ཤུལ་བཞག་རྒྱུ་ནོར་ཤུལ་འཛིན་སྐོར་གྱི་ཁྲིམས་ཁྱབ་ཤེས་བྱ།

       གཅིག རང་བྱུང་མི་ཚེ་ལས་འདས་རྗེས་རྒྱུ་ནོར་གང་དག་ཤུལ་བཞག་གི་ཁོངས་སུ་གཏོགས་སམ།
       «ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་དམངས་དོན་ཁྲིམས་གཞུང»གི་དོན་ཚན1122པའི་ནང་གཏན་འབེབས་བྱས་དོན། ཤུལ་བཞག་རྒྱུ་ནོར་ནི་རང་བྱུང་མི་ཚེ་ལས་འདས་སྐབས་ཤུལ་དུ་བཞག་པའི་མི་སྒེར་གྱི་ཁྲིམས་མཐུན་རྒྱུ་ནོར་ཡིན། བཅའ་ཁྲིམས་ནང་གཏན་འབེབས་བྱས་པའམ་ཤུལ་ནོར་གང་དེའི་ངོ་བོར་གཞིགས་ནས་ཤུལ་འཛིན་བྱས་མི་ཆོག་པ་གཏན་ལ་ཕབ་པ་ཡིན་ན་ཤུལ་འཛིན་བྱས་མི་ཆོག
       དོན་ཚན1153པའི་ནང་གཏན་འབེབས་བྱས་དོན། བཟའ་ཟླ་ཐུན་མོང་ལ་དབང་བའི་རྒྱུ་ནོར་ལ་ཁ་ཆད་བཞག་ཡོད་པ་ཕུད། ཤུལ་བཞག་རྒྱུ་ནོར་བགོ་བཤའ་རྒྱག་སྐབས། སྔོན་ལ་ཐུན་མོང་ལ་དབང་བའི་རྒྱུ་ནོར་གྱི་ཕྱེད་ཀ་བཟའ་ཟླར་སྤྲོད་དགོས་པ་དང་། དེའི་བྱིངས་རྣམས་ཤུལ་འཛིན་མཁན་གྱི་ཤུལ་བཞག་རྒྱུ་ནོར་ཡིན། ཁྱིམ་ཚང་ཐུན་མོང་གི་རྒྱུ་ནོར་ཡིན་ན། ཤུལ་བཞག་རྒྱུ་ནོར་བགོ་བཤའ་རྒྱག་སྐབས་ཐོག་མར་མི་གཞན་པའི་རྒྱུ་ནོར་ལོགས་སུ་བགོ་དགོས།
       མི་སྒེར་གྱི་ཁྲིམས་མཐུན་རྒྱུ་ནོར་ནི་སྤྱི་དམངས་རང་ཉིད་ཀྱི་ངལ་རྩོལ་དང་ཞལ་འདེབས་དང་ལེན། ཤུལ་འཛིན་སོགས་ཀྱི་བྱེད་ཐབས་བརྒྱུད་ནས་ཐོབ་པའི་རྒྱུ་ནོར་ལ་གོ་དགོས། དེར་བྱེ་བྲག་ཏུ་གཤམ་གྱི་རིགས་འདི་དག་འདུས་ཏེ། གཅིག སྤྱི་དམངས་ཀྱི་ཁྲིམས་མཐུན་ཡོང་སྒོ་སྣ་ཚོགས། གཉིས། ཁང་པ་དང་གསོག་དངུལ། འཚོ་བའི་མཁོ་ཆས། གསུམ། ཤིང་དང་ནགས་ཚལ། ཕྱུགས་ཟོག་དང་ཁྱིམ་བྱ། བཞི། མི་སྒེར་གྱིས་ཉར་ཚགས་བྱས་པའི་གནའ་རྫས་དང་དཔེ་ཆའི་སྐོར། ལྔ། བཅའ་ཁྲིམས་སུ་སྤྱི་དམངས་ལ་དབང་བའི་ཐོན་སྐྱེད་རྒྱུ་ཆ། དྲུག རྩོམ་དབང་དང་ཆེད་ཁེའི་བདག་དབང་ཁྲོད་ཀྱི་རྒྱུ་ནོར་ཁེ་དབང་། བདུན། ཁྲིམས་མཐུན་རྒྱུ་ནོར་གཞན་དག མཉམ་འཇོག་དགོས་པ་ཞིག་ནི་བཟའ་ཟླ་གཉིས་ལས་གཅིག་ཚེ་ལས་འདས་ན། སྔོན་ལ་བཟའ་ཟླ་ཐུན་མོང་ལ་དབང་བའི་རྒྱུ་ནོར་བགོ་བཤའ་བརྒྱབ་རྗེས། ད་གཟོད་ཚེ་འདས་ལ་དབང་བའི་རྒྱུ་ནོར་དེ་ཤུལ་བཞག་རྒྱུ་ནོར་དུ་བརྩིས་ནས་ཤུལ་འཛིན་བྱས་ཆོག
གཉིས། ཁ་ཆེམས་བཞག་མེད་ན་བཅའ་ཁྲིམས་སྟེང་ཤུལ་འཛིན་གྱི་གོ་རིམ་དང་ཁྱབ་ཁོངས་ཇི་ལྟར་གཏན་འཁེལ་བྱས་ཡོད་དམ།
       «ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་དམངས་དོན་ཁྲིམས་གཞུང»གི་དོན་ཚན1127པའི་ནང་གཏན་འབེབས་བྱས་དོན། ཤུལ་བཞག་རྒྱུ་ནོར་དག་གཤམ་གསལ་གྱི་གོ་རིམ་ལྟར་ཤུལ་འཛིན་བྱ་རྒྱུ་སྟེ།
       གཅིག གོ་རིམ་དང་པོ་ནི་བཟའ་ཟླ་དང་བུ་ཕྲུག ཕ་མ་བཅས།
       གཉིས། གོ་རིམ་གཉིས་པ་ནི་ཕུ་ནུ་མིང་སྲིང་དང་སྤོ་བོ་སྤོ་མོ། རྨོ་བོ་རྨོ་མོ་བཅས།
       ཤུལ་འཛིན་བྱེད་མགོ་ཚུགས་རྗེས་གོ་རིམ་དང་པོའི་ཤུལ་འཛིན་པས་ཤུལ་འཛིན་བྱ་རྒྱུ་དང་གོ་རིམ་གཉིས་པའི་ཤུལ་འཛིན་པས་ཤུལ་འཛིན་མི་བྱེད་ལ། གོ་རིམ་དང་པོའི་ཤུལ་འཛིན་པ་མེད་ན་ད་གཟོད་གོ་རིམ་གཉིས་པའི་ཤུལ་འཛིན་པས་ཤུལ་འཛིན་བྱ་རྒྱུ།
       གལ་ཏེ་སྤྱི་དམངས་ཚེ་ལས་འདས་ཁར་ཁ་ཆེམས་བཞག་མེད་ན། དེའི་ཤུལ་བཞག་རྒྱུ་ནོར་ཁྲིམས་བཀོད་ཤུལ་འཛིན་གྱི་གོ་རིམ་དང་བགོ་བཤའི་བསྡུར་ཚད་ལྟར་བགོ་བཤའ་རྒྱག་དགོས། ཤུལ་བཞག་རྒྱུ་ནོར་གྱི་རིམ་པ་དང་པོའི་ཤུལ་འཛིན་པ་ནི་བཟའ་ཟླ་དང་བུ་ཕྲུག ཕ་མ་བཅས་ཡིན་ལ། དེ་ཚོའི་ཤུལ་འཛིན་གྱི་ཐོབ་སྐལ་འདྲ་མཉམ་ཡིན་དགོས། བཟའ་ཟླ་འདས་པའི་མནའ་མའམ་མག་པས་སྒྱུག་པོ་སྒྱུག་མོའམ་གྱོས་པོ་གྱོས་མོ་ལ་སྙོར་སྐྱོང་གི་གཙོ་འགན་ཁུར་ཡོད་ན། ཤུལ་བཞག་རྒྱུ་ནོར་གྱི་རིམ་པ་དང་པོ་ལྟར་ཤུལ་འཛིན་བྱས་ཆོག དེ་ཡང་བུ་ཕྲུག་ཅེས་པར་གཉེན་སྒྲིག་བྱས་པའམ་མ་བྱས་པའི་སྔོན་གྱི་བུ་ཕྲུག་དང་བུ་སྐལ་སོགས་འདུ། ཕ་མ་ཞེས་པར་རང་གི་ཕ་མ་དང་ཕ་ཡར་མ་ཡར་སོགས་འདུ། བུ་སྤུན་དང་མིང་སྲིང་གི་ཁོངས་སུ་ཕ་མ་གཅིག་པ་དང་མི་གཅིག་པའི་བུ་སྤུན་མིང་སྲིང་དང་བུ་སྐལ་བཅས་འདུ་བ་ཡིན། །