མཚོ་སྔོན་ཞིང་ཆེན་གྱི2023ལོའི་མཐོ་རྒྱུགས་ཀྱི་རྒྱུགས་འབྲས་དུས་འདི་ལ་བསྒྲག་རྒྱུ་རེད།

       གསར་འགོད་པས་མཚོ་སྔོན་ཞིང་ཆེན་སློབ་གསོ་སློབ་བསྡུའི་ཡིག་རྒྱུགས་ཁང་ནས་ཤེས་གསལ་ལྟར་ན། ཟླ6པའི་ཚེས9ཉིན་གྱི་ཕྱི་དྲོར། མཚོ་སྔོན་ཞིང་ཆེན་གྱི2023ལོའི་མཐོ་རྒྱུགས་བདེ་བླག་ངང་མཇུག་བསྒྲིལ་པ་དང་། ཟླ6པའི་ཚེས25ཉིན་རྒྱུག་འབྲས་ཁྱབ་བསྒྲགས་བྱ་རྒྱུ་རེད།
       ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་གི་མགོ་ཁྲིད་འོག ཞིང་ཆེན་ཡོངས་ཀྱི་གོང་འོག་ཚང་མས་ཐུན་མོང་གི་འབད་བརྩོན་བྱས་པ་བརྒྱུད། ཞིང་ཆེན་ཡོངས་ཀྱི་རྒྱུགས་ཁུལ་སོ་སོའི་རྒྱུགས་དོན་རྩ་འཛུགས་ཚད་ལྡན་དང་། རྒྱུགས་སྲོལ་དང་རྒྱུགས་གཞིའི་སྒྲིག་ལམ་ལེགས་པ། རྒྱུགས་ཤོག་བདེ་འཇགས་ཡིན་པ། ཞབས་ཞུའི་བྱ་ཐབས་གནད་ལ་འཁེལ་བ་བཅས་ཡིན་པས། “བདེ་འཇགས་མཐོ་རྒྱུགས”ཀྱི་དམིགས་ཚད་མངོན་འགྱུར་བྱུང་། རྗེས་མར། ཞིང་ཆེན་ཡིག་རྒྱུགས་ཁང་གིས་རྒྱུན་མཐུད་ངང་རྒྱུགས་ཤོག་དཔྱད་བསྡུར་དང་། དང་བླངས་རེའུ་མིག་འབྲི་བ། བསྡུ་ལེན་སོགས་ཀྱི་འབྲེལ་ཡོད་ལས་དོན་སྤེལ་རྒྱུ་རེད། ཟླ6པའི་ཚེས25ཉིན་སློབ་བསྡུའི་ཚོད་འཛིན་སྐར་གྲངས་ཀྱི་ཚད་གཞི་ཁྱབ་བསྒྲགས་བྱ་རྒྱུ་ཡིན་པ་དང་། རྒྱུགས་སྤྲོད་སློབ་མའི་རྒྱུགས་འབྲས་འདྲི་རྩད་སྟེགས་བུ་བསྐྲུན་རྒྱུ་རེད། རྒྱ་ཆེའི་རྒྱུགས་སྤྲོད་སློབ་མས“མཚོ་སྔོན་ཞིང་ཆེན་གྱི་སློབ་གསོའི་ཡིག་རྒྱུགས་དྲ་བ”དང་། “མཚོ་སྔོན་ཞིང་ཆེན་གྱི་སློབ་གསོའི་སློབ་བསྡུའི་རྒྱུགས་ལེན”གྱི་སྐད་འཕྲིན་སྤྱི་སྟེགས་སྟེང་བསྒྲགས་པའི་ཆ་འཕྲིན་ལ་དོ་ཁུར་བྱས་ནས། དུས་ཐོག་ཏུ་གནས་ཚུལ་གསར་པར་རྒྱུས་ལོན་བྱས་ཆོག །