དགའ་ལྡན་དགོན་དུ་དགའ་ལྡན་ལྔ་མཆོད་ཀྱི་ཆོ་ག་སྤེལ་བ།

དགའ་ལྡན་དགོན་དུ་དགའ་ལྡན་ལྔ་མཆོད་ཀྱི་ཆོ་ག་སྤེལ་བ།

      སྤྱི་ཟླ12པའི་ཚེས27ཉིན་ཏེ་བོད་ལུགས་ཀྱི་ཟླ10བའི་ཚེས25ཉིན་ནི་དགེ་ལུགས་པའི་ཤིང་རྟའི་སྲོལ་འབྱེད་མཁན་མཉམ་མེད་ཙོང་ཁ་བ་ཆེན་པོ་བློ་བཟང་གྲགས་པའི་དཔལ་མྱ་ངན་ལས་འདས་པའི་དུས་མཆོད་ཀྱི་ཉིན་མོ་ཡིན་ཞིང་། དགའ་ལྡན་དགོན་དུ་དགའ་ལྡན་ལྔ་མཆོད་ཀྱི་ཆོ་ག་སྤེལ་ཏེ་གོས་སྐུ་བཤམས་པ་དང་། ཕྱོགས་བཞི་མཚམས་བརྒྱད་ནས་ཐོན་པའི་དད་ལྡན་མང་ཚོགས་རྣམས་སྔ་མོ་ནས་དགའ་ལྡན་དགོན་དུ་མཆོད་མཇལ་དང་ཕྱག་སྐོར། ཞལ་གསེར་འབུལ་བ། མཆོད་མར་ཕུལ་བ་ལ་སོགས་བྱས་ནས་མཉམ་མེད་ཙོང་ཁ་བ་ཆེན་པོ་བློ་བཟང་གྲགས་པ་རྗེས་དྲན་བྱེད་ཅིང་རྣམ་དཀར་དགེ་བའི་ལས་གཞོལ་ནས་དགེ་ཕྱོགས་སུ་གསོལ་སྨོན་བྱེད་པ་རེད།
      དབུས་གཙང་ས་ཆར་དགོངས་རྫོགས་ཀྱི་དུས་མཆོད་ཆེན་མོ་དེ་ལ་དགའ་ལྡན་ལྔ་མཆོད་ཅེས་འབོད་པ་རེད། བོད་རབ་བྱུང་བདུན་པའི་ས་མོ་ཕག་སྟེ1419ལོའི་སྟོན་དུས། ཁམས་གསུམ་འགྲོ་བའི་བླ་མ་ཆོས་ཀྱི་རྒྱལ་པོ་ཙོང་ཁ་པ་ཆེན་པོས་སྟོད་ལུང་དང་འབྲས་སྤུངས། ལྷ་ས། སེ་ར་སོགས་སུ་ཕེབས་ནས་བཀའ་ཆོས་མང་དུ་གསུངས། དེ་ནས་སླར་དགའ་ལྡན་དུ་ཕྱིར་ཕེབས་ཏེ་ཐུབ་དབང་ཚུལ་ཁྲིམས་མའི་སྐུ་མདུན་དུ་མཆོད་འབུལ་དང་བསྔོ་སྨོན་རྒྱ་ཆེར་མཛད་རྗེས་སྐུ་བེར་དང་དབུ་ཞྭ་དག་སྲས་ཀྱི་ཐུ་བོ་དར་མ་རིན་ཆེན་ལ་གནང་སྟེ་རྒྱལ་ཚབ་ཏུ་བསྐོ་བཞག་མཛད་མཐར། བོད་ཟླ་བཅུ་བའི་ཚེས་ཉེར་ལྔ་ཉིན་འབྲོག་རི་བོ་དགེ་ལྡན་རྣམ་པར་རྒྱལ་བའི་གླིང་གི་གཟིམ་ཁང་འོད་གསལ་སྦུག་ཏུ་དགོངས་པ་ཆོས་དབྱིངས་སུ་ཐིམ་པའི་ཚུལ་མཛད། དེའི་ཕྱི་ལོ་ལྕགས་བྱི་སྟེ1420ལོའི་ཟླ་བཅུ་བའི་ཚེས་ཉེར་ལྔ་ཉིན་དགའ་ལྡན་དུ་རྡོ་རྗེ་སློབ་དཔོན་བརྒྱ་ཕྲག་ཏུ་མས་གསང་བདེ་འཇིགས་གསུམ་དང་ཀྱེ་རྡོར།  དུས་འཁོར། ཚེ་དཔག་མེད། ཀུན་རིག་སོགས་ཀྱི་དཀྱིལ་འཁོར་ལ་བརྟེན་པའི་སྒྲུབ་མཆོད་དང་དགོངས་རྫོགས་རྒྱ་ཆེ་བ་བསྒྲུབས་པ་དང་། དུས་མཚུངས་སུ་སྣེའུ་དཔོན་ནམ་མཁའ་བཟང་ཁུ་དབོན་གྱིས་ཀྱང་ར་ཁ་བྲག་ཏུ་བྱམས་ཆེན་ཆོས་རྗེ་ཤཱཀྱ་ཡེ་ཤེས་གདན་དྲངས་ཏེ། དགེ་འདུན་མང་བོས་མཆོད་འབུལ་རྒྱ་ཆེར་མཛད་པ་ནས་བཟུང་། དེང་སང་གི་བར་དགའ་ལྡན་ལྔ་མཆོད་ཆེན་མོ་ཞེས་རྒྱ་བོད་ཧོར་སོགས་ཀྱི་དད་ལྡན་ཐམས་ཅད་ཀྱིས་རྣམ་དཀར་ལས་ལ་བརྩོན་ཞིང་། གླིང་མེ་བཀར་བའི་སྲོལ་བྱུང་། མདོ་ཁམས་ལ་སོགས་བོད་ཀྱི་ས་ཕྱོགས་གཞན་ཀུན་ཏུ་ཡང་ལོ་རེའི་ཉིན་དེར་དགོན་གྲོང་གཉིས་སུ་རྣམ་དཀར་དགེ་སྒྲུབ་ཀྱི་ལས་ལ་འབད་པ་དང་སྲོག་གཅོད་སྡིག་ལས་སོགས་མི་བྱེད་པར་རང་གི་འབྱོར་བར་གཞིགས་ཏེ་དགོན་སྡེ་ཁག་ལ་མཆོད་འབུལ་བརྒྱ་འབུལ་སྟོང་འབུལ་བྱེད་པ་དང་། མཚན་མོ་གླིང་མེ་བསྒྲོན་ཏེ་རྗེ་བདག་ཉིད་ཆེན་པོར་དྲན་གསོ་བྱེད་པའི་སྲོལ་བཟང་དར་ཡོད།

ཟུར་བཀོད།
      བོད་ཀྱི་དགེ་ལུགས་པའི་གྲུབ་མཐའི་སྲོལ་བཏོད་པ་པོ་རྗེ་ཙོང་ཁ་པ་ཆེན་པོ་ནི། རབ་བྱུང་དྲུག་པའི་གསེར་འཕྱང་ཞེས་པ་མེ་བྱ་སྤྱི་ལོ1357ལོར་ཡབ་ཀླུ་འབུམ་དགེ་དང་ཡུམ་ཤིང་མོ་བཟའ་ཨ་ཆོས་གཉིས་ཀྱི་སྲས་སུ་མདོ་སྨད་ཙོང་ཁའི་ཡུལ་དུ་སྐུ་འཁྲུངས། དགུང་ལོ་གསུམ་ལ་ཤ་བ་རི་རྫོང་དུ་ཀརྨ་རོལ་པའི་རྡོ་རྗེ་ལས་དགེ་བསྙེན་གྱི་སྡོམ་པ་བཞེས་ཏེ་མཚན་ཀུན་དགའ་སྙིང་བོར་གསོལ། དགུང་ལོ་བདུན་པ་ཆུ་ཡོས་སྤྱི་ལོ1363ལོར་བྱ་ཁྱུང་དུ་ཆོས་རྗེ་དོན་གྲུབ་རིན་ཆེན་གྱི་དྲུང་དུ་རབ་ཏུ་བྱུང་སྟེ་མཚན་བློ་བཟང་གྲགས་པ་ཞེས་གསོལ།དགུང་ལོ་བཅུ་དྲུག་ཐོག་ཆོས་རྗེ་དོན་གྲུབ་རིན་ཆེན་གྱིས་བསྐུལ་ཅིང་བདག་ཉིད་ཀྱང་སྤྲོ་ཤུགས་དྲག་པོ་བཟློག་ཏུ་མེད་པ་བསྐྱེད་ནས་དབུས་སུ་ཕེབས་པར་བརྩམས།དགུང་ལོ་བཅུ་བདུན་པ་ཆུ་གླང་སྤྱི་ལོ1373ལོར་དབུས་གཙང་དག་པའི་ལྗོངས་སུ་བྱོན། དེ་ནས་རིམ་པས་འབྲི་གུང་དཔལ་གྱི་ནགས་ཁྲོད།གསང་ཕུ་བདེ་བ་ཅན། མྱང་སྟོད། ཞྭ་ལུ། སྣར་ཐང་། ས་སྐྱ། བོ་དོང་ཕྱོགས་སུ་སློབ་གཉེར་གྱི་དོན་དུ་བྱོན།དགུང་ལོ་ཉེར་བཞི་བ་ལྕགས་བྱི་སྤྱི་ལོ1281ལོར་ཡར་ཀླུང་ཚོགས་ཆེན་མཁན་པོ་ཚུལ་ཁྲིམས་རིན་ཆེན་གྱིས་མཁན་པོ་དང་།ཤེས་རབ་མགོན་པོས་ལས་ཀྱི་སློབ་དཔོན། བསོད་ནམས་རྡོ་རྗེས་གསང་སྟེ་སྟོན་པ་མཛད་དེ། དགེ་འདུན་གྲངས་དང་ལྡན་པའི་དབུས་དགེ་སློང་གི་སྡོམ་པ་མནོས། སྔ་ཕྱིར་ལོ་ཙཱ་བ་མཁན་ཆེན་རིན་ཆེན་རྣམ་རྒྱལ།ས་བཟང་པཎ་ཆེན་མ་ཏི་བ།དབུ་མ་བ་བརྩོན་འགྲུས་སེང་གེ ལྷོ་བྲག་གྲུབ་ཆེན་ནམ་མཁའ་རྒྱལ་མཚན།རྗེ་རིད་མདའ་བ་གཞོན་ནུ་བློ་གྲོས།བུ་སྟོན་ཐུགས་སྲས་ཆོས་ཀྱི་དཔལ། བྲ་གོར་མཁན་ཆེན་ཆོས་སྐྱོང་བཟང་པོ་སོགས་སྐྱེས་ཆེན་དམ་པ་མང་པོ་སྤྱི་བོར་བསྟེན་ནས། ཐུན་མོང་གི་རིག་གནས་སྤྱི་དང་སྒོས་སུ་ཟབ་མོ་མདོ་སྔགས་ཀྱི་ཆོས་མཐའ་ཡས་པ་གསན། ཐོས་བསམ་སྒོམ་པའི་རིམ་པ་བརྒྱུད་དེ། འཆད་རྩོད་རྩོམ་གསུམ་གྱིས་མདོ་སྔགས་ཀྱི་བསྟན་པ་ལ་དག་ཐེར་མཛད་ཅིང་། བོད་ཁ་བ་ཅན་གྱི་ལྗོངས་འདིར་རྒྱལ་བསྟན་ཉི་མ་ལྟར་གསལ་བར་མཛད་པ་བཀའ་དྲིན་མཆོག་ཏུ་ཆེའོ།། དགུང་ལོ་ང་གསུམ་པ་ས་གླང་སྤྱི་ལོ་1409ལོར་ལྷ་ས་ཆོ་འཕྲུལ་སྨོན་ལམ་ཆེན་མོའི་མཆོད་ཚོགས་བཙུགས་པ་དང་འབྲོག་རི་བོ་དགེ་ལྡན་རྣམ་པར་རྒྱལ་བའི་གླིང་བཏབ་སྟེ། ཆོས་ཀྱི་སྦྱིན་པ་བསམ་གྱི་མི་ཁྱབ་པ་མཛད། དགུང་ལོ་རེ་གཅིག་པ་མེ་བྱ་སྤྱི་ལོ1417ལོར་དགའ་ལྡན་དུ་དཀྱིལ་འཁོར་སྒྲུབ་མཆོད་མཛད། ཡངས་པ་ཅན་གྱི་རྟེན་རྣམས་བཞེངས། དགུང་ལོ་རེ་གསུམ་པ་རབ་བྱུང་བདུན་པའི་ས་ཕག་སྤྱི་ལོ1419ལོའི་བོད་ཟླ10བའི་ཚེས25ཉིན་དགའ་ལྡན་དུ་ཞི་བར་གཤེགས།