རྒྱལ་ཡོངས་བོད་ཀྱི་སྒྲུང་ཐུང་འགྲན་སྡུར་སྐབས་དྲུག་པའི་ཁྲོད་བྱ་དགའ་ཐོབ་མཁན་གྱི་རྩོམ་པ་པོས་འོས་སྦྱོར་བྱས་པའི་སྒྲུང་དེབ་འགའ།

         ཁྱེད་རང་སྙན་ངག་ཀློག་མཁན་ཅིག་ཡིན་ན། ཁྱེད་རང«གངས་ཀྱི་རྒྱལ་ཁམས»ན་སྨིག་རྒྱུ་བཞིན་རྒྱུ་བའི་མཛེས་པ་དང་སྐྱོ་བ་བསྣོལ་མའི་དྲ་སྙི་རུ་ཚུད་འགྲོ་ལ། ཁྱེད་རང་སྒྲུང་གཏམ་ཀློག་པར་སྤྲོ་མཁན་ཞིག་ཡིན་ན། ཀ་དག་གི་ཞིང་ཁམས་སུ་ལྷགས་འདྲའི་དབུགས་དབྱུང་ཐེངས་ཤིག་འཐོབ་ངེས་སོ། །        གཞན་རྩོམ་པ་པོ་ཁོ་རང་རང་དོན་བརྗོད་པའི་ཐབས་རྩལ་ལ་མཁས་ཤིང་། གང་བྲིས་པ་རྣམས་མྱུར་བུལ་རན་ལ་ཞུན་བརྡར་ཆོད་པ་དང་། སྤྲས་པ་བྲལ་བའི་སྤྱིར་བཏང་གི་ཚིག་སྦྱོར་ལ་རྣོ་ངར་དང་ཆོད་སྟོབས་ཀྱིས་ཁེངས་པ། རྟག་པར་རང་བྱུང་དང་མངོན་ཆུང་གི་དབྱངས་འགྲོས་ཤིག་ལྷུར་ལེན་པ་སོགས་སྐད་ཆའི་མཛེས་པར་ཡང་གུས་པ་ཤིན་ཏུ་འཐད་ཅིང་། རང་འདྲའི་ལས་དང་པོ་བ་རྣམས་ཀྱིས་སྒྲུང་གཏམ་འབྲི་སྐབས། ལན་རེར་སྤྲས་པ་ཐལ་ཆེ་བའི་དབང་གིས་བརྗོད་པ་གསོག་གསོབ་ཏུ་འགྱུར་བ་དང་། ལན་རེར་སྐྱ་ཐལ་དང་ཆིག་རྐྱང་དུ་གྱུར་ནས་རྟུལ་ཞིང་ཆོད་མེད་པར་འགྱུར་བ་སོགས་ཀྱི་སྐྱོན་སེལ་བ་ལ་ཡང་དེབ་འདི་ཉིད་སློབ་སྦྱོང་བྱ་ཡུལ་ཞིག་ཏུ་འོས་སྙམ། །

---

       གང་ལྟར། སྒྲུང་གཏམ་འདི་གསུམ་གའི་ནང་དུ་མི་སྣའི་ནང་སེམས་ཀྱི་འགྱུར་ལྡོག་སྣ་ཚོགས་ཏེ། ཧ་ཅང་རྙོག་འཛིང་དང་འགལ་འདུས་ཁེངས་པའི་ཚོར་འདུ་ཕྲ་མོ་དེ་རིགས་ཤིན་ཏུ་ཞིབ་ཅིང་རྒྱས་པའི་སྒོ་ནས་མངོན་པར་མཚོན་ཞིང་། དེ་ལ་བརྟེན་ནས་མི་སྣ་གང་དེར་བྱ་སྤྱོད་ཅིག་ངང་གིས་ཐོན་པ་དང་རང་གཤིས་ཤིག་ཀྱང་རིམ་གྱིས་གྲུབ་ཡོད་པའི་ཞིབ་ཆ་དང་ལྷོད་ཤ་ཅན་གྱི་འབྲི་སྟངས་དེ་ལ་ཡིད་རབ་ཏུ་མཉེས་པོ་བྱུང་སོང་། དེ་བས། འདིར་རང་ཉིད་ཀྱི་དགའ་ཁ་འཁྱེར་ཕྱོགས་ལྟར། སྒྲུང་གཏམ་གྱི་མི་སྣ་གཙོ་བོ་བུད་མེད་དང་། སྒྲུང་གཏམ་གྱི་བརྗོད་བྱ་གཙོ་བོའང་བུད་མེད་ཀྱི་བརྩེ་དུང་གི་མྱོང་བ་དང་ལས་དབང་། གདམ་ག་སོགས་མཚོན་པ་གཙོ་བོར་གྱུར་ཡོད་པའི་དེབ་འདི་འོས་སྦྱོར་བྱས་པ་ལ། བརྗོད་བྱ་འདིའི་རིགས་ལ་དམིགས་བསལ་སྤྲོ་བ་ཡོད་པའི་ཀློག་པ་པོ་རྣམས་ལ་ནི་སྨྲ་ཅི་དགོས། སྤྱིར་དེབ་འདིའི་རྩོམ་རིག་གི་རིན་ཐང་དང་སྒྱུ་རྩལ་གྱི་རིན་ཐང་ངམ། ཡང་ན་བསམ་བློའི་ཟབ་ཚད་གང་གི་ཐད་ནས་བལྟས་ཀྱང་རྩོམ་རིག་ལ་དགའ་མོས་ཡོད་མཁན་ཞིག་ཡིན་ཙང་ཡང་ནས་ཡང་དུ་བཀླག་རིན་ཡོད་པའི་དེབ་ཅིག་ཏུ་མཐོང་ངོ་། །

---

       ཆུང་དུས་ཀྱི་ཤན་ཤུགས་དེ་ལྟ་བུའི་དབང་གིས། རང་ཉིད་ཀྱིས་སྒྲུང་དེབ་དཔེ་ཀློག་བྱེད་པའི་བརྒྱུད་རིམ་ཁྲོད། རྒྱུ་མེད་རྐྱེན་མེད་ངང་ས་དབྱིབས་ཀྱི་དབུས་མཐའ་གཉིས་སུ་ཕྱེ་ཚེ་མཐར་གནས་པའི་རྒྱལ་ཁབ་ཆུང་ཆུང་དག་དང་དབུལ་འབྱོར་གཉིས་སུ་དབྱེ་བའི་དབུལ་སའི་ཡུལ་ལུང་ཆུང་ཆུང་དག་གི་འཚོ་བ་མཚོན་པའི་བརྩམས་སྒྲུང་ལ་བལྟ་བར་ཤིན་ཏུ་མོས། བརྩམས་ཆོས་དེ་དག་གི་ཁྲོད་ནས་ང་ནི་རང་གི་བྱིས་དུས་དང་འདྲ་བའི་རྒྱང་རིང་གི་གྲོགས་པོ་མང་པོར་ཐུག་ཐུབ་ཅིང་། ད་ལྟའི་སྤྱི་ཚོགས་འཚོ་བ་བཞིན་ཕྱི་གསལ་ནང་གསལ་མིན་པར་རབ་རིབ་ཏུ་སྣང་བའི་ངོ་མཚར་འཇིག་རྟེན་ཞིག་བསྐྲུན་ཡོད་པ་ནི་མུར་ནས་རྫོགས་རྒྱུ་མེད་པའི་ཕྱུར་སྐམ་བཞིན་ངོམ་པ་མེད་པའི་ནོམ་པ་ཞིག་ཏུ་འདོད། དེ་བས། རྩོམ་པ་པོ་ཨ་ཆི་པེ་ཡི«མཆོད་རྫས་སྒོང་རྡོག་གཅིག»ཅེས་པའི་སྒྲུང་དེབ་འདིའང་དེ་ལྟར་དུ་ལགས་ན། ཁྱོད་ལ་གོ་སྐབས་དང་དུས་ཚོད་ཡོད་ཚེ་གཟིགས་ཙམ་གནང་དང་ལེགས་ཉེས་ཀ་ཤུ་ཀ་ཡིས་གཅོད་པ་ཐེ་མི་ཚོམ་མོ། །

---

       མི་ཞིག་གི་དགའ་ཕྱོགས་ལ་ནི་མཐའ་གཅིག་ཏུ་འདིའོ་ཟེར་བ་ཞིག་ནམ་ཡང་དཀའ་སྟེ། དགའ་ཕྱོགས་དེ་ཡང་རིམ་བཞིན་འཕོ་འགྱུར་བྱུང་ཆོག་པ་དང་གསར་རྙིང་འདོར་ལེན་དགོས་པ་ཡང་སེམས་ཀྱི་གཤིས་སུ་གྲུབ་ཡོད། དེར་བརྟེན། ཐོག་མར་བོད་རྩོམ«གཏམ་པདྨའི་ཚལ་གྱི་ཟློས་གར»གྱིས་ཡིད་ཚིམ་པ་མ་ཟད་བུང་བ་ཁྱོ་ཤུག་གཉིས་ཀྱི་བརྩེ་དུང་ལ་གེགས་བར་དེ་ལྟར་འཕྲད་པར་ཕངས་སེམས་ཆེན་པོ་ཤོར་མྱོང་བ་ནས། «བཙུག་ཡག»ལྟ་བུའི་སྤྱི་ཚོགས་དཀར་ནག་ཁྲ་ཁྲ་ཕྱེད་མ་འདིར་ལྟས་དབང་དང་དད་པ་ནི་ཆེས་གལ་ཆེན་ཞིག་ཏུ་གྱུར་བའི་ཡིད་འགུལ་ཚད་མེད་ཀྱང་ཐེབས་མྱོང་། རིམ་བཞིན་ནུབ་ཕྱོགས་ཀྱི་རྩོམ་རིག་ཁག་ལ་མྱོང་རོལ་བྱས་པ་རྒྱུད་ནང་སེམས་ཀྱི་འཇིག་རྟེན་ཕྱི་རུ་བཤམས་པའི་ལུགས་དེར་ཡིད་སྨོན་ཤོར་ཞིང་། དེ་དག་ལས་ཀྱང«རྒྱུས་མེད་པའི་བུད་མེད་ཅིག་གི་འཕྲིག་ཡིག»འདིས་དམིགས་པའི་གཏད་སོ་ཟིན་དུ་མེད་པའི་བརྩེ་དུང་ལ་གཏད་པ་ནི་འཛམ་གླིང་ཤར་ནུབ་ཀྱི་མི་རྣམས་ཕྱིའི་ཤ་མདོག་མ་འདྲ་ཡང་། ནང་སེམས་ཁམས་ཀྱི་དགའ་སྐྱོ་ཆགས་སྡང་གཅིག་མཚུངས་བྱུང་བར་ཁག་འགེལ་ཅི་ལ་དགོས་སྙམ་པ་བྱུང་།
       གལ་ཏེ། ངས་བཀླགས་ནོར་བྱུང་མེད་ན་བརྩམས་སྒྲུང་འདིའི་མི་སེམས་ཀྱི་སྙི་ས་ནས་འཇུས་ཤིང་ཀློང་ཡངས་པར་ཁྲིད་པའི་ཐབས་རྩལ་གལ་ཆེན་འདུག་པ་དྲན་ཡོང་། ཁྱེད་ཀྱིས་ཀྱང་སྒྲུང་གཏམ་འདི་ལན་ཅིག་ཀློགས་དང་། ཚོར་བ་མངར་མོ་རེ་སེམས་ཀྱི་ཡོལ་གོ་རུ་འབབ་སྲིད་དོ། །