མཚོ་སྔོན་རྒྱང་སྒྲོག་བརྙན་འཕྲིན་གྱི་བོད་ཤིང་ཕོ་རྟ་ལོའི་ལོ་སར་དགོང་ཚོགས་ཕབ་སྐྲུན་བྱས་ཚར།

དགོང་ཚོགས་སུ་ཕེབས་པའི་འགོ་ཁྲིད་རྣམ་པ།

      སྤྱི་ཟླ12པའི་ཚེས20ཉིན་གྱི་དགོང་མོར། ལོ་རེར་ཐེངས་རེའི་མཚོ་སྔོན་རྒྱང་སྒྲོག་བརྙན་འཕྲིན་ཁང་གི་ལོ་སར་སྤྲོ་ཚོགས་ཏེ2014ལོའི་བོད་ཤིང་ཕོ་རྟ་ལོའི་ལོ་སར་སྤྲོ་ཚོགས་ཆེན་མོ《དཔྱིད་དཔལ་གསར་བའི་རེ་སྨོན》ཞེས་པ་མཚོ་སྔོན་རྒྱང་སྒྲོག་བརྙན་འཕྲིན་ཁང་གི་འཁྲབ་སྟོན་ཚོམས་ཆེན་ནས་འཁྲབ་སྟོན་བྱས་ཏེ་ཕབ་བསྐྲུན་བྱས།
      མཚོ་སྔོན་ཞིང་ཆེན་སྲིད་གྲོས་ཀྱི་ཀྲུའུ་ཞི་རིན་ཆེན་རྒྱལ་དང་ཞིང་ཆེན་ཏང་ཨུའི་རྒྱུན་ལས་ཨུ་ཡོན། ཞིང་ཆེན་ཏང་ཨུའི་འཐབ་ཕྱོགས་གཅིག་གྱུར་པུའི་པུའུ་ཀྲང་བསྟན་ཁོ། ཞིང་ཆེན་དམག་ཁུལ་གྱི་སི་ལེན་ཡོན་གཞོན་པ་ངག་དབང་བསོད་ནམས། བློ་མཐུན་རྒན་པ་སྐལ་བཟང་རྡོ་རྗེ་སོགས་འཁྲབ་སྟོན་ཡུལ་དངོས་སུ་ཕེབས་ཏེ་གཟིགས་མོར་གནང་།

གླུ་བ་གདུགས་དཀར་ཡག་གིས་གནམ་ལོ་གསར་ཚེས་གླུ་ཡིས་བསྟོད།

      མཚོ་སྔོན་ཞིང་ཆེན་འཁྲབ་རྩལ་མཐུན་ཚོགས་ཚད་ཡོད་འགན་འཁྲི་ཀུང་ཟི་དང་མཚོ་སྔོན་ཞིང་ཆེན་བོད་ཀྱི་ཟློས་གར་ཚོགས་པ། མ་ཟད་བོད་ལྗོངས་དང་ཟི་ཁྲོན། ཀན་སུའུ། ཡུན་ནན། པེ་ཅིང་སོགས་ཞིང་ལྗོངས་དང་གྲོང་ཁྱེར་ནས་ཡོང་བའི་ཆེད་ལས་འཁྲབ་སྟོན་པ་དང་དམངས་ཁྲོད་སྒྱུ་རྩལ་པ་དག་སོ་སོས་གཙོ་ཕལ་འཁྲབ་ཡུལ་གཉིས་ནས་གླུ་གར་དང་། ཟློས་གར། ཁ་ཤགས། རྡུང་ལེན། ཆང་གཞས། རྩེད་རིག་སོགས་སྒྱུ་རྩལ་རྣམ་པ་ཕུན་སུམ་ཚོགས་འཁྲབ་སྟོན་བྱས་ཤིང་། མིག་གི་དགའ་སྟོན་དང་རྣ་བའི་གསོས་སུ་འཇོ་བའི་ལེ་ཚན་མང་པོ་རྣམ་པ་ཚོར་གནམ་ལོ་གསར་བའི་ལེགས་སྐྱེས་སུ་ཕུལ་ཡོད།

སྟོད་ཉི་མ་ལྷ་ས་ནས་ཐོན་པའི་བོད་ཀྱི་ལྷ་མོ་ཟློས་གར་ལེན་མཁན་ཚེ་རིང་སྒྲོན་དཀར།

      ཐེངས་འདིའི་ལོ་སར་དགོང་ཚོགས་ལ། ལེ་ཚན་གྱི་རྣམ་པའི་སྟེང་ནས་རྒྱུད་འཛིན་དང་གསར་རྩོམ་ཟུང་དུ་སྦྲེལ་ཏེ། མི་རིགས་ཀྱི་ཁྱད་ཆོས་འབུར་དུ་ཐོན་ཞིང་དུས་རབས་ཀྱི་སྙིང་སྟོབས་མངོན་པར་གསལ་ལ། སྤྲོ་སྐྱིད་ཀྱི་སྣང་ཚུལ་གང་སར་རྒྱས་པའི་རང་ཚུགས་སྲུང་འཛིན་བྱས་ནས། 《རྫོགས་ལྡན་དཔྱིད་ཀྱི་རེ་སྨོན》དང《མཛེས་སྡུག་དབྱར་གྱི་ལང་ཚོ》། 《གསེར་ལྡན་སྟོན་གྱི་ལང་ཚོ》། 《རབ་དཀར་དགུན་གྱི་མཛེས་སྡུག》བཅས་ཚན་པ་བཞི་ལས་གྲུབ།
 

གངས་ལྷ་མེ་ཏོག་ཚན་སྡེབ།

       བོད་ལྗོངས་དབུས་གཙང་ནས་ཡོང་བའི་གླུ་མ་ཚེ་རིང་སྒྲོན་དཀར་གྱིས་བླངས་པའི་བོད་ ཀྱི་ལྷ་མོ་ཟློས་གར《བཀྲ་ཤིས་རྟགས་བརྒྱད》ཞེས་པས་གཟིགས་མོ་བ་རྣམས་ཀྱི་ཡིད་དབང་རབ་ཏུ་བཀུག་པ་དང་། མཚོ་སྔོན་རང་སའི་བོད་ཀྱི་གླུ་བ་གདུགས་དཀར་ཡག་གིས་བླངས་པའི《གསེར་ཐང་བུ་མོ》ཞེས་པ་དང་བཀྲ་ཤིས་ཕུན་སྟོབས་ཀྱིས་བླངས་པའི《གནམ་ལོ་གསར་བའི་སྨོན་འདུན》ཞེས་པ། མེ་ཏོག་གངས་ལྷ་ཚན་སྡེབ་ཀྱིས་བླངས་པའི《བརྩེ་དུང་གི་འབོད་པ》ཞེས་པ་སོགས་ཀྱིས་དགོང་ཚོགས་ཧྲིལ་བོ་མཐོ་རླབས་གསར་བ་རེ་རེར་བསྐྱལ་སོང་།

མདོ་འཛིན་པ་རྣམས།

གནམ་ལོ་གསར་བའི་སྤྲོ་ཚོགས་བདེ་ལེགས་ངང་མཇུག་རྫོགས།

      དགོང་ཚོགས་ཡོངས་ཀྱི་ལེ་ཚན་ཚང་མ་སྤྲོ་སྐྱིད་ཀྱི་རྣམ་པས་ཁེངས་ཏེ་མི་རིགས་མཐུན་སྒྲིལ་དང་དཔལ་འབྱོར་འཕེལ་རྒྱས། སྤྱི་ཚོགས་འཆམ་མཐུན། ཀྲུང་གོའི་ཕུགས་འདུན་མངོན་འགྱུར་བྱེད་པར་བརྩོན་པའི་བརྗོད་བྱ་གཙོ་བོ་མགོ་ནས་མཇུག་ཏུ་བརྗུས་ཡོད།ཡིན་པ་དང་དགོང་ཚོགས་ཀྱི་སྤྱིའི་འཁྲབ་ཁྲིད་པས་བཤད་པ་ལྟར་ན། རེབ་འདིའི་དགོང་ཚོགས་གླུ་དབྱངས་དང་འཁྲབ་སྟོན་པ། བརྩམས་ཆོས་ཐད་ནས་མང་ཆེ་བ་གསར་བ་དག་དག་ཡིན་པ་དང་། འཁྲབ་སྟོན་གྱི་ཐད་ནས་ཀྱང་དེ་སྔོན་གྱི་འཁྲབ་སྟོན་ཁང་ཁོ་ན་ནས་འཁྲབ་སྟོན་བྱེད་ པ་བསྒྱུར་ཏེ། འཁྲབ་སྟོན་གྱི་ལེ་ཚན་འབྲུ་དྲུག་སྙེ་མ་ལྡེམ་པའི་གཅན་ཚ་ཞིང་ལས་ས་ཁུལ་དང་རྟ་ནོར་ལུག་གསུམ་གྱི་འཕེལ་ཁ་རྒྱས་བའི་ཐུན་ཏེ་ཕྱུགས་ལས་ས་ཁུལ་བཅས་འཁྲབ་སྟོན་བྱེད་ས་གཉིས་སུ་བཀར་ནས་འཁྲབ་སྟོན་བྱས་ཡོད་པ་དང་། ཡན་ལག་འཁྲབ་ཡུལ་དེ་གཉིས་ཀྱི་སྒྲ་ལེན་ཕབ་སྐྲུན་བྱས་ཚར་ཞིང་། མཇུག་མཐའི་སྒྲིག་སྦྱོར་ཐད་ནས་འགོ་འཛིན་པས་ཡུལ་དངོས་ནས་འབྲེལ་མཐུད་བྱེད་པའི་རྣམ་པ་སྤྱད་དེ་ངེད་རྒྱང་སྒྲོག་བརྙན་འཕྲིན་ཁང་གི་འཁྲབ་སྟོན་ཚོམས་ཁང་དང་ཡན་ལག་འཁྲབ་སྟོན་ཁང་དེ་གཉིས་གཞི་གཅིག་ཏུ་སྦྲེལ་བའི་འཁྲབ་སྟོན་གྱི་རྣམ་པ་ལས། གཞི་རིམ་མང་ཚོགས་དང་མཉམ་དུ་གནམ་ལོ་གསར་བར་རོལ་བའི་བྱེད་ཐབས་སྤྱད་ཡོད་པས་མང་ཚོགས་དང་དམ་པོར་འབྲེལ་ཞིང་མང་ཚོགས་ལ་གནམ་ལོ་གསར་ཚེས་ཀྱི་གར་སྟེགས་ཆེན་པོ་བསྐྲུན་ཡོད།