མཚོ་འཕགས་སྨི5000ཡོད་པའི་སྡིངས་ཆུང་བྲག་ཕུག་གི་གནའ་ཤུལ།

       སྤྱི་ལོ2021ལོའི་ཟླ7པར། མཉམ་འབྲེལ་གནའ་རྫས་རྟོག་ཞིབ་རུ་ཁག་ཞིག་གཞིས་རྩེ་གྲོང་ཁྱེར་འབྲོང་པ་རྫོང་ཁྱུང་མགོ་ཤང་ཉེ་འགྲམ་གྱི་མཚོ་འཕགས་སྨི5000ཡོད་པའི་རི་ཁུལ་ཞིག་ཏུ་སླེབས་ཡོད། དེ་གར་ངོ་མཚར་ཆེ་བའི་ས་འོག་བྲག་ཕུག་ཞིག་ཡོད་པ་དང་། བྲག་ཕུག་དེ་ནས་མིའི་རིགས་ཀྱི་རུས་པ་དང་སྲོག་ཆགས་ཀྱི་རུས་པ་མང་པོ་ཞིག་ཐོན་ཡོད། སྡིངས་ཆུང་བྲག་ཕུག་གི་གནའ་ཤུལ་དེ་ནི་མིག་སྔར་ཀྲུང་གོར་ཤེས་རྟོགས་བྱུང་བའི་མཚོ་འཕགས་མཐོ་ཤོས་ཀྱི་གནའ་རྫས་རྟོག་ཞིབ་རྗེས་ཤུལ་ཞིག་ཡིན་ལ། བོད་ཀྱི་ཡི་གེ་མ་བྱུང་གོང་གི་ལོ་རྒྱུས་སྐབས་ཀྱི་གནའ་ཤུལ་རྐྱང་པའི་ཁྲོད་མིའི་རིགས་ཀྱི་རུས་པ་དང་སྲོག་ཆགས་ཀྱི་རུས་པའི་གྲངས་འབོར་མང་ཤོས་ཡོད་པའི་རྗེས་ཤུལ་ཞིག་ཀྱང་རེད།
       མཉམ་འབྲེལ་གནའ་རྫས་རྟོག་ཞིབ་རུ་ཁག་དེ་ནི་བོད་རང་སྐྱོང་ལྗོངས་རིག་དངོས་སྲུང་སྐྱོབ་ཞིབ་འཇུག་ཁང་དང་། སི་ཁྲོན་སློབ་ཆེན་གནའ་རྫས་རྟོག་ཞིབ་རིག་གནས་རྟེན་རྫས་སློབ་གླིང་། ཀྲུང་གོ་ཚན་རིག་ཁང་གི་གནའ་བོའི་སྒལ་ཚིགས་སྲོག་ཆགས་དང་གནའ་བོའི་མིའི་རིགས་ཞིབ་འཇུག་ཁང་། འབྲོང་པ་རྫོང་རིག་གནས་ཅུས། ཀུའེ་ཀྲོའུ་ཞིང་ཆེན་རི་སའི་ཐོན་ཁུངས་ཞིབ་འཇུག་ཁང་བཅས་ལས་གྲུབ་པ་ཞིག་རེད།
       གལ་ཏེ་ལམ་སྣེ་ཁྲིད་མཁན་མེད་ན། གནའ་རྫས་རྟོག་ཞིབ་རུ་ཁག་གིས་ས་འོག་གི་བྲག་ཕུག་དེ་རྙེད་དཀའ་བ་ཞིག་རེད། རྒྱུ་མཚན་ནི་དེའི་འཛུལ་སྒོའི་ཚངས་ཐིག་ལ་ལི་སྨི60ལས་མེད་པ་མ་ཟད་ཧ་ཅང་རྙེད་དཀའ། བྲག་ཕུག་འཚོལ་ཞིབ་རུ་ཁག་གིས་སྔོན་ལ་ལྗང་མདོག་གི་སྐས་རིམ་རིང་པོ་ཞིག་བརྒྱུད་བྲག་ཕུག་ནང་འཛུལ་ཡོད།
       བྲག་ཕུག་རྟོག་ཞིབ་མི་སྣ། མར་བབ་ན་ཆོག ག་ལེར་ཡིན་དྭ།        སྡིངས་ཆུང་བྲག་ཕུག་ནང་ཁུལ་ནི་དཔེ་མཚོན་ཅན་གྱི་ཁ་སི་ཐེ་ས་དབྱིབས་ཤིག་རེད། མུ་མཐུད་དེ་འོག་རིམ་གྱི་ཐོག་ས་གཉིས་པར་ལྟ་ཞིབ་བྱེད་སྐབས། དཀའ་གནད་གསར་པ་ཞིག་འཕྲད་ཡོད་པ་སྟེ། གོང་འོག་རིམ་པ་གཉིས་ཀྱི་བྲག་ཕུག་བར་རིང་ཚད་ལ་སྨི14ཡོད་པའི་ཁྲོན་པ་ཞིག་ཡོད་པ་དེ་ནི་ཐོག་བརྩེགས་གསུམ་གྱི་མཐོ་ཚད་དང་མཚུངས།
       ཀུའེ་ཀྲོའུ་ཞིང་ཆེན་རི་སའི་ཐོན་ཁུངས་ཞིབ་འཇུག་ཁང་གི་བྲག་ཕུག་རྩད་ཞིབ་རིགས་གཅིག་མཁས་ཅན་ཝང་ཏེ་ཡོན་གྱིས། དཀའ་ཚེགས་ཆེ་ཤོས་ནི་སྨི་བཅུ་གྲངས་ཡོད་པའི་ཁྲོན་པ་དེ་རེད། བྱས་ཙང་ང་ཚོས་རྒྱུན་དུ་ཐག་པ་གཅིག་ལ་བརྟེན་ནས་མི་སྣ་ཡར་འཛེགས་མར་བབ་བྱེད་ཀྱི་ཡོད་ཅེས་གསུངས།
       གཞི་ནས་རུ་མི་རྣམས་དཀའ་ཚེགས་ཆེ་བའི་ངང་འོག་རིམ་གྱི་བྲག་ཕུག་ཏུ་སླེབས་པ་དང་། དེར་གཡས་གཡོན་དུ་ས་དོང་གཉིས་ཡོད་པ་དང་རིང་ཚད་ལ་སྨི50ཡོད། ས་ངོས་སུ་མིའི་རིགས་ཀྱི་རུས་པ་དང་སྲོག་ཆགས་ཀྱི་རུས་པ་མང་པོ་སྤུངས་ཡོད་པ་རེད།
       ལུས་ཧུང་ལེའང་གིས། ངས་ཐེངས་གཅིག་ལ་རུས་པ་ག་ཚོད་སྒྲུག་ཡོང་མི་འདུག་གམ།        ཐོག་མའི་ཆོད་སྡོམ་དང་བསྡོམས་རྩིས་བྱས་པ་བརྒྱུད། གནའ་རྫས་རྟོག་ཞིབ་པས་སྡིངས་ཆུང་བྲག་ཕུག་ནང་གི་མིའི་རིགས་ཀྱི་དངོས་པོའི་གྲངས་ཚད་ཉུང་མཐར་ཡང་ཁག100ཡོད་པ་དང་། སྲོག་ཆགས་ཀྱི་དངོས་པོའི་གྲངས་ཚད་ཉུང་མཐར་ཡང་ཁག350ཡོད་པ་ཤེས་རྟོགས་བྱུང་ཡོད།
       བོད་རང་སྐྱོང་ལྗོངས་རིག་དངོས་སྲུང་སྐྱོབ་ཞིབ་འཇུག་ཁང་གི་རིག་གནས་རྟེན་རྫས་ཁང་གི་འགན་འཁུར་བ་འཕྲིན་ལས་ཚེ་རིང་གིས། བྲག་ཕུག་དེའི་ནང་མིའི་རིགས་ཀྱི་རུས་པ་དང་སྲོག་ཆགས་ཀྱི་རུས་པ་མང་པོ་སྦས་ཡོད་པ་དེར་ང་ཚོས་བྲག་ཕུག་ནང་གི་དུར་རྫས་ཤུལ་བཞག་ཅེས་བརྗོད་ཀྱི་ཡོད། གནའ་རྫས་ཤུལ་བཞག་དེ་ལྟ་བུ་ནི་བོད་ལྗོངས་ཀྱི་རྟོག་ཞིབ་ལས་ཀའི་ནང་ཧ་ཅང་མཐོང་དཀོན་པ་ཞིག་རེད་ཅེས་གསུངས།        བོད་རང་སྐྱོང་ལྗོངས་རིག་དངོས་སྲུང་སྐྱོབ་ཞིབ་འཇུག་ཁང་གི་འགོ་འཛིན་གཞོན་པ། ཞིབ་འཇུག་པ་ཤར་རྒན་དབང་འདུས་ལགས་ཀྱིས། བྲག་ཕུག་དུར་ས་ནི། རི་བོ་ཧི་མ་ལ་ཡའི་ལྷོ་ཕྱོགས་ཀྱི་དམིགས་བསལ་ས་ཁོངས་རིག་གནས་ཀྱི་འདས་མཆོད་གོམས་སྲོལ་དང་འབྲེལ་བ་ཡོད་པ་ཞིག་ཡིན་སྲིད་ཅེས་གསུངས།        མིག་སྔར་གནའ་རྫས་རྟོག་ཞིབ་ཚོགས་པས་གཟུགས་གཞི་མིའི་རིགས་རིག་པ་དང་། སྲོག་ཆགས་གནའ་རྫས་རྟོག་ཞིབ་རིག་པ། གནའ་བོའི་གཞི་རྒྱུ་གནའ་རྫས་རྟོག་ཞིབ་རིག་པ། བྲག་ཕུག་ཞིབ་འཇུག་སོགས་རིག་ཚན་མང་པོའི་ཞིབ་འཇུག་བྱེད་བཞིན་ཡོད། དཔང་རྟགས་དེ་རྣམས་ཀྱིས་བོད་ལྗོངས་ནུབ་རྒྱུད་ཀྱི་སྔ་དུས་ལོ་རྒྱུས་དང་རི་བོ་ཧི་མ་ལ་ཡའི་རི་ཁུལ་བརྒལ་བའི་རིག་གནས་སྤེལ་རེས་ལ་ཞིབ་འཇུག་བྱེད་པའི་ཐད་རིག་གཞུང་གི་དོན་སྙིང་གལ་ཆེན་ལྡན་ཡོད་པ་རེད།