མཚོ་སྔོན་བོད་སྨན་ཁང་གི་གཟེ་ཆང་གཙོ་བྱས་སྨན་ཆང་རིགས་བདུན་ལ་ཆེད་མཁས་བའི་བདེན་དཔང་ཐོབ།

མཚོ་སྔོན་བོད་སྨན་ཁང་གི་གཟེ་ཆང་གཙོ་བྱས་སྨན་ཆང་རིགས་བདུན་ལ་ཆེད་མཁས་བའི་བདེན་དཔང་ཐོབ་པ།

       བོད་སྨན་སྨན་ཆང་ནི་ལོ་རྒྱུས་ཀྱི་རྒྱུན་རིང་བ། དཔལ་ལྡན་རྒྱུད་བཞིའི་སྨན་ཆང་གི་ལེའུ་ལས་ཀྱང་། གཟེ་ཆང་གཟེ་མ་ནས་བསྲེས་གླུམ་ནང་དུ།། གཟེ་མ་ཆུར་བསྡུས་ཁུ་བ་བསིངས་པ་ནི།། རུས་ཚིགས་མཁལ་མའི་རླུང་དང་ཆུ་སེར་འཇོམས།། ཁྱད་པར་རླུང་མཁལ་མར་བབས་པ་འདོན།།སོགས་སྨན་ཆང་རིགས་བདུན་པོ་ཡོད་པ་མ་ཟད་ཁ་ཚར་རིགས་བརྒྱད་ཀྱང་བསྟན་ཡོད།

       ལོ་ངོ1300ལྷག་གི་ལོ་རྒྱུས་ཀྱི་འཕོ་འགྱུར་ཁྲོད། ནས་ཆང་གཙོ་བྱས་པའི་བོད་སྨན་སྨན་ཆང་གི་རིག་གནས་ནི་ནས་ཆང་རིགས་ཀྱི་ནང་ནས་ཁྱད་ཆོས་མངོན་འཕགས་ཀྱི་བཟོ་རྩལ་ཞིག་རེད། འཐུང་ན་ཁ་ལ་ཞིམ་ཞིང་ཁོག་ལ་བསིལ། རྣམ་རིག་བཀྲ་ཞིང་དྲེག་ལ་ཕན། གྲང་རླུང་གསོ་ཞིང་མེ་དྲོད་སྐྱེད་པའི་ནུས་བ་ཡོད། ཁྱད་པར་དུ་རྒལ་ཚིགས་དང་རྐེད་པ་ན་བ་དང་མཁལ་མའི་ནུས་ཞན་པ། དྲེག་གྲུམ། མོ་ནད་སོགས་ལ་ཕན་པ་ཆེ་བས། སྔོན་ཆད་ཀྱི་རྒྱལ་བོ་དང་སྐུ་དྲག འབངས་མི་སེར་རྣམས་ཀྱི་དགའ་བོ་བྱེད་ཀྱི་ཡོད། འོན་ཀྱང་དུས་ཀྱི་འཕོ་འགྱུར་ཞིག་གིས་སྲོལ་རྒྱུན་གྱི་སྨན་ཆང་བསྙལ་བ་དེ་དེང་དུས་དེ་འདྲ་རྒྱུགས་མི་ཆེ་བར་འདུག
       མཚོ་སྔོན་བོད་སྨན་ཁང་སྨན་སྦྱོར་ཚན་ཁག་གི་བོད་སྨན་གྱི་སྦྱོར་སྡེ་འཐུས་ཇེ་ཚང་དང་ཉམས་ལ་ཉེ་བའི་སྨན་ཆང་གི་བཟོ་རྩལ་ལག་ལེན་གསོ་ཆེད། འགོ་གཙོ་རྣམས་ཀྱི་མཛུབ་སྟོན་དང་སྣེ་ཁྲིད་འོག་སྨན་སྦྱོར་ཚན་ཁག་གིས་ལོ་གཅིག་གི་ཡིག་ཆ་འཚོལ་ཞིབ་བྱས་ཏེ། སྲོལ་རྒྱུན་གྱི་སྨན་ཆང་བསྙལ་བའི་ལག་ལེན་དང་ཉི་ཧོང་གི་ཆང་བསྙལ་བའི་ལག་ལེན་ཟུང་འབྲེལ་སྒོས་སྨན་ཆང་གི་གནད་དོན་ཐག་གཅོད་ལེགས་པོ་བྱུང་།

       ཟླ11པའི་ཚེས22ཉིན། མཚོ་སྔོན་བོད་སྨན་ཁང་གི་རྩ་འཛུགས་ལྟར་ཆེད་མཁས་པ་དང་ལག་རྩལ་པ་རྣམས་ཀྱིས་དཔལ་ལྡན་རྒྱུད་བཞི་ལས་གསུངས་བའི་གཟེ་ཆང་དང་རུས་ཆང་། སྦྲང་ཆང་།ཛཱ་ཏི་ཆང་། བད་ཀན་ཆང་། ཟན་ཆང་། བུར་ཆང་སོགས་སྨན་ཆང་རིགས་བདུན་གྱི་སྦྱོར་བ་དང་བཟོ་རྩལ་གོ་རིམ། ཕན་ནུས། བསྟེན་ཚུལ། འཛེམ་བྱ་བཅས་ལ་དབྱེ་ཞིབ་དང་རོ་མྱོང་བྱས་པ་རེད།
       ཆེད་མཁས་པས་གསུང་རྒྱུར། སྨན་ཆང་གི་ཚད་གཞུང་དང་མཐུན་ཞིང་བཟོ་རྩལ་ཡང་འཐུས་ཚང་ལ། སྨན་ནུས་བཟང་། ཐེངས་འདིའི་སྨན་ཆང་གི་སྦྱོར་སྡེ་ལེགས་འགྲུབ་བྱུང་བ་ལས་བོད་ཀྱི་སྲོལ་རྒྱུན་སྨན་ཆང་རྒྱུད་འཛིན་དང་ནད་ཐོག་ལག་ལེན་བྱེད་པ་ལ་ནུས་པ་མངོན་གསལ་ཐོན་ཡོད།ཅུང་ཙམ་ཐོན་སྐྱེད་བྱས་རྗེས་ནད་ཐོག་ཏུ་ཚོད་ལྟ་བྱེད་རྒྱུ་གལ།
       ཐེངས་འདིའི་ཆེད་མཁས་པའི་བགྲོ་གླེང་ནང་བཞིན། མཚོ་སྔོན་བོད་སྨན་ཁང་སྨན་སྦྱོར་ཚན་ཁག་གིས་སྨན་ཆང་ཅུང་ཙམ་ཐོན་སྐྱེད་བྱས་རྗེས་ནད་ཐོག་ཏུ་ཚོད་ལྟ་བྱེད་རྒྱུ་རེད།