞི་ལོན་ཚད་མཐོ་རུ་ཕྱིན་པ་དང་། སློབ་གྲྭ་དཀྱུས་མའི་ཚད་གཞི་ལོངས་ཚད་ཇེ་མཐོ་དང་སྐར་མ་དམའ་བའི་སྲིད་ཕྱོད་ཇེ་ཉུང་དུ་འགྲོ་བཞིན་ཡོད་ལ། “མི་རིགས་སློབ་མས་མི་རིགས་སློབ་གྲྭར་རྒྱུགས་སྤྲོད་པའི”དངོས་གཞིའི་ཚན་ཁག་གི་ཚད་གཞི་དེ་ཞིང་ཆེན་ཡོངས་ཀྱི་ཨང་དང་པོར་སླེབས་པ་དང་། སློབ་གྲྭ་དཀྱུས་མའི་དངོས་གཞིའི་ཚན་ཁག་གི་ཚད་གཞི65%ཟིན་པ། ཆིང་ཧྭ་སློབ་ཆེན་དང་། ཀྲེ་ཅང་སློབ་ཆེན། ནན་ཁའེ་སློབ་ཆེན་སོགས་རྒྱལ་ཡོངས་ཀྱི་གཙོ་གནད་སློབ་ཆེན་དུ་རྒྱུགས་འཕྲོད་པའི་སློབ་མ་རྒྱུན་ཆད་མེད་པར་མང་དུ་འགྲོ་བཞིན་ཡོད་པ་དེ་ཁུལ་ཡོངས་ཀྱི་སློབ་གསོ་དང་སློབ་ཁྲིད་ཀྱི་སྤུས་ཚད་བརྟན་པོ་ངང་མཐོ་རུ་འགྲོ་བཞིན་ཡོད་པ་མཚོན།
        གྲོས་ཚོགས་ལས་བསྟན་དོན། རྫོང་ཁག་དང་སློབ་གྲྭ་ཁག་གིས་ཞིབ་བསྡུར་སྐྱོན་བཤེར་དང་རྒྱུ་རྐྱེན་ཁྱོན་ཡོངས་ནས་འཚོལ་ཞིབ་བྱས་ཏེ་སློབ་གྲྭ་ཁག་གི་སློབ་གཙོའི་སྤུས་ཚད་འདུ་ཤེས་དང་སེམས་ཁྲལ་གྱི་འདུ་ཤེས་ཇེ་ཟབ་ཏུ་་གཏོང་བ་དང་། འགན་འཁུར་བ་དང་པོའི་འགན་འཁྲི་ཡག་པོ་སྒྲུབ་པ། དགོས་གཏུགས་ཀྱི་བསམ་པ་དང་འགན་འཁྲིའི་བསམ་པ་སྔར་བས་ཆེ་རུ་གཏོང་བ། དགེ་རྒན་ལ་སྐུལ་ལྕག་དང་སློབ་ཁྲིད་ལ་དོ་དམ། སློབ་ཁང་གི་ལས་ཆོད་དང་སློབ་གཉེར་ཚད་ལྡན་བཅས་ཀྱི་ཐད་ལྷག་པའི་གནད་དོན་ལ་དབྱེ་ཞིབ་གཏིང་ཟབ་བྱེད་པ་བཅས་བྱས་ནས་གནད་དོན་གྱི་འབྱུང་རྩ་བཙལ་ཏེ་བཅོས་སྒྲིག་ནན་ཏན་བྱེད་དགོས་པ། དགེ་རྒན་གྱི་འཇུག་སྒོ་དམ་སྲུང་བྱས་ཏེ་རྒྱལ་ཁབ་ཀྱི་སློབ་ཡོན་མི་དགོས་པའི་དགེ་འོས་སློབ་མ་ཧུར་ཐག་གིས་ནང་འདྲེན་དང་ཕུལ་བྱུང་ཤེས་ལྡན་མི་སྣ་ས་ཁུལ་དང་སློབ་གྲྭར་འདེམས་སྒྲིག་བྱེད་པ། དགེ་རྒན་གྱི་ལས་དོན་ཁང་གི་དཔེ་སྟོན་སྐུལ་ཁྲིད་དམ་འཛིན་བྱེད་པ། ལས་ཐོག་དགེ་རྒན་གྱི་ཕྱོགས་བསྡུས་བྱང་ཚད་མཐོ་རུ་གཏོང་བ། སློབ་སྦྱོང་དང་སློབ་གསོའི་ནུས་པ་ཆེ་རུ་གཏོང་བ། དགེ་རྒན་གྱི་ལས་ཀའི་སྤྱོད་ཚུལ་ཇེ་ལེགས་སུ་གཏོང་བ་ཟམ་མི་ཆད་པར་ཆེ་རུ་གཏོང་བ་བཅས་བྱ་དགོས། ཁུལ་དང་རྫོང་གི་སློབ་དཔྱོད་ལྟ་སྐུལ་མཛུབ་ཁྲིད་སྡེ་ཚན་གྱི་འགན་འཁྲི་འདོན་སྤེལ་གང་ལེགས་བྱས་ནས་སློབ་གསོའི་སློབ་ཁྲིད་ཁྲོད་དུ་ལྷག་པའི་ཉམས་ཞན་ལྷུ་ཚིགས་དུས་ཐོག་ཏུ་ཤེས་རྟོགས་ཐུབ་པ་བྱས་ཏེ། དམིགས་སའི་རང་བཞིན་ཡོད་པའི་སྒོ་ནས་སློབ་ཁྲིད་ཞིབ་འཇུག་ལ་ཤུགས་སྣོན་རྒྱག་པ་དང་ནང་དོན་འཕེལ་རྒྱས་ལ་དམ་འཛིན་བྱེད་དགོས། རིམ་པ་ཁག་གི་སློབ་གྲྭས་རྒྱུན་ལྡན་གྱི་སློབ་ཁྲིད་ཁྲོད་བྱེད་པའི་གནད་དོན་དང་དཀའ་ངལ་ཡོད་པའི་སློབ་གྲྭའི་སློབ་དེབ་ཞིབ་འཇུག་སྒྲིག་སྲོལ་དུས་ཐོག་ཏུ་ཐག་གཅོད་བྱས་ནས་སློབ་ཁྲིད་སྤུས་ཚད་མཐོ་རུ་གཏོང་རྒྱུར་སྐུལ་འདེད་དང་སློབ་གྲྭའི་དོ་དམ་ཚད་ལྡན་དུ་གཏོང་དགོས། “དོ་དམ་ལྔ”དང་སློབ་ཁྲིད་སྤུས་ཚད་དབར་གྱི་འབྲེལ་བ་ཐག་གཅོད་ཡང་དག་བྱས་ནས་ཚད་ཡོད་ཀྱི་དུས་ཚོད་ནང་སློབ་ཁྲིད་སྤུས་ཚད་མཐོ་རུ་གཏོང་དགོས། འགག་རྩ་ནི་སློབ་གྲྭ་སྐྱོང་བའི་དོ་དམ་ཆུ་ཚད་མཐོ་རུ་གཏོང་བ་དང་དགེ་རྒན་གྱི་བྱང་ཚད་མཐོ་རུ་གཏོང་བ། སློབ་ཁང་གི་ལས་ཕྱོད་ཆེ་རུ་གཏོང་བ་བཅས་ཀྱི་ཐད་ལ་ཤུགས་རྒྱག་དགོས། རྫོང་ཁག་དང་སློབ་གྲྭ་ཁག་གིས་མཉམ་དུ་དམ་འཛིན་དང་དོ་དམ་བྱས་ནས་དོན་དངོས་དང་ཟུང་འབྲེལ་བྱས་ཏེ“དོ་དམ་ལྔའི”ལས་དོན་ལ་བརྒྱུད་རིམ་ལྡན་པའི་ངང་སྐུལ་འདེད་གཏིང་ཟབ་གཏོང་དགོས།         ཚོགས་འདུ་ལས་ནན་གྱིས་བསྟན་དོན། རྫོང་ཁག་དང་སློབ་གྲྭ་ཁག་གིས་ཚན་རིག་དང་མཐུན་པའི་སྒོ་ནས་སློབ་གསོའི་སྤུས་ཚད་ལྟ་བ་བརྟན་པོ་བཙུགས་ནས་ཀུན་སྤྱོད་ལ་བརྟེན་ནས་མི་སྣ་གསོ་སྐྱོང་བྱེད་པའི་སློབ་གསོའི་མ་ལག་བཙུགས་ཏེ། སློབ་གསོ་སྒྱུར་བཅོས་ཟམ་མི་ཆད་པར་གཏིང་ཟབ་ཏུ་གཏོང་བ་དང་། ཀུན་སྤྱོད་ལ་བརྟེན་ནས་མི་སྣ་གསོ་སྐྱོང་བྱེད་པའི་དོན་འཁྱོལ་ལམ་སྲོལ་འཐུས་ཚང་དུ་གཏོང་བ། ཕུགས་བསམ་དང་དད་སེམས་ཇེ་བརྟན་དུ་གཏོང་བ། རྒྱལ་གཅེས་རིང་ལུགས་ཀྱི་བརྩེ་སེམས་ཇེ་ཟབ་ཏུ་གཏོང་བ། ཕྱོགས་བསྡུས་བྱང་ཚད་མཐོ་རུ་གཏོང་བ་བཅས་ཀྱི་ཐད་ཤུགས་སྣོན་བརྒྱབ་ནས་མི་རིགས་བསྐྱར་དར་གྱི་འགན་འཁྲི་ལྕི་མོ་འཁུར་བའི་དུས་རབས་ཀྱི་མི་སྣ་གསར་བ་ཞིག་ནུས་ཤུགས་ཡོད་རྒུས་སྐྱེད་སྲིང་བྱེད་དགོས། སློབ་གསོ་སྤེལ་སྟངས་སྔར་བས་ཇེ་ལེགས་སུ་གཏོང་བ་དང་སློབ་ཁྲིད་དོ་དམ་ལས་དོན་གྱི་ལམ་སྲོལ་འཛུགས་སྐྱོང་ལ་ཤུགས་སྣོན་རྒྱག་པ། རིག་ཚན་རྟེན་གཞི་དང་གྲགས་ཅན་ལས་དོན་ཁང་གི་སྐུལ་ཁྲིད་ཁྱབ་འགྱེད་ནུས་པ་འདོན་སྤེལ་གང་ལེགས་བྱེད་པ། སློབ་གསོ་དར་རྒྱས་ཆེ་བའི་ས་ཁུལ་གྱི་ཉམས་མྱོང་དཔྱད་གཞིར་འཛིན་པ། ཆ་འཕྲིན་ལག་རྩལ་དང་སློབ་གསོ་སློབ་ཁྲིད་མཉམ་འདྲེས་བེད་སྤྱོད་ལ་སྐུལ་འདེད་གཏོང་བ། སློབ་ཁང་གི་སློབ་ཁྲིད་ལས་ཕྱོད་ཆེ་རུ་གཏོང་བ། སློབ་གསོ་སློབ་ཁྲིད་ཀྱི་སྤུས་ཚད་ཁྱོན་ཡོངས་ནས་མཐོ་རུ་གཏོང་བ་བཅས་བྱེད་དགོས། སློབ་གྲྭ་རིམ་པ་ཁག་གི་སྤུས་ཚད་དབྱེ་ཞིབ་ཚོགས་འདུ་ཡག་པོ་འཚོགས་ནས་ཞིབ་འཇུག་དང་དབྱེ་ཞིབ་ནན་ཏན་བྱེད་པ་དང་། ཧུར་ཐག་སྒོས་ཉམས་མྱོང་ཕྱོགས་སྡོམ་བྱས་ཏེ་ལྷག་པའི་གནད་དོན་ལ་དབྱེ་ཞིབ་དང་འཚོལ་ཞིབ་བཅས་བྱས་ཏེ་ལག་ལེན་དུ་འཁྱོལ་ཐུབ་པའི་ཇུས་གཞི་བཟོ་བ་དང་། ཐབས་བརྒྱ་ཇུས་སྟོང་ངང་སློབ་གསོའི་སློབ་ཁྲིད་ལས་དོན་ཁྲོད་ལྷག་པའི་གནད་དོན་དང་ལྷུ་ཚིགས་ཞན་སར་ཐག་གཅོད་ཡག་པོ་བྱས་ནས་ཁུལ་ཡོངས་ཀྱི་སློབ་གསོ་ནང་སྙིང་ཅན་དང་སྤུས་ཚད་མཐོ་བའི་འཕེལ་རྒྱས་ལ་ནུས་ཤུགས་ཡོད་རྒུས་སྐུལ་འདེད་བཏང་སྟེ་མི་དམངས་ཡིད་ཚིམ་པའི་སློབ་གསོ་ཡག་པོ་ཞིག་ཧུར་ཐག་སྒོས་གཉེར་དགོས་ཞེས་གསུངས་པ་རེད།