༄༅། །བྲག་དཀར་རྫོང་མི་རིགས་སྐད་ཡིག་བྱ་བའི་ལྟེ་གནས་དང་གནའ་དཔེ་སྲུང་སྐྱོབ།

༄༅། །བྲག་དཀར་རྫོང་མི་རིགས་སྐད་ཡིག་བྱ་བའི་ལྟེ་གནས་ཀྱིས་གནའ་དཔེ་སྲུང་སྐྱོབ་དང་ཉམས་གསོ། སྤྱི་ཚོགས་སྤྱོད་ཡིག་དང་གཞུང་ཡིག་ལོ་ཙཱའི་ཐད་བརྟག་དཔྱད་ཞིབ་འཇུག་དང་སློབ་སྦྱོང་བྱས། ཟླ་10པའི་ཚེས་7ནས་ཚེས་8ཉིན། ངེད་གཞུང་ལས་ཁང་གིས་ཀྲུང་ཧྭའི་སྲོལ་རྒྱུན་རིག་གནས་དར་སྤེལ་གཏོང་བའི་དགོངས་དོན་དང་«མཚོ་སྔོན་ཞིང་ཆེན་གྲངས་ཉུང་མི་རིགས་ཀྱི་གནའ་དཔེའི་ལས་དོན་“2019-2025ལོའི་”འཆར་གཞི་»ལྟར། བོད་ལྗོངས་གནའ་དཔེ་སྲུང་སྐྱོབ་ལྟེ་གནས་ཀྱི་རྒན་པདྨ་བཀྲ་ཤིས་ལགས་དང་ཉེ་བར་བཅར་ཏེ། གནའ་དཔེ་བྲིས་མ་དང་ཤིང་དཔར་མའི་སྲུང་སྐྱོབ་དང་ཉམས་གསོ། ལེགས་སྒྲིག འཚོལ་སྡུད་དང་ཡོངས་བཤེར། སྤྲོད་དེབ་ཀྱི་གལ་ཆེན་རང་བཞིན་བཅས་ཀྱི་སྐོར་ནས་བཅར་འདྲི་དང་ཟིན་བྲིས་བཀོད་དེ་གནའ་དཔེ་སྲུང་སྐྱོབ་ཀྱི་ཤེས་བྱའི་ཐད་བློ་རྒྱ་ཆེན་པོ་བསྐྱེད། གནའ་དཔེ་ཡོངས་བཤེར་དང་ཐོ་འགོད། བེད་སྤྱོད། གླེགས་ཤིང་། གླེགས་ཐག ཆབ་མགོ དཔེ་རས། གདོང་འཛར། དབུ་ཤོག་ལྷ་སྐུ། མཚན་བྱང་། དབུ་ཤོག་ཞལ་ཁེབས། མཛད་བྱང་། ཞབས་མཆན། ནོར་བཅོས་བྱེད་སྟངས་སོགས་ཀྱི་སྐོར་ནས་ཤེས་བྱ་གྱ་ནོམ་པར་སློབ་སྦྱོང་བྱས། ད་ལྟ་པོ་ཏ་ལའི་དཔེ་རྙིང་ཞིབ་འཇུག་ལྟེ་གནས་སུ་ཕྱག་ལས་གནང་བཞིན་པའི་རྒན་པདྨ་བཀྲ་ཤིས་ལགས་དང་བོད་ལྗོངས་གནའ་དཔེ་སྲུང་སྐྱོབ་ལྟེ་གནས་ཀྱི་བཀྲ་ཤིས་དབང་གྲགས་གཉིས་ཀྱིས་ས་ཐག་རིང་པོ་ནས་དཔེ་རྙིང་མྱུར་སྐྱོབ་དང་སྤྱི་ཚོགས་སྤྱོད་ཡིག གཞུང་ཡིག་ལོ་ཙཱ་སོགས་ཀྱི་སྐོར་ནས་བརྟག་དཔྱད་ཞིབ་འཇུག་ཏུ་ཕེབས་པའི་ང་ཚོར་དགའ་བསུ་དང་སློབ་སྦྱོང་གི་སྙིང་སྟོབས་ལ་བསྟོད་བསྔགས་བྱས།