སེམས་ཀྱི་ཉི་ཟླ་རྫོང་བརྙན་འཕྲིན་ཁང་དངོས་སུ་གཏོང་འགོ་བརྩམས་པ།

            ཉེ་ལམ།  ཡུན་ནན་ཞིང་ཆེན་བདེ་ཆེན་བོད་རིགས་རང་སྐྱོང་ཁུལ་སེམས་ཀྱི་ཉི་ཟླ་རྫོང་བརྙན་འཕྲིན་ཁང་དངོས་སུ་གཏོང་འགོ་བརྩམས་པ་དང་།  བརྙན་འཕྲིན་དངོས་སུ་གཏོང་འགོ་བརྩམས་པའི་མཛད་སྒོ་བསྡུས།  བདེ་ཆེན་བོད་རིགས་རང་སྐྱོང་ཁུལ་ཏང་ཨུའི་རྒྱུན་ཨུ། སེམས་ཀྱི་ཉི་ཟླ་རྫོང་གི་ཏང་ཨུའི་ཧྲུའུ་ཅི་ཕུན་ཡའོ་ཝུན་མཛད་སྒོ་ཞུགས་པ་མ་ཟད་ཤིས་ཚིག་ཕུལ། 
            ཕུན་ཡའོ་ཝུན་གྱིས་བཤད་རྒྱུར།  ཡུན་ནན་ཞིང་ཆེན་ཏང་ཨུ་དང་ཡུན་ནན་ཞིང་ཆེན་སྲིད་གཞུང་གིས་རྒྱབ་སྐྱོར་དང་ཐུགས་ཁུར་ཆེན་པོ་བྱས་ཤིང་།  བདེ་ཆེན་ཁུལ་ཏང་ཨུ་དང་བདེ་ཆེན་ཁུལ་སྲིད་གཞུང་།  སྤྱི་ཚོགས་སྟེང་གི་ལས་རིགས་སོ་སོས་ཐུགས་ཁུར་བྱས་འོག  སེམས་ཀྱི་ཉི་ཟླ་རྫོང་ཏང་ཨུ་དང་སྲིད་གཞུང་གིས་ཚན་རིག་གི་འཕེལ་རྒྱས་ལྟ་བ་མཛུབ་སྟོན་དུ་བྱས་ཏེ་གོ་སྐབས་དམ་འཛིན་དང་།  བགྲོད་ལམ་གསར་གཏོད།  ལས་དོན་རྣམས་དངོས་འབབས་བྱས་པས་རྫོང་ཡོངས་ཀྱི་སྤྱི་ཚོགས་དཔལ་འབྱོར་ལ་འཕེལ་རྒྱས་ཆེན་པོ་བྱུང་།  དཔལ་འབྱོར་མགྱོགས་མྱུར་ངང་འཕེལ་རྒྱས་འགྲོ་བཞིན་པ་མ་ཟད་སྤྱི་ཚོགས་ཕྱོགས་ཡོངས་སུ་འཕེལ་རྒྱས་འགྲོ་བ་དང་མི་རིགས་མཐུན་སྒྲིལ་འཆམ་མཐུན་ཡིན་པ།  ཆོས་ལུགས་འཆམ་མཐུན་ངང་སྤེལ་བཞིན་པའི་དུས་སྐབས་བཟང་པོ་ཞིག་ལ་ཐོན་ཡོད། 
            ཕུན་ཡའོ་ཝུན་གྱིས་བསྟན་དོན།  སེམས་ཀྱི་ཉི་ཟླ་རྫོང་བརྙན་འཕྲིན་ཁང་ནི་ཕྱི་ལ་དྲིལ་བསྒྲག་བྱེད་པའི་སྒེའུ་ཁུང་ཞིག་ཡིན་པ་མ་ཟད།  སེམས་ཀྱི་ཉི་ཟླ་རྫོང་ཏང་ཨུ་དང་སྲིད་གཞུང་གི་སྨྲ་ལྕེ་ཀྱང་ཡིན།  དུས་ལྟར་ཏང་གི་ལམ་ཕྱོགས་དང་རྩ་དོན།  སྲིད་ཇུས་དྲིལ་བསྒྲག་བྱེད་བཞིན་པའི་དུས་མཚུངས་སུ་དམངས་འཚོ་ལ་མཉམ་འཇོག་བྱེད་པ་དང་དམངས་ཀྱི་གནས་ཚུལ་རྒྱུས་ལོན་བྱེད་པའི་ལས་འགན་ཡང་ཁུར་ཡོད་པས།  སེམས་ཀྱི་ཉི་ཟླ་རྫོང་ཏང་ཨུའི་སྲིད་གཞུང་དང་མང་ཚོགས་བར་གྱི་གསེར་ཟམ་ལྟ་བུ་གྱུར་ཡོད།