ཨ་ཆེན་གངས་རྒྱབ་ཀྱི་གཙོད་ཕྲུག་གཙོད་གནས་མཚོ་རུ་གཙོད་ཕྲུག་རྩེབ་འགོ་ཚུགས་པ།

             ཟླ6པའི་ཚེས27ཉིན། ཨ་ཆེན་གངས་རྒྱབ་ཀྱི་རི་དྭགས་གཙོད་ཕྲུག་རྩེབ་ཁང་ཆེན་མོ་ལྟ་བུར་གྱུར་པའི་གནས་གཙོ་བོ་སྟེ་གཙོད་གནས་མཚོ་རུ་གཙོད་ཕྲུག་རྩེབ་འགོ་ཚུགས་ཤིང་། གཙོད་གནས་མཚོའི་སྲུང་སྐྱོབ་ས་ཚིགས་ཀྱིས་ཐོག་དང་པོར་བརྙན་ལེན་ཡོ་བྱད་བརྒྱུད་ནས་གཙོད་ཕྲུག་རྩེབ་པའི་གོ་རིམ་ཆ་ཚང་ལ་བལྟས་པ་རེད། གནས་ཚུལ་རྒྱུས་ལོན་བྱུང་བ་ལྟར་ན། འདི་ནི་ཐོག་དང་པོར་བརྙན་ལེན་ཡོ་བྱད་ཀྱིས་གཙོད་ཕྲུག་རྩེབ་པའི་གོ་རིམ་ཆ་ཚང་བླངས་པ་ཡིན་ཞིང་། ཀྲུང་དབྱང་བརྙན་འཕྲིན་ཁང་གི་གསར་འགྱུར་ལེ་ཚན་གྱིས་ཉིན་དེའི་ཆུ་ཚོད13སྟེང་གཙོད་ཕྲུག་རྩེབ་པའི་གོ་རིམ་ཐད་གཏོང་བྱས་ལ། འདི་ནི་འཛམ་གླིང་གི་བརྙན་འཕྲིན་ལོ་རྒྱུས་སྟེང་དུ་ཐོག་དང་པོར་རི་དྭགས་གཙོད་ཀྱི་ཕྲུ་གུ་རྩེབ་བའི་གོ་རིམ་ཆ་ཚང་བརྙན་ལེན་ཐད་གཏོང་བྱས་པ་ཞིག་རེད། 
             ཉིན་དེའི་སྔ་དྲོར། ཨ་ཆེན་གངས་རྒྱབ་ཀྱི་གཙོད་གནས་མཚོའི་སྲུང་སྐྱོབ་ས་ཚིགས་ཀྱི་ལས་བྱེད་མི་སྣ་དང་ཀྲུང་དབྱང་གསར་འགྱུར་བརྙན་འཕྲིན་ལེ་ཚན་གྱི་གསར་འགོད་པས་ཉེ་ལམ་བཟོས་ནས་གྲུབ་མ་ཐག་པའི་གཙོད་གནས་མཚོའི་བརྙན་ལེན་རྟོག་ཞིབ་སྒྲིག་ཆས་སྤྱད་དེ། རི་དྭགས་གཙོད་ཀྱི་ཕྲུ་གུ་རྩེབ་པའི་གོ་རིམ་ཆ་ཚང་བརྙན་ལེན་གནང་ཞིང་། ཀྲུང་དབྱང་བརྙན་འཕྲིན་ཁང་གི་གསར་འགྱུར་ལེ་ཚན་གྱིས་མཐོང་དཀོན་པའི་སྣང་ཚུལ་དེ་ཐད་གཏོང་བྱས་པ་རེད། ཨ་ཆེན་གངས་རྒྱབ་སྲུང་སྐྱོབ་ས་ཚིགས་ཀྱིས་ཉེ་སྔོན་དཔྱད་ཞིབ་བྱས་པ་ལས་གསལ་སྟོན་མཛད་པ་ལྟར་ན། མིག་སྔར་གཙོད་གནས་མཚོའི་འགྲམ་དུ་ཕྲུ་གུ་རྩེབ་ལ་ཉེ་བའི་མོ་གཙོད་ཆིག་ཁྲི་ལྷག་ཙམ་ཡོད་ཅིང་། དེ་ནི་ཉེ་བའི་ལོ་ངོ་སུམ་ཅུའི་རིང་ལ་ཧ་ཅང་མཐོང་དཀོན་པའི་སྣང་ཚུལ་ཞིག་རེད། 
             ཨ་ཆེན་གངས་རྒྱབ་ཀྱི་རི་དྭགས་གཙོད་ལ་སྲུང་སྐྱོབ་བྱེད་པར་སྐབས་ཐོག་རང་བཞིན་གྱི་གྲུབ་འབྲས་ལོན་པ་དང་བསྟུན་ནས་གཙོད་ཀྱི་ཁ་གྲངས་སླར་གསོ་འབྱུང་བཞིན་ཡོད་ལ། ཨ་ཆེན་གངས་རྒྱབ་རང་བྱུང་སྲུང་སྐྱོབ་ཁུལ་གྱི་བྱ་བའི་གནད་འཛིན་སའང་རི་དྭགས་རྐུ་གསོད་བྱེད་པར་ངོ་རྒོལ་བྱེད་པ་ནས་སྐྱེ་ཁམས་སྲུང་སྐྱོབ་ལ་དོ་སྣང་བྱེད་པ་དང་། ཚན་རིག་ཞིབ་འཇུག་དང་རྒྱུན་མཐུད་འཕེལ་རྒྱས་ཀྱི་ཕྱོགས་སུ་གཞོལ་བ་དེ་ཡིན་པ་རེད། ཨ་ཆེན་གངས་རྒྱབ་རང་བྱུང་སྲུང་སྐྱོབ་ཁུལ་གྱི་དོ་དམ་ཅུའུ་ཡི་ཅུའུ་ཀྲང་ཚེ་བརྟན་འབྲུག་གིས་བསྟན་པར། ཨ་ཆེན་གངས་རྒྱབ་ས་ཁུལ་ནི་གདོད་མའི་རྣམ་པ་རང་སོར་བཞག་པ་ཆེས་ལེགས་པའི་ས་ཁུལ་ཞིག་ཡིན་ཞིང་། རྒྱལ་ཡོངས་ཀྱི་སྐྱེ་དངོས་རིགས་སྣ་ཚོགས་ཡོད་པའི་ས་གནས་གཙོ་བོ11ནང་གི་གཅིག་ཡིན་ལ། ཚན་རིག་ཞིབ་འཇུག་གི་ཐོན་ཁུངས་ཕུན་སུམ་ཚོགས་པ་ལྡན་པ་དང་། རི་སྐྱེས་སྐྱེ་དངོས་དང་སྲོག་ཆགས། སྐྱེ་ཁམས་ཁོར་ཡུག   ས་གཤིས། ས་ཁམས། ཆུ་ཁུངས། ནམ་ཟླ། འདམ་ར། གངས་རི། ས་འཁྱག  གནའ་བོའི་སྐྱེ་དངོས་སོགས་ཀྱི་ཕྱོགས་ལ་ཞིབ་འཇུག་བྱེད་པར་ཧ་ཅང་མཐོང་དཀོན་པའི་ས་གནས་ཤིག་ཡིན།   དེ་བས། ཚན་རྩལ་ལ་བརྟེན་ནས་ས་ཁུལ་སྟོབས་ལྡན་ཅན་དུ་བསྒྱུར་རྒྱུ་ནི་ཨ་ཆེན་གངས་རྒྱབ་ཀྱི་རང་བྱུང་སྲུང་སྐྱོབ་ཁུལ་འཕེལ་རྒྱས་གཏོང་བའི་མ་འོངས་པའི་འཐབ་ཇུས་ཡིན་པ་རེད།