སྟག་རིག་རྒན་བཀུར་ལོ་སར་གཞིས་བྱེས་ལྷན་འཛོམས་ལ་རྟེན་འབྲེལ་ཞུ་བའི་ལྒང་ལི་འགྲན་ཚོགས།

སྟག་རིག་སྡེ་བས་ལོ་སར་གྱི་ལྒང་ལི་འགྲན་སྡུར་སྤེལ་བ།

     2017ལོའི་ཟླ1པའི་ཚེས4ཉིན།  མཚོ་ལྷོ་ཁུལ་ཁྲི་ཀ་རྫོང་འཕྲང་དམར་གྲོང་རྡལ་སྟག་རིག་སྡེ་བས་རྒན་བཀུར་ལོ་སར་གཞིས་བྱེས་ལྷན་འཛོམས་སྤེལ་ནས་ལོ་འཁོར་བཅུ་གསུམ་འཁོར་བར་རྟེན་འབྲེལ་ཞུ་བ་དང་བསྡོངས་ཏེ། འཕྲང་དམར་ལུང་ཁོག་འདིའི་སྡེ་བ་སོ་སོའི་ལུས་རྩལ་རིག་གནས་དར་སྤེལ་དང་རིག་གནས་འཚོ་བ་ཕུན་སུམ་ཇེ་ཚོགས་སུ་གཏོང་ཆེད་ལྒང་ལི་འགྲན་སྡུར་གྱི་བྱ་འགུལ་ཞིག་སྤེལ།

འགྲན་ཞུགས་རུ་ཁག

     རེབ་འདིའི་ལྒང་ལི་འགྲན་ཚོགས་ལ་འཕྲང་དམར་ལུང་ཁོག་གི་སྡེ་བ་དྲུག་དང་སྟག་རིག་སྡེ་བའི་རུ་ཁག་གསུམ་སྟེ་ཁྱོན་བསྡོམས་རུ་ཁག་དགུ་ཞུགས་ཡོད་ཅིང་། འགྲན་སྡུར་གྱི་མགོ་མཇུག་བར་གསུམ་འདྲ་མཉམ་དང་དྲང་བཞག ཚུལ་ལྡན་གྱི་བྱ་འགུལ་ལེགས་པོ་འཁྱོངས་པར་སྟག་རིག་སྡེ་དམངས་ཨུ་ཡོན་ལྷན་ཁང་དང་སྟག་རིག་སྟག་དམར་གཉིས་ཀྱིས་མཉམ་འབྲེལ་སྒོས་གཙོ་སྒྲུབ་བྱས་པ་ཞིག་ཡིན། འགྲན་སྡུར་གྱི་བྱ་དགའི་གཟིགས་བཟོས་ཡོད་ཚད་དང་མགྲོན་ཤོག ཁྱབ་བརྡ་བཅས་ཚང་མ་བྲག་དཀར་རྫོང་ཁ་བ་ཅན་ཚོང་འཕྲིན་ཇུས་འགོད་ཞབས་ཞུ་ལྟེ་གནས་ཀྱི་སྦྱིན་བདག་ཆེན་མོ་སྟག་རིག་བླ་པེ་ཡིས་རོགས་སྐྱོར་མཛད་པ་ཡིན་ལ། བྱ་དགའི་དངུལ་དང་ཚོགས་རའི་བཀོད་སྒྲིག ཉིན་དེའི་བར་རྒྱན་གྱི་རྩེད་མོ་སོགས་སྡེ་བས་འགན་ཁུར་ཏེ་གཙོ་སྒྲུབ་བགྱིས།

འགྲན་སྡུར་ཡུལ་དངོས།

     ཉིན་གཅིག་གི་དུས་ཚོད་ནང་འགྲན་སྡུར་མཇུག་རྫོགས་དགོས་པས་རྒྱན་རིམ་པ་གསུམ་འཕངས་ཏེ་རུ་ཁག་ཀ་བ་དང་རུ་ཁག་ཁ་བ་སྐོར་གཉིས་སུ་བགར་ནས་འགྲན་སྡུར་རིམ་པ་རེ་རེ་སྤེལ་ཞིང་། འགྲན་སྡུར་གྱི་ཐོག་མཐའ་བར་གསུམ་དུ་འདྲ་མཉམ་དང་དྲང་བདེན། ཡོ་གཟུར་བྲལ་བ་ཞིག་ཡོང་ཆེད་ཆེད་ལས་ཤན་འབྱེད་པའང་ཆེད་དུ་གདན་འདྲེན་བྱས་ཏེ་འགྲན་སྡུར་སྤེལ།
     ཞོགས་པའི་ཆུ་ཚོད་བཅུ་ཡས་མས་སུ་ཐོག་མར་སྡེ་བའི་སྡེ་དཔོན་དང་ཤན་འབྱེད་པའི་འཐུས་ཚབ་ཀྱིས་འགྲན་སྡུར་མགོ་རྩོམ་པའི་གསུང་བཤད་དང་འགྲན་སྡུར་གྱི་སྒྲིག་ལམ་རེ་རེ་ཁ་གསལ་དོན་འདུས་སྒོས་གསུང་་བཤད་གནང་རྗེས། ཡུལ་ལུང་གཅིག་གི་གཡང་སྡེ་སོ་སོའི་སྟག་ཤར་རྣམས་གཞི་གཅིག་ལ་འཛོམས་ཏེ་མཛའ་བརྩེ་དང་པོ་དང་འགྲན་སྡུར་གཉིས་པའི་མཆོད་ཚིག་གིས་མདུན་བསུས་ནས་བོད་པའི་ལོ་སར་ཚེས་མགོ་ལ་ཐོག་མར་ལ་འགྲོ་གོང་མ་དང་སྒྲོམ་སྡེ་བ་གཉིས་ཀས་ལྟད་མོའི་སྒོ་གླེགས་ཕྱེས། ཕྱིས་སུ་རྩ་འཛུགས་བཀོད་སྒྲིག་པའི་རིམ་པ་ལྟར་དུ་འགྲན་སྡུར་གཅིག་འཕྲོར་གཅིག་ལ་སྤེལ་བ་དང་། འགྲན་ཞུགས་པ་རྣམ་པས་ཀྱང་སྡེ་བ་སོ་སོའི་ཁྱད་ཆོས་ལྟར་དུ་མཚན་མིང་གསར་བ་གསོལ་ཞིང་ཁ་དོག་བཀྲག་མདངས་ལྡན་པའི་ཐུན་མིན་གྱི་ལྒང་རྩེད་ལྭ་བ་གོན་པའི་མི་ཚད། འགྲན་སྡུར་སྐབས་སུ་དོ་སྣང་བྱེད་དགོས་པའི་གནད་ཀ་རེ་རེ་ཡང་དང་བསྐྱར་དུ་གྲོས་མོལ་བྱས་ཏེ་འགྲན་སྡུར་ལ་ཞུགས།

འགྲན་སྡུར་ཡུལ་དངོས།

     ལང་ཚོའི་གསོན་ཤུགས་འབར་བའི་གསར་སྐྱེས་གཞོན་ནུ་རྣམས་ཀྱིས་རང་རང་ལ་ལྷན་སྐྱེས་སུ་གྲུབ་པའི་སྐྱེན་འགྱུར་ཡངས་པའི་ལྡིང་རྩལ་དང་། ལྒང་རྒྱག་བཀོད་འདོམས་པའི་ཐབས་རྩལ་གཉིས་ཟུང་འབྲེལ་བྱས་ཏེ་སྤྲེའུ་ལྟ་བུའི་མཉེན་རྩལ་དང་གླང་ཆེན་ལྟ་བུའི་ཤུགས་རྩལ་ཁྱད་མཚར་བ་དག་འགྲན་ར་ནས་བཤམས་སྟོན་བྱས་པ་ན། རྒྱ་ཆེ་ལྟད་མོ་བ་རྣམ་པས་སྤྱན་ཟུང་ཀེམ་ཀེམ་དུ་གཟིགས་ཤིང་དགའ་བསུའི་ལག་ཟུང་ཐག་ཐག་ཏུ་རྡེབ་སྟེ་འགྲན་ཚོགས་ཡོངས་འཁྲུག་ཆ་དོད་ཅིང་ཟང་ཟིང་ཅན་དུ་བཏང་། ལྒང་རྒྱག་པ་རྣམ་པས་ཀྱང་རེ་མགྱོགས་རེ་དལ་གྱི་རྩལ་དང་ཐབས་གཉིས་ཟུང་སྦྲེལ་སྒོས་ཉམས་མྱོང་ཡོད་མདོག་གི་ཚུལ་གྱིས་སྐར་གྲངས་རེ་རེ་གསོག་འཕར་བྱས་ཏེ་མཇུག་མཐའི་རྒྱལ་ཁ་ལ་རྩོད་ལེན་བྱེད། ཛ་དྲག་གི་འགྲན་སྡུར་ཞོད་འཇགས་གཏོང་ཆེད་སྡེ་བའི་རྩེད་རིག་པ་རྣམས་ཀྱིས་ལུས་ལ་མཛེས་སྡུག་གི་འཕྱོར་གོས་ཀྱིས་རྒྱན་ཞིང་གདོང་ལ་འཛུམ་མདངས་ཀྱི་གང་བུ་གྲོལ་ཏེ་རྒྱ་ཆེའི་གཟིགས་མོ་བ་ཡོངས་ལ་ཡིད་འཕྲོག་ཅིང་དང་བ་འདྲེན་པའི་ཞབས་བྲོ་དང་སྙན་དབང་གསོ་བའི་གླུ་དང་གླུ་དབྱངས་ཀྱིས་བར་རྒྱན་གྱི་ཚུལ་དུ་ལྟད་མོ་རེ་འགའ་བསྟན་མ་ཐག གཟིགས་མོ་བ་ཕལ་ཆེ་བས་ཁ་པར་གྱི་བརྙན་མིག་རྩེད་རིག་གི་ཁོང་ལ་བསྐོར་ཞིང་བསྟོད་རའི་ལྷང་ལྷང་ཐལ་མོ་དཀྱུས་གཅིག་ཏུ་བརྡབས།

རྒྱལ་ཁའི་འབྲས་བཟང་།

     རྒྱལ་ཕམ་གཙོ་བོ་མི་འཛིན་པར་རྒྱ་ཆེའི་གཟིགས་མོ་བ་རྣམ་པར་ལྟད་མོ་ཡག་པོ་ཞིག་སྟོན་ཆེད་ལྒང་རྒྱག་པ་རྣམ་པའི་ངོ་མཚར་ཡིད་འགུག་གི་རྩེད་སྟངས་སྣ་ཚོགས་དང་མཛའ་བརྩེ་དང་མཐུན་སྒྲིལ་གྱིས་ཕྱུག་པའི་འགྲན་རིམ་རེ་རེ་ཡིས་དེར་འདུས་གཟིགས་མཁན་ཡོངས་ལ་བག་ཆགས་ཟབ་མོ་བཞག
     མཇུག་མཐར་ལྒང་རྒྱག་རུ་ཁག་སོ་སོས་དཀའ་སྡུག་གི་རྔུལ་ཆུ་དང་མཛུབ་གུ་ལྔ་བཅིངས་མཉམ་འབྲེལ་གྱི་སྟོབས་ཀྱིས་འཕྲང་དམར་ལུང་ཁོག་གི་སེར་བརྒྱ་སྡེ་བར་ཨང་དང་པོའི་བྱ་དགའ་ཐོབ་ཅིང་བྱ་དགའ་ལ་གཟིགས་བཟོས་དངོས་པོ་དང་སྒོར་དྲུག་བརྒྱ་དང་། སྟག་རིག་སྟག་དམར་ལ་ཨང་གཉིས་པའི་བྱ་དགའ་ཐོབ་ལ། བྱ་དགའ་ལ་གཟིགས་བཟོས་དངོས་པོ་དང་སྒོར་ལྔ་བརྒྱ། ལ་འགྲོ་གོང་མར་ཨང་གསུམ་པའི་བྱ་དགའ་ཐོབ་ཅིང་། བྱ་དགའ་ལ་གཟིགས་བཟོས་དངོས་པོ་དང་སྒོར་བཞི་བརྒྱ་བཅས་གནང་བ་མ་ཟད། རུ་ཁག་གཞན་དག་ཚང་མ་ལའང་ཨང་བཞི་བ་དང་རྟིང་སྐུལ་བཅས་རིམ་པ་བཞིན་དུ་གཟིགས་བཟོས་དངོས་པོ་དང་བྱ་དགའི་སྒོར་མོ་གནང་བ་རེད།
     བྱ་འགུལ་མཇུག་བསྡུ་ཁར་དགེ་རྒན་ཆེན་མོ་སྟག་རིག་རྟ་མགྲིན་རྒྱལ་གྱིས་འདི་འདྲའི་བྱ་འགུལ་ཞིག་སྤེལ་བ་ནི་ཡུལ་ལུང་འདིའི་སྡེ་བ་ཕན་ཚུན་འགྲིག་མཐུན་དང་ཕན་ཚུན་སློབ་སྦྱོང་། ཕན་ཚུན་ཡིད་ཆེས། ཕན་ཚུན་རྒྱུས་ལོན་བཅས་བྱས་ཏེ་མ་འོངས་པར་ཡུལ་ལུང་འདིར་མི་སྣ་འཇོན་ཐང་ཅན་མང་པོ་སྐྱེད་སྲིང་བྱེད་པ་དང་། ལྒང་རྒྱག་པ་མང་པོ་བྱུང་སྟེ་རྫོང་རིམ་པ་ནས་ཆེས་མཐོའི་བྱ་དགའ་ལེན་རྒྱུ་དང་། དེ་བཞིན་དུ་ཁུལ་དང་ཞིང་ཆེན་རིམ་པའི་འགྲན་སྡུར་ཁྲོད་དུ་བོད་རིགས་ལྒང་རྒྱག་པ་ཇེ་མང་དུ་འགྲོ་བའི་བཀྲ་ཤིས་ཁ་གཡང་སྒྲོག་སྟེ་རེབ་འདིའི་ལྒང་ལི་འགྲན་ཚོགས་བསམ་ཐོག་ལྟར་བཀྲ་ཤིས་བདེ་ལེགས་ངང་སྤེལ་ལོ།།