བོད་ཀྱི་གློག་བརྙན་སྒྲིག་བཟོ་ལྟེ་གནས་ཆེ་ཤོས་སྐྲུན་མགོ་བརྩམས་པ།

ཁྱུང་ཆེན་བརྙན་གླིང་གི་ཇུས་འགོད་རི་མོ།

     སྤྱི་ཟླ5བའི་ཚེས12ཉིན། མིག་སྔའི་བོད་ཁུལ་ཡོངས་ནས་གཞི་རྒྱ་ཆེས་ཆེ་བའི་གློག་བརྙན་སྒྲིག་བཟོ་ལྟེ་གནས་ཏེ་ཁྱུང་ཆེན་བརྙན་གླིང་ཞེས་པ་མཚོ་སྔོན་ཞིང་ཆེན་མཚོ་ལྷོ་བོད་རིགས་རང་སྐྱོང་ཁུལ་འབའ་རྫོང་ནས་དངོས་སུ་འཛུགས་སྐྲུན་བྱེད་མགོ་བརྩམས་ཤིང་། འདི་ལེགས་པར་འགྲུབ་རྗེས་བོད་ཁུལ་གྱི་གློག་བརྙན་སྒྲིག་བཟོ་དང་བོད་ཀྱི་བརྙན་ཟློས་ལས་རིགས་ཐད་ཀྱི་མི་སྣ་སྐྱེད་སྲིང་དང་བརྙན་ཟློས་རིག་གནས་ཀྱི་འཕེལ་རྒྱས་ལ་སྨན་པའི་ཞབས་ཞུ་མཁོ་འདོན་བྱེད་རྒྱུ་རེད།
     ཤེས་རྟོགས་བྱུང་བ་ལྟར་ན། བརྙན་གླིང་འདིར་མ་དངུལ་བྱེ་བ་གཅིག་ལྷག་བཏང་ཡོད་ཅིང་འབའ་རྫོང་སྲིད་གཞུང་གིས་རོགས་སྒྲུབ་གནང་། འདིའི་སྤྱིའི་རྒྱ་ཁྱོན་ལ་སྨི་གྲུ་བཞི་མ8000ལས་བརྒལ་ཡོད་ཅིང་སྨི་གྲུ་བཞི་མ600ཅན་གྱི་བརྙན་ལེན་ཁང་སོགས་ཡོད།    
     བརྙན་གླིང་གི་འགན་འཁུར་པ་བསོད་ནམས་རིན་ཆེན་རྒྱལ་གྱིས་མཚམས་སྦྱོར་གནང་བ་ལྟར་ན། བརྙན་གླིང་གི་གནས་གཞིའི་མཐའ་འཁོར་གྱི་ལེ་བར་ཆིག་བརྒྱའི་ནང་ཚུན་དུ་རང་བྱུང་ཡུལ་ལྗོངས་དང་མིས་བཟོས་ཡུལ་ལྗོངས་མཉམ་གནས་ཡིན་ཏེ།  དེའི་ནང་འབའ་ཡུལ་གྱི་རྩྭ་ཐང་དང་རྨ་ཆེན་གངས་རི། མང་རྫོང་གི་བྱེ་སྣ་སོགས་ཚུད་ཡོད་ལ། བརྙན་གླིང་འདི་ག་ཞིང་ལས་དང་འབྲོག་ལས་ཀྱི་སྤེལ་རྒྱུག་མཚམས་དཀྱིལ་དུ་ཆགས་པ་དང་། རྒྱལ་ཁབ་རིམ་པའི་གེ་སར་རིག་གནས་སྐྱེ་ཁམས་སྲུང་སྐྱོབ་ཚོད་ལྟའི་ཁུལ་སོགས་སུ་གཏོགས་པས་ཁོར་ཡུག་ཐད་ཀྱི་ཁྱད་འཕགས་དགེ་མཚན་ཡང་ལྡན་ཡོད།
     འདི་ནི་བོད་བརྙན་ལས་རིགས་ཐད་ཀྱི་ཐོད་བརྒལ་གསར་བ་ཞིག་དང་འཕེལ་རྒྱས་སྒང་གི་སྐྱ་རེངས་གསར་བ་དེ་ཡིན་ཕྱིར་ཀུན་གྱིས་རེ་ལྟོས་བཅངས་ཡོད།