གླུ་བ་ཡོན་ཏན་འཇིགས་མེད་ཀྱིས་ལོ་སར་གྱི་དུས་སུ་བརྩེ་སེམས་ཕུལ་བའི་བྱ་འགུལ་སྤེལ་བ།

གླུ་བ་ཡོན་ཏན་འཇིགས་མེད་ལགས།

            ཉེ་ཆར་བོད་ཀྱི་གླུ་བ་ཡོན་ཏན་འཇིགས་མེད་ཀྱིས་ཇུས་འགོད་བྱས་ནས་སྤེལ་བའི“བརྩེ་སེམས100”ཞེས་པའི་རྒྱལ་ཡོངས་ཀྱི་སྤྱི་བའི་དགེ་ཕན་མུ་འབྲེལ་བྱ་འགུལ་གྱི་ས་ཚིགས་བཅོ་ལྔ་བ་ལོ་སར་གྱི་དུས་སུ་ཁོང་གི་ཕ་ཡུལ་ཀན་ལྷོ་ཁུལ་ཐེ་བོ་རྫོང་དུ་སྤེལ་བ་རེད། 
            རྒྱུས་ལོན་བྱུང་བ་ལྟར་ན“བརྩེ་སེམས100”ཞེས་པ་ནི་ཡོན་ཏན་འཇིགས་མེད་ཀྱིས་སྤེལ་བའི་སྤྱི་བའི་དགེ་ཕན་བྱ་འགུལ་ཞིག་ཡིན་ཞིང་། ཁོང་གིས་བྱ་འགུལ་འདི་བརྒྱུད་ནས་ཟོལ་མེད་ཀྱི་བརྩེ་སེམས་དྲོན་མོ་དེ་ཆེས་མཁོ་འདོད་ཆེ་བའི་རྒྱལ་ཡོངས་ཀྱི་ས་ཆ་སོ་སོར་ཕུལ་བཞིན་ཡོད་པ་རེད། ཁོང་གིས་བཤད་རྒྱུར100ཞེས་པ་ནི་མཚོན་བྱེད་ཀྱི་གྲངས་ཀ་ཙམ་ཡིན་ཏེ། གལ་ཏེ་ནུས་པ་ཡོད་ན་རྒྱལ་ཡོངས་སུ་སྤྱི་བའི་དགེ་ཕན་གྱི་བྱ་འགུལ་ཐེངས་གྲངས་སྟོང་གཅིག་དང་། ཐེངས་གྲངས་ཁྲི་གཅིག་ལ་སྤེལ་ཐུབ་རྒྱུའི་རེ་བ་ཡོད་ཅིང་། དེ་ལ་སྤྱི་ཚོགས་ཡོངས་ཀྱི་གྲོགས་པོ་རྣམས་དང་། ལྷག་པར་དུ་རོལ་རྩེད་ཁྱབ་ཁོངས་ཀྱི་གྲོགས་པོ་རྣམ་པ་ནང་དུ་ཞུགས་རྒྱུའི་འབོད་སྐུལ་བཏང་ལ། ཡོན་ཏན་འཇིགས་མེད་ཀྱིས་ཧུར་ཐག་གིས་སྤྱི་བའི་དགེ་ཕན་གྱི་བྱ་གཞག་རླབས་པོ་ཆེ་བསྒྲུབས་པར་མི་མང་པོའི་ཁས་ལེན་དང་གཟེངས་བསྟོད་ཐོབ་པར་མ་ཟད། བརྩེ་སེམས་ཅན་གྱི་སྒྱུ་རྩལ་པ་སོགས་ཀྱི་མཚན་སྙན་ཐོབ་པ་རེད།