མཚོ་སྔོན་པོ་དྲ་བས་ཆུ་མོ་ཡོས་ལོའི་དཔྱིད་གསར་དུས་ཆེན་ལ་ཕུལ་བའི་ཤིས་ཚིག

       དུས་ཚོད་ནི་ཇི་འདྲའི་མགྱོགས་ཨང་། ལོ་ངོ་གཅིག་འདི་ལྟར་མིག་ལྡེབ་དབང་ཙམ་གྱིས་འདས་ཏེ་ད་ནི་གནམ་ལོ་གསར་པ་ཞིག་ཚུར་བསུ་ལ་ཉེ། ཚང་མ་བྲེལ་ཟིང་གིས་འདུར་བའི་སྐབས་འདིར་ངེད་མཚོ་སྔོན་པོ་དྲ་བའི་ལས་མི་ཡོངས་ཀྱིས་མདོ་དབུས་ཁམས་གསུམ་གྱི་རིགས་གཅིག་སྤུན་ཟླ་ཡོངས་ལ་གནམ་ལོ་གསར་པར་བཀྲ་ཤིས་བདེ་ལེགས་ཀྱི་འཚམས་འདྲི་ཞུ།
       2022ལོ་ནི་ཏང་གི་ཚོགས་ཆེན་ཉི་ཤུ་པ་རྒྱལ་ཁའི་ངང་འཚོགས་ཤིང་ཁྱོན་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་འཛུགས་སྐྲུན་དང་ཀྲུང་གོའི་རྣམ་པའི་དེང་རབས་ཅན་དུ་འགྱུར་བར་བརྟེན་ནས་ཀྲུང་ཧྭ་མི་རིགས་ཀྱི་རླབས་ཆེན་བསྐྱར་དར་མངོན་འགྱུར་ཡོང་བར་སྒོ་ཀུན་ནས་སྐུལ་འདེད་གཏོང་བར་འཆར་འགོད་ལེགས་པོར་བཏང་བའི་ལོ་གལ་ཆེན་ཞིག་ཡིན་ལ། མཚོ་སྔོན་པོ་དྲ་བ་གཉེར་ནས་ལོ་ཡི་འཁོར་མོ་བཅོ་ལྔ་འགོར་བའི་ལོ་ཡང་ཡིན། རིང་རྒྱུ་མེད་ལ་ཐུང་རྒྱུའང་མེད་པའི་མི་ལོ་བཅོ་ལྔའི་ནང་རྒྱ་བོད་ཡིག་རིགས་གཉིས་ཀྱི་ལམ་ནས་རང་ས་གནས་གཙོ་བྱས་ཏེ་རྒྱལ་ནང་གི་གསར་འགྱུར་དང་རིག་གནས་བརྒྱུད་སྒྲོག་གི་ལས་ལ་དུས་དང་རྣམ་པ་ཀུན་ཏུ་གཞོལ་ནས་དུས་རབས་གསར་བའི་སྨྱན་བྱད་ལས་རིགས་ཁྲོད་མཛུབ་སྟོན་གྱི་ནུས་པ་དང་ཁྱབ་སྤེལ་གྱི་ནུས་པ་བླ་ལྷག་གིས་སྐྲུན་ཡོད་པ་ནི་ཁ་ཚོན་བཅད་དེ་སྨྲ་བར་སྤོབས།        མ་འོངས་པར་ཡང་ངེད་དྲ་བས་དུས་དང་རྣམ་པ་ཀུན་ཏུ་དུས་རབས་ཀྱི་འགྲོ་ཕྱོགས་དང་ལྷག་པར་དུ་མཚོ་ལྷོ་ཁུལ་གྱི་དྲ་རྒྱའི་འདུ་ཤེས་འཛིན་སྟངས་དང་གླེང་ཕྱོགས་ཀྱི་ཁྲིད་སྟོན་ཡང་དག་པ་མཐའ་འཁྱོངས། དྲ་རྒྱའི་བདེ་འཇགས་ཀྱི་གཡུལ་ས་བརྟན་དུ་བཏང་ནས། བོད་འབྲེལ་ས་ཁུལ་གྱི་ཁྱབ་ཁོངས་ཁག་གི་བརྗོད་བྱ་སྔོག་འདོན་གཏིང་ཟབ་བཅས་བྱས་ཏེ་ཕྱོགས་ཡོངས་དང་ཟུར་ཚད་མང་པོའི་ཐོག་ནས་དྲིལ་བསྒྲགས་མང་དུ་བྱེད་འཆར་ཡོད་ལ། ནང་དོན་དང་སྒྲིག་འགོད་ཀྱི་ཐད་ནས་ཀྱང་སྔར་ལས་འཐུས་ཇེ་ཚང་དང་ཕུན་སུམ་ཇེ་ཚོགས་སུ་གཏོང་བར་རང་ནུས་གང་ཡོད་གདོན་འཆར་ཡོད། དེ་བཞིན་དུ་ཁྱེད་རྒྱ་ཆེའི་ཀློག་མཁན་དང་རྩོམ་པ་པོ་མང་པོས་ཀྱང་སྔར་བཞིན་རིན་ཐང་བྲལ་བའི་ལྗགས་རྩོམ་མང་པོ་དུས་ཐོག་ཏུ་བསྐུར་གནང་མཛད་དེ་ཀློག་པ་པོ་མང་པོའི་འདོད་འདུན་ཡིད་བཞིན་དུ་བསྐང་རྒྱུར་དྲ་བའི་རྩོམ་སྒྲིག་པས་དུས་ནམ་ཡང་རེ་ཞིང་སྒུག་ནས་ཡོད་དོ། །
       མཐར་གནམ་ལོ་གསར་པའི་ནང་རི་ཁ་བ་གངས་རིའི་ལྗོངས་ཀྱི་རིགས་གཅིག་སྤུན་ཟླ་ཡོངས་ལ་ནད་མེད་ཚེ་རིང་དང་འདོད་དོན་ཡིད་བཞིན་འགྲུབ་པའི་བཀྲ་ཤིས་སྨོན་འདུན་ཞུའོ། །