བོད་ལྗོངས་ཀྱི་བྲག་ཕུག་དགོན་པར་མཐོང་དཀོན་པའི་བོད་བཙན་པོའི་དུས་ཀྱི་བྲག་བརྐོས་རི་མོ་རྙེད་པ།

       རྒྱུས་ལོན་པ་ལྟར་ན། 2021ལོར་བོད་རང་སྐྱོང་ལྗོངས་རིག་དངོས་སྲུང་སྐྱོང་ཞིབ་འཇུག་ཁང་དང་སྨར་ཁམས་རྫོང་རིག་གནས་ཅུའུ། ཆབ་མདོ་གྲོང་ཁྱེར་རིག་དངོས་སྲུང་སྐྱོང་ཞིབ་འཇུག་ཁང་གིས་བརྟག་དཔྱད་ཚན་ཆུང་བཙུགས་ནས། སྨར་ཁམས་རྫོང་འཇང་མི་རིགས་ཤང་ལྕང་ལུང་གྲོང་ཚོ་དང་། སྤང་མདའ་ཤང་ལྷ་མདུན་གྲོང་ཚོའི་གནས3ནས་བསྡོམས་པས་བྲག་བརྐོས་རི་མོ་ནང་བསྟན་སྐུ་འདྲ11རྙེད་པ་དང་། དེའི་ནང་ནང་བསྟན་སྐུ་འདྲ10ནི་དཔེ་མཚོན་རང་བཞིན་གྱི་བོད་བཙན་པོའི་དུས་ཀྱི་གཟུགས་བརྙན་རྣམ་པ་ཡིན།        “བྲག་བརྐོས་རི་མོ་རྩ་ཆེན་འདི་དག་གིས་སྔར་ལས་ལྷག་པའི་སྒོ་ནས་བོད་བཙན་པོའི་དུས་ཀྱི་ནང་བསྟན་སྐུ་འདྲ་ཞིབ་འཇུག་བྱེད་པའི་བར་སྟོང་ཁྱབ་ཚུལ་དང་། སྒྱུ་རྩལ་རྒྱུད་འཛིན་དང་བསམ་བློ་རྒྱུད་འཛིན་སོགས་ལ་རྒྱུ་ཆ་གལ་ཆེན་བསྐྲུན་ཡོད། དེའི་ནང་ང་ཚོས་ཐེག་ཆེན་སོགས་ཀྱི་བསམ་བློ་འོག་མངོན་པའི་སེང་གེ་བཞོན་པའི་འཇམ་པའི་དབྱངས་དང་གླང་ཆེན་བཞོན་པའི་འཕགས་པ་ཀུན་ཏུ་བཟང་པོའི་སྐུ་འདྲ་གཉིས་རྙེད་པ་དེས་ཐང་རྒྱལ་རབས་དུས་ཀྱི་རྒྱ་བོད་རིག་གནས་བརྗེ་རེས་དང་ཐང་བོད་གནའ་ལམ་ཞིབ་འཇུག་བཅས་ཀྱི་ཕྱོགས་ལ་རིག་གཞུང་གི་རིན་ཐང་གལ་ཆེན་ལྡན་ཡོད”ཟེར།
       བོད་ལྗོངས་ཀྱི་བྲག་ཕུག་དགོན་དང་བྲག་བརྐོས་སྐུ་འདྲ་ཆེད་དོན་བརྟག་དཔྱད་ལས་དོན་དེ2020ལོའི་ཟླ12པར་དངོས་སུ་མགོ་བརྩམས་པ་དང་། གཞི་གྲངས་ལས་མངོན་པ་ལྟར་ན། མིག་སྔའི་བར་དུ་བོད་ལྗོངས་སུ་བསྡོམས་པས་བྲག་ཕུག་དགོན་པ་དང་བྲག་བརྐོས་སྐུ་འདྲ་གནས277ལ་བརྟག་དཔྱད་བྱས་ཤིང་། དེའི་ནང་རྒྱལ་ཡོངས་ཀྱི་གཙོ་གནད་རིག་དངོས་སྲུང་སྐྱོང་སྡེ་ཚན་གནས7དང་། བོད་རང་སྐྱོང་ལྗོངས་རིམ་པའི་རིག་དངོས་སྲུང་སྐྱོང་སྡེ་ཚན་གནས23། གྲོང་ཁྱེར་དང་རྫོང་རིམ་པའི་རིག་དངོས་སྲུང་སྐྱོང་སྡེ་ཚན་གནས48། སྤྱིར་བཏང་གི་རིག་དངོས་ས་ཚིགས199བཅས་ཚུད་ཡོད། །