༄༅། །མཚོ་སྔོན་ཞིང་ཆེན་མི་རིགས་སྐད་ཡིག་གཞུང་ཡིག་ལོ་ཙཱའི་གསོ་སྦྱོང་འཛིན་གྲྭ་མཚོ་ལྷོར་བསྡུས།

        ཐེངས་འདིའི་གསོ་སྦྱོང་དེ་སྤྱི་ལོ༢༠༢༡ལོའི་སྤྱི་ཟླ༡༢པའི་ཚེས༩ཉིན་གྱི་སྔ་དྲོར་མཚོ་ལྷོ་ཁུལ་ཡོངས་འཛིན་སྐྱོང་སྤེལ་རྟེན་གཞིའི་སུམ་ཐོག་རིག་གཞུང་སྙན་ཞུའི་ཚོམས་ཆེན་དུ་བསྡུས། མཛད་སྒོའི་སྟེང་མཚོ་ལྷོ་ཁུལ་མི་དམངས་སྲིད་གཞུང་གི་ཁུལ་དཔོན་གཞོན་པ་ཆན་ཀའོ་ཆིན། མཚོ་སྔོན་ཞིང་ཆེན་སྲིད་གཞུང་ཡིག་སྒྱུར་ཁང་གི་ཀྲུའུ་རེན་ཀོང་ཆུས་ཏིག དེ་སྔའི་མཚོ་ལྷོ་ཁུལ་ཨུའི་དྲིལ་སྒྲོག་པུའུ་ཡི་པུའུ་ཀྲང་གཞོན་པ། ཡོངས་འཛིན་འཚོལ་བཤེར་མ་ལག་གི་སྤྱི་ཁྱབ་འགན་འཛིན་པ་ཚེ་ལོ། མཚོ་ལྷོ་ཁུལ་མི་རིགས་སྐད་ཡིག་བྱ་བའི་ལྟེ་གནས་ཀྱི་ཀྲུའུ་རེན་སྙིང་བྱམས་རྒྱལ། མཚོ་བྱང་ཁུལ་མི་རིགས་སྐད་ཡིག་བྱ་བའི་ལྟེ་གནས་ཀྱི་ཀྲུའུ་རེན་རིན་ཆེན་ཚེ་རིང་། མཚོ་སྔོན་ཞིང་ཆེན་མི་རིགས་ལས་དོན་ཨུ་ལྷན་མི་རིགས་སྐད་ཡིག་ལྟེ་གནས་ཀྱི་ཀྲུའུ་རེན་གཞོན་པ་ཚེ་རིང་འབུམ། མཚོ་ལྷོ་ཁུལ་བོད་ཡིག་ཆ་འཕྲིན་ལག་རྩལ་ཞིབ་འཇུག་ལྟེ་གནས་ཀྱི་ཀྲུའུ་རེན་གཞོན་པ་རྡོ་རྗེ་རབ་བརྟན། མགོ་ལོག་ཁུལ་མི་རིགས་སྐད་ཡིག་བྱ་བའི་ལྟེ་གནས་ཀྱི་ཀྲུའུ་རེན་གཞོན་པ་དར་ཡག་བཅས་ཕེབས། 

        མཚོ་སྔོན་ཞིང་ཆེན་སྲིད་གཞུང་ཡིག་སྒྱུར་ཁང་གི་ཀྲུའུ་རེན་ཀོང་ཆུས་ཏིག་ལགས་ནས་མདོ་འཛིན་མཛད་པ་དང་མཚོ་ལྷོ་ཁུལ་གྱི་ཁུལ་དཔོན་གཞོན་པ་ཆན་ཀའོ་ཆིན་ལགས་ནས་མཛད་སྒོར་ཤིས་ཚིག་ཕུལ།

        ཐེངས་འདིའི་གསོ་སྦྱོང་སྟེང་ཞིང་ཆེན་ཡོངས་ཀྱི་ཁུལ་དང་རྫོང་སོ་སོའི་མི་རིགས་སྐད་ཡིག་བྱ་བའི་ལྟེ་གནས་དང་། སྨྱན་སྦྱོར་ལྟེ་གནས། དུས་དེབ་དང་ཚགས་པར་ཁང་། ཡིག་སྒྱུར་ཁང་སོགས་འབྲེལ་ཡོད་སྡེ་ཁག་གི་མི་སྣ་བརྒྱ་ལྷག་ཞུགས་ཡོད། ཤེས་གསལ་ལྟར་ན་ཐེངས་འདིའི་གསོ་སྦྱོང་དེ་ཚེས་དགུ་ཉིན་ནས་ཚེས་བཅུ་གསུམ་བར་དུས་ཡུན་ཉིན་ལྔའི་རིང་འཚོག་འཆར་འདུག ད་ཐེངས་ཀྱི་གསོ་སྦྱོང་སྟེང་བོད་རང་སྐྱོང་ལྗོངས་བོད་སྐད་ཡིག་ལས་དོན་ཨུ་ལྷན་ཚད་ལྡན་ཁྲུའུ（རྩོམ་སྒྱུར་ཅུས）ཁྲུའུ་ཀྲང་གཞོན་པ་འབྲུག་ལྷ། མཚོ་སྔོན་དགེ་ཐོན་སློབ་ཆེན་གྱི་དགེ་རྒན་ཆེན་མོ་ལྕགས་ཐར་རྒྱལ། མཚོ་སྔོན་མི་རིགས་སློབ་ཆེན་གྱི་དགེ་རྒན་ཆེན་མོ་སངས་རྒྱས་སོགས་ཡིག་སྒྱུར་རིག་པའི་གཞུང་ལུགས་དང་བརྡ་སྤྲོད་རིག་པ་སོགས་ལ་ཞིབ་འཇུག་དང་ལག་ལེན་གྱི་ཉམས་མྱོང་ཕུན་སུམ་ཚོགས་པའི་དགེ་རྒན་ཆེན་མོ་སྐོར་ཞིག་གདན་དྲངས་ཏེ། ཀྲུང་དབྱང་མི་རིགས་ལས་དོན་ཚོགས་འདུའི་དགོངས་དོན་དང་། གཞུང་ཡིག་ཡིག་སྒྱུར་ལག་རྩལ། དེང་རབས་རྒྱ་ཡིག་གི་བརྡ་སྤྲོད་དང་གཞུང་ཡིག་རྩོམ་འབྲི་བྱེད་ཐབས། ཡིག་སྒྱུར་གྱི་རྨང་གཞིའི་རིག་པའི་གཞུང་ལུགས། སྐད་བརྡའི་གཏན་ཚིགས་དང་བརྡ་སྤྲོད་རིག་པ། ཐ་སྙད་གསར་པ་ཡིག་སྒྱུར་བྱེད་ཐབས་སོགས་ཀྱི་ནང་དོན་སྐོར་ནས་སློབ་ཁྲིད་བྱེད་འཆར་འདུག

        ཐེངས་འདིའི་གསོ་སྦྱོང་ནི་ལོ་ཙཱའི་སྤུས་ཚད་མཐོར་འདེགས་དང་ལོ་ཙཱའི་དཔུང་སྡེའི་ལས་སྒོ་འཛུགས་སྐྱོང་ལ་ཤུགས་སྣོན། ལོ་ཙཱའི་དཔུང་སྡེ་ཚད་ལྡན་ཅན་དང་ཆེད་ལས་ཅན་གྱི་ཆུ་ཚད་མཐོར་འདེགས་སུ་གཏོང་བར་ཕན་ནུས་ལྡན་པར་མ་ཟད། “ལྔའི་བཅུ་བཞི་པའི”འཆར་འགོད་འཕེལ་རྒྱས་དང་སྤྱི་ཚོགས་རིང་ལུགས་དེང་རབས་ཅན་འཛུགས་སྐྲུན་ལ་འགོ་ཡག་པོ་འཛུགས་པ་དང་གོམ་སྟབས་བརྟན་པོར་སྤོས་ནས་སྐད་གཉིས་ཀྱི་ཞབས་ཞུ་མཁོ་འདོན་བྱས་ཏེ་མཚོ་སྔོན་ཞིང་ཆེན་གྱི་ལས་རིགས་ཁག་ལ་ཚད་དང་མཐུན་པའི་མི་རིགས་སྐད་ཡིག་ཡིག་སྒྱུར་གྱི་ཤེས་ལྡན་པ་གསོ་སྐྱོང་བྱེད་པའི་དགེ་མཚན་ཆེན་པོ་ལྡན་ནོ། །