༄༅། །ལོ་གཡང་བསུ་བའི་དགའ་འབོད།

        འབའ་རྫོང་མི་རིགས་སློབ་འབྲིང་གཉིས་པས་སྤེལ་པའི་སྤྱི་ལོ་གསར་ཚེས་ཀྱི་ལོ་སར་བསུ་བ་དང་སློབ་གསེང་ཞབས་ཞུའི་གྲུབ་འབྲས་གཟིགས་འབུལ་གྱི་རིག་རྩལ་བྱ་འགུལ་སྤེལ།

        ཏང་གི་ཡང་དག་པའི་སློབ་གསོའི་སྲིད་ཇུས་ཀྱི་དབུ་ཁྲིད་འོག “ཇེ་ཡང་གཉིས”ཀྱི་སྲིད་ཇུས་དང“རྣམ་གྲངས་ལྔའི་དོ་དམ”ལག་ལེན་དོན་འཁྱོལ་བྱེད་པའི་དུས་སྐབས་འདིར། འབའ་རྫོང་མི་རིགས་སློབ་འབྲིང་གཉིས་པས་སློབ་མའི་སློབ་སྦྱོང་གི་ཁུར་བོ་ཇེ་ཡང་དུ་གཏོང་བ་དང་སློབ་རའི་རིག་གནས་འཚོ་བ་ཕུན་སུམ་ཇེ་ཚོགས་སུ་གཏོང་བ། སློབ་ཁྲིད་རྗེས་ཀྱི་བྱེད་སྒོའི་རྣམ་གྲངས་སྣ་མང་དུ་གཏོང་བ་བཅས་ལ་དམིགས་ཤིང་། སྒོས་སུ་སློབ་མའི་ཀུན་སྤྱོད་དང་ཤེས་རིག གཟུགས་གཞི་དང་མཛེས་དཔྱོད། ངལ་རྩོལ་བཅས་ཀྱི་སྤུས་ཚད་ཕྱོགས་ཡོངས་ནས་མཐོར་འདེགས་སུ་གཏོང་བར་གཞིགས་ཏེ། ད་ལོའི་སྟོན་དུས་ཀྱི་སློབ་སྐབས་འདིར་སློབ་མའི་དགའ་ཕྱོགས་དང་འཇོན་ནུས་ལ་བསྟུན་ཏེ་སློབ་གསེང་ཞབས་ཞུའི་རྣམ་གྲངས་ཉི་ཤུ་ལྷག་སྤེལ་བར་དགེ་སློབ་ཚང་མས་དགའ་བསུ་ཆེན་པོ་ཐོབ། 

        ཕྱི་ལོ༢༠༢༡ལོའི་ཟླ་བཅུ་གཉིས་པའི་ཚེས་སོ་གཅིག་ཉིན་སློབ་གྲྭའི་ལུས་སྦྱོང་གླིང་དུ་གནམ་ལོ་གསར་བ་བསུ་བ་དང་སློབ་གསེང་ཞབས་ཞུའི་གྲུབ་འབྲས་གཟིགས་འབུལ་གྱི་རིག་རྩལ་འཁྲབ་སྟོན་བྱེད་པའི་བྱ་འགུལ་སྤེལ་ལ། སྤྲོ་ཚོགས་སུ་སློབ་གྲོགས་ཚོས་དམངས་གླུ་དང་རྡུང་ལེན། སྒྲུང་གླུ་དང་བཤད་པ་སོགས་འཁྲབ་ཚན་གྱི་རིགས་མང་ལ་ནང་དོན་ཕུན་སུམ་ཚོགས་པའི་དམངས་སྲོལ་རིག་གནས་སྐོར་འཁྲབ་སྟོན་བྱས་པར་མ་ཟད། ཁུལ་ཡོངས་ཀྱི་འགྲན་སྡུར་ལས་ཨང་དང་པོ་ཐོབ་པའི་དབྱིན་སྐད་ཀྱི་བསླབ་གཞིའི་གར་ཆུང་ཡང་ཐེངས་འདིར་ཡང་བསྐྱར་འཁྲབ་སྟོན་བྱས། དེ་མིན་དེང་གཞས་དང་ཞབས་བྲོ་སོགས་གླུ་གར་གྱི་གསོལ་སྟོན་གྱ་ནོམ་པ་བཤམས་ཏེ་སློབ་ར་ཡོངས་སུ་དགའ་སྤྲོའི་ཡོ་ལང་རྒྱས་པར་བྱས།