མཁས་དབང་དགེ་ཆོས་མཆོག་གིས་གཞུང་སར་ཕུལ་བའི་ཞུ་མཆིད་ཡི་གེ

       གུས་འབངས་༧རྒྱལ་རབས་རྩོམ་སྒྲིག་པ་དགེ་འདུན་ཆོས་འཕེལ་ནས་ཞུ་བ། ཆོས་རྒྱལ་ཁྲི་ལྡེ་སྲོང་བཙན་སྐབས་སུ་བཞེངས་པའི་སྐར་ཆུང་རྡོ་རྗེ་དབྱིངས་ཀྱི་གཙུག་ལག་ཁང་གི་གནས་ཤུལ་ལྷ་སའི་ཉེ་འགྲམ་ར་མ་སྒང་དུ་ད་ལྟ་ཨ་ཎིའི་དགོན་པ་སངས་རྒྱས་དགོན་ཞེས་ཡོད་པ་དེ་དག་འཁྲུལ་མེད་ཡིན་ཞིང་། དེར་བྱེ་མས་ཕྱེད་ཙམ་ནུབ་པའི་རྡོ་རིང་སྤུས་དག་གིས་སྟེང་དུ་ཆོས་རྒྱལ་ཉིད་ཀྱི་སྐུ་དུས་སུ་བྲིས་པའི་ཡི་གེ་ཡང་གསལ་བར་བཞུགས་པ་དེ་དག ད་ལྟ་བྱེ་དཀྱིལ་དུ་བདག་མེད་ལྟ་བུར་ལུས་འདུག་པ་དེ་བཞིན་ཆག་སྐྱོན་མ་བྱུང་གོང་བྱེ་བསང་གིས་ལྕགས་རི་ཆུང་ངུ་ཞིག་བརྩིགས་ཐུབ་ན་ཧ་ཅང་ཡག་པོ་ཡོང་བ་འདུག་པས་གཞུང་ས་མཆོག་ནས་ཐུགས་འགན་གྱིས་ཨར་པོའི་ལུས་ཁུངས་ཤིག་ཏུ་བཀའ་ཁྱབ་ཐུགས་རྗེ་ཆེ་བ་དང་། ད་དུང་ལོ་ཤས་ཀྱི་སྔོན་དུ་ད་ལྟ་ཡོད་པའི་རྡོ་རིང་དེའི་ཏོག་ཇི་ལྟ་བ་གཅིག་བྱེ་འོག་ནས་ཨ་ཎིའི་དགོན་པར་རྙེད་འདུག་པར་བརྟེན། རྡོ་རིང་མ་མོ་ད་ལྟ་བྱེ་འོག་ཏུ་གཟིམས་གཟིམས་པར་ཡོད་ངེས་སྟབས་དེ་ཁུལ་བྱེ་གསེབ་ཏུ་བཙལ་འཚོལ་གནང་ཚེ་གལ་སྲིད་རྙེད་ན༧རྒྱལ་རབས་རྩོམ་འཕྲོར་ཡང་ཕན་འདོགས་ཡོད་ངེས་ཤིང་། ཕྱོགས་མཚུངས་དེང་སྐབས༧རྒྱལ་རབས་རྩོམ་འཕྲོ་འདིར་ཤིན་ཏུ་མཁོ་བ་རྩེ་ཞོལ་ཕྱི་མའི་རྡོ་རིང་གི་ཡི་གེ་དེ་བཞིན་དགོས་འདུག་པ་གཞུང་སར་བཤུས་ཟིན་ཞིག་ཡོད་ན་གསོལ་རས་དང་། མེད་ཚེ་ཨེ་པར་བཀའ་ཁྱབ་ཀྱིས་འཕྲད་དུ་ཚར་གཅིག་བཤུ་བཅུག་གནང་། ཐུགས་རྗེ་ཆེ་བ་ཞུ་རྒྱུའི་ཚིག་ཐོ་ཤོག་ལྷེ་སྙན་ཞུར་ཕུལ། 
(རྡོ་སྦིས་ཚེ་རིང་རྒྱལ་ལགས་ཀྱི་ཞལ་བཤུས་གཞིར་བཟུང་ཞིང་མ་ཡིག་དང་བསྟུན་ནས་བཀོད།)

རྩོམ་ཁུངས། ༢༠༡༤ལོའི«བོད་ལྗོངས་ཡིག་ཚགས»དེབ་དང་པོ།