ཀྲུང་དབྱང་མི་རིགས་སློབ་ཆེན་དུ་སློབ་མ་ཚོས་དགུ་ཐུག་འཐུང་ནས་བོད་ལུགས་ལོ་གསར་ལ་བསུ་མ་བྱས་པ།

རྒན་བཀའ་མགོན་ལགས་ཀྱིས་སློབ་མ་ཚོར་ལོ་གསར་རྟེན་འབྲེལ་ཞུ་བཞིན་པ།

སློབ་མ་ཚོས་དགུ་ཐུག་འཐུང་བཞིན་ཡོད་པ།

            ཟླ 3པའི་ཚེས3ཉིན་ནི་བོད་རྩིས་ཀྱི་ཟླ12པའི་ཚེས29ཉིན་ཡིན་པས། སྲོལ་རྒྱུན་དུ་དགོང་མོ་དེར་དགུ་ཐུག་འཐུང་སྲོལ་ཡོད་པ་རེད། པེ་ཅིང་ཀྲུང་དབྱང་མི་རིགས་སློབ་ཆེན་དུ་བོད་རིགས་སློབ་མ་བདུན་བརྒྱ་ལྷག་མཉམ་དུ་འཛོམས་ནས་དགུ་ཐུག་འཐུང་བཞིན། བོད་ལུགས་ལོ་གསར་ལ་རྟེན་འབྲེལ་ཞུ་བའི་བྱ་འགུལ་སྣ་ཚོགས་སྤེལ་འགོ་བརྩམས།

གདོང་ལ་སྤྲོ་འཛུམ་གྱིས་ཁེངས་ནས་ཕན་ཚུན་ཀུ་རེ་རྩེ་བཞིན་པ།

            དགོང་མོའི་ཆུ་ཚོད7གྱི་སྟེང་དུ། གསར་འགོད་པ་ཀྲུང་དབྱང་མི་རིགས་སློབ་ཆེན་གྱི་ཟ་ཁང་དུ་སླེབས་དུས། བོད་རིགས་སློབ་མ་བདུན་བརྒྱ་ལྷག་མཉམ་དུ་འཛོམས་ནས་དགུ་ཐུག་འཐུང་བཞིན་ཡོད་པ་རེད། ཟ་ཁང་གི་ཇ་མ་དག་གིས་ཀྱང་བྲེལ་འཚུབ་ངང་དགུ་ཐུག་སྣོད་དུ་བླུགས་ནས་སྒེའུ་སྟེགས་སྟེང་བཞག་སྟེ་སློབ་མ་ཚོས་འཐུང་བར་སྟབས་བདེ་བཟོས་ཡོད་པ། ད་ཐེངས་གི་དགུ་ཐུག་ཏུ་ལུག་ཤ་ཤ་ཁོག་བཞི་བཀོལ་ཡོད་པ་དང་། དེ་དག་ལས་ཤ་ཁོག་གཉིས་ནི་བོད་རིག་པ་ཞིབ་འཇུག་སློབ་གླིང་གི་རྒན་ཚེ་རིང་ཐར་ལགས་ཀྱིས་མཚོ་སྔོན་ནས་འཁྱེར་ཡོང་བ་ཡིན་པས་བྲོ་བ་ཧ་ཅང་ཞིམ་པོ་འདུག 

ཕྱི་རྒྱལ་གྱི་གྲོགས་པོ་ཞིག་གིས་དགུ་ཐུག་གསོལ་བཞིན་པ།

            རྒྱུས་ལོན་བྱས་པ་ལྟར་ན། ཀྲུང་དབྱང་མི་རིགས་སློབ་ཆེན་གྱི་“དགུ་ཐུག”དགའ་འཛོམས་ཞེས་པ་ནི་ལོ་གསར་བྱ་འགུལ་གྱི་སྔོན་འགྲོ་ལྟ་བུ་ཡིན་པ་རེད། ཟླ 3པའི་ཚེས4ཡི་དགོང་མོར་ལོ་གསར་རིག་རྩལ་སྤྲོ་ཚོགས་ཡོད་པ་དང་། ལོ་གསར་ཚེས1ཉིན་བོད་རིགས་སློབ་མ་རྣམས་ཀྱིས་ལག་ཏུ་ཕྱེ་མར་བཏེགས་ནས་ཕན་ཚུན་ལོ་གསར་རྟེན་འབྲེལ་ཞུ་བར་འགྲོ་རྒྱུ་རེད། ཚེས་གཉིས་ཉིན་སྲོལ་རྒྱུན་གྱི་ལུས་རྩལ་འགྲན་བསྡུར་ཏེ། ཐག་འཐེན་དང་ས་སྒྱེ་འདེགས་པ། འཇུ་རེས་འགྲན་བསྡུར་སོགས་སྤེལ་རྩིས་ཡོད་པ་རེད།