མཚོ་སྔོན་ཞིང་ཆེན་གྱིས་སྤྱི་པའི་དཔེ་མཛོད་ཁང་དང་རིག་གནས་ཁང་རིན་མེད་པར་སྒོ་འབྱེད་རྒྱུ་རེད།
ཟླ3པའི་ཚེས20ཉིན། གསར་འགོད་པས་ཞིང་ཆེན་ཡོངས་ཀྱི་རིག་གནས（མང་ཚོགས་སྒྱུ་རྩལ）ཁང་གི་འགོ་གཙོའི་ཚོགས་འདུའི་སྟེང་རྒྱུས་ལོན་བྱུང་བ་ལྟར་ན། རིག་གནས་པུའུ་ཡིས་བཏོན་པའི་བླང་བྱ་ལྟར། ད་ལྟ་ནས་བཟུང་རང་ཞིང་ཆེན་གྱིས་རིམ་པ་ལྟར་རིན་དོད་མེད་པའི་སྒོ་ནས་སྤྱི་པའི་དཔེ་མཛོད་ཁང་དང་རིག་གནས་ཁང（ས་ཚིགས）ཀྱི་སྒོ་འབྱེད་རྒྱུ་ཡིན་ཞིང་། གྲོང་ཁྱེར་དང་གྲོང་གསེབ་ཀྱི་མང་ཚོགས་ལ་རང་གི་གཞི་རྩའི་རིག་གནས་ཁང་དབང་ལོངས་སུ་སྤྱོད་དུ་འཇུག་རྒྱུ་ཡིན་པ་དང་། ལོ་མཇུག་ལ་མ་བསླེབས་པའི་སྔོན་དུ། སྤྱི་པའི་དཔེ་མཛོད་ཁང་དང་རིག་གནས་ཁང（ས་ཚིགས）ཡོངས་རྫོགས་རིན་མེད་སྒོས་སྒོ་འབྱེད་རྒྱུ་རེད།
གོ་ཐོས་ལྟར་ན། སྤྱི་པའི་དཔེ་མཛོད་ཁང་དང་རིག་གནས་ཁང（ས་ཚིགས）རིན་མེད་ཀྱིས་སྒོ་འབྱེད་པ་དེ་གཙོ་བོ་སྤྱི་པའི་མི་ཚོགས་འདུ་ས་དང་སྒྲིག་བཀོད་གནས་ཡུལ་རིན་མེད་པར་སྒོ་འབྱེད་པ་དང་། མང་ཚོགས་ལ་གཞི་རྩའི་སྤྱི་པའི་རིག་གནས་ཞབས་འདེགས་རྣམ་གྲངས་ཡོངས་རྫོགས་རིན་མེད་སྒོས་འདོན་སྤྲོད་བྱེད་པ་ལ་ཟེར་ཞིང་། སྤྱི་པའི་དཔེ་མཛོད་ཁང་གི་རིན་མེད་སྒོ་འབྱེད་ནང་དུ་གཙོ་བོ་སྤྱི་བཏང་གི་དཔེ་གཟིགས་ཁང་དང་། མང་འཕྲིན（གློག་རྡུལ）དཔེ་གཟིགས་ཁང་། སྙན་ཞུ་ཁང（གསོ་སྦྱོང་ཁང་དང་ཕྱོགས་བསྡུས་བྱ་འགུལ་ཁང）དང་། རང་སྦྱོང་ཁང་ལ་སོགས་པའི་མི་ཚོགས་འདུ་ས་དང་སྒྲིག་བཀོད་གནས་ཡུལ་རིན་མི་ལེན་པར་སྒོ་འབྱེད་པ་དང་། དཔྱད་གཞིའི་ཡིག་ཆ་གཡར་ལེན་དང་ཞིབ་འཚོལ། འདྲི་རྟོག་བྱེད་པ་དང་། སྤྱི་ཕན་རང་བཞིན་གྱི་འཆད་ཁྲིད་དང་འགྲེམ་སྟོན། གཞི་རིམ་གྱི་ཟུར་ཁྲིད་དང་འཁོར་སྐྱོད་ཞབས་ཞུ་ལ་སོགས་པའི་གཞི་རྩའི་རིག་གནས་ཞབས་འདེགས་ཀྱི་རྣམ་གྲངས་འཐུས་ཚང་དུ་བཏང་ཐོག་རིན་མེད་པར་འདོན་སྤྲོད་བྱེད་པ། རམ་འདེགས་རང་བཞིན་གྱི་ཞབས་ཞུ་དུ་མ་སྟེ། དཔེར་ན་དཔང་ཡིག་ལེན་པ། ཚོད་ལྟ་ར་སྤྲོད་བྱེད་པ་དང་དེ་མིན་དངོས་ཟོག་བཅོལ་སྐབས་རིན་མི་ལེན་པ་ལ་སོགས་པ་འདུས་ཤིང་། རིག་གནས་ཁང（ས་ཚིགས）ཀྱི་རིན་མེད་སྒོ་འབྱེད་ནང་དུ་གཙོ་བོ་ནུས་མང་ཚོམས་ཁང་དང་། འགྲེམ་སྟོན་ཁང་། རྩིས་འཁོར་དང་དྲ་རྒྱའི་སློབ་ཁང་། ཞབས་བྲོ（ཕྱོགས་བསྡུས）ནང་སྦྱོང་ཁང་དང་རོལ་རྩེད་བྱ་འགུལ་ཁང་ལ་སོགས་པའི་སྤྱི་པའི་མི་ཚོགས་འདུ་ས་དང་སྒྲིག་བཀོད་གནས་ཡུལ་རིན་མེད་པར་སྒོ་འབྱེད་པ་དང་། ཁྱབ་སྤེལ་རང་བཞིན་གྱི་རིག་གནས་སྒྱུ་རྩལ་གྱི་ཟུར་ཁྲིད་གསོ་སྦྱོང་དང་། སྤྱི་ཕན་རང་བཞིན་གྱི་མང་ཚོགས་རིག་གནས་བྱ་འགུལ་དང་འགྲེམ་སྟོན་ལ་སོགས་པའི་གཞི་རྩའི་རིག་གནས་ཞབས་འདེགས་ཀྱི་རྣམ་གྲངས་འཐུས་ཚང་དུ་བཏང་ཐོག་རིན་མེད་པར་འདོན་སྤྲོད་བྱེད་པ་སོགས་འདུས་སོ།།
