༄༅།།མཚོ་ལྷོ་ཁུལ་གྱིས་བོད་ཡིག་བརྡ་ཆད་གསར་བ་ཚད་གཞི་ཅན་གྱི་བྱ་བའི་མཉམ་འབྲེལ་གྲོས་ཚོགས་ཀྱི་གྲོས་ཚོགས་ཐེངས་དང་པོ་འཚོགས་པ།

       ཟླ3ཚེས30ཉིན་གྱི་ཕྱི་དྲོར་མཚོ་ལྷོ་ཁུལ་གྱིས་བོད་ཡིག་བརྡ་ཆད་གསར་བ་ཚད་གཞི་ཅན་གྱི་བྱ་བའི་མཉམ་འབྲེལ་གྲོས་ཚོགས་ཐེངས་དང་པོ་དང་། 《མཚོ་ལྷོ་ཁུལ་གྱི་དུས་མཐུན་རྒྱ་བོད་བརྡ་ཆད་གསར་བའི་ལག་དེབ》（འདོན་ཐེངས་དང་པོ）འགྲེམས་སྤེལ་མཛད་སྒོ་ཆབ་ཆ་རུ་འཚོགས་པ་རེད། མཚོ་ལྷོ་ཁུལ་མི་དམངས་སྲིད་གཞུང་གི་ཁུལ་དཔོན་གཞོན་པ་དཔའ་འབུམ་ཐར་ཚོགས་འདུར་ཞུགས་ཏེ་གསུང་བཤད་གནང་བ་དང་། ཁུལ་བོད་ཡིག་བརྡ་ཆད་གསར་བ་ཚད་གཞི་ཅན་གྱི་བྱ་བའི་མཉམ་འབྲེལ་གྲོས་ཚོགས་ཀྱི་ཁོངས་མི་དང་ཁུལ་མི་དམངས་ཞིབ་དཔྱོད་ཁང་། ཁུལ་མི་དམངས་ཁྲིམས་ཁང་། ཁུལ་དང་རྫོང་ལྔའི་མི་རིགས་སྐད་ཡིག་བྱ་བའི་ལྟེ་གནས། རྫོང་སོ་སོའི་སྨྱན་སྦྱོར་ལྟེ་གནས་བཅས་ཀྱི་ཡིག་སྒྱུར་མི་སྣ་ཚོགས་འདུར་ཞུགས་པ་རེད།
      ཚོགས་ཐོག་ཏུ་མཚོ་ལྷོ་ཁུལ་མི་རིགས་སྐད་ཡིག་བྱ་བའི་ལྟེ་གནས་ཀྱི་ཀྲུའུ་རེན་སྙིང་བྱམས་རྒྱལ་གྱིས《མཚོ་ལྷོ་ཁུལ་གྱི་བོད་ཡིག་བརྡ་ཆད་གསར་བ་ཚད་གཞི་ཅན་གྱི་བྱ་བའི་མཉམ་འབྲེལ་གྲོས་ཚོགས་ལམ་ལུགས་འཛུགས་རྒྱུའི་སྐོར་གྱི་བརྡ་ཐོ》བརྒྱུད་བསྒྲགས་བྱས་པ་དང་། ཁུལ་མི་རིགས་སྐད་ཡིག་བྱ་བའི་ལྟེ་གནས་ཀྱི་ཡིག་སྒྱུར་ཞིབ་བཤེར་བ་གཞོན་པ་ལྷ་འབྲུག་རྒྱལ་གྱིས《མཚོ་ལྷོ་ཁུལ་གྱི་རྒྱ་བོད་བརྡ་ཆད་གསར་བའི་ལག་དེབ》རྩོམ་སྒྲིག་བྱས་ཚུལ་ངོ་སྤྲོད་བྱས་ཤིང་། ཁུལ་བོད་ཡིག་བརྡ་ཆད་གསར་བ་ཚད་གཞི་ཅན་གྱི་བྱ་བའི་མཉམ་འབྲེལ་གྲོས་ཚོགས་ཀྱི་ཁོངས་མིས་རང་སོ་སོའི་སྡེ་ཚན་གྱི་ལས་སྒོའི་ངོས་ནས་བརྡ་ཆད་གསར་བའི་ཚད་གཞི་ཅན་གྱི་བྱ་བའི་ཐད་དུ་རང་གི་བསམ་བློ་བརྗེ་རེས་བྱས།       དཔའ་འབུམ་ཐར་གྱི་ནན་གྱིས་བསྟན་དོན། 2021ལོ་ནི“ལྔའི་བཅུ་བཞི་བ”འགོ་ཚུགས་པའི་ལོ་ཡིན་ཞིང་། བོད་ཡིག་གི་བརྡ་ཆད་གསར་བའི་བྱ་བ་ཇི་ལྟར་ཡག་པོ་བསྒྲུབ་རྒྱུ་ནི་བོད་སྐད་ཡིག་ལས་དོན་པའི་མདུན་དུ་ལྷགས་པའི་ལས་འགན་གལ་ཆེན་དང་འགན་འཁྲི་གལ་ཆེན་ཞིག་ཀྱང་རེད།
      གཅིག་ནས་ཆབ་སྲིད་ཀྱི་ལངས་གནས་བརྟན་དུ་བཏང་ནས་ཆབ་སྲིད་ཀྱི་འགན་འཁྲི་འཁུར་ཤུགས་ཆེ་རུ་གཏོང་དགོས།
      གཉིས་ནས་བསམ་བློའི་ངོས་འཛིན་མཐོ་རུ་བཏང་ནས་འགན་འཁྲི་དངོས་འབེབས་བྱེད་ཤུགས་ཆེ་རུ་གཏོང་དགོས།
      གསུམ་ནས་བྱ་བའི་མཉམ་ཤུགས་གཅིག་ཏུ་བསྒྲིལ་ནས་ཕན་འབྲས་དངོས་ཐོན་པར་འགན་ལེན་བྱེད་དགོས།