རྨ་ལྷོ་ཁུལ་རེབ་གོང་སྒྱུ་རྩལ་ཞིབ་འཇུག་ཁང་གི་གནས་ཚུལ་རགས་བཀོད།

       རྨ་ལྷོ་ཁུལ་རེབ་གོང་སྒྱུ་རྩལ་ཞིབ་འཇུག་ཁང་ནི། སྤྱི་ལོ2019ལོའི་ཟླ12པར་བཙུགས་པ་དང་། རེབ་གོང་ཡུལ་གྱི་རིག་གནས་སྒྱུ་རྩལ་སྐོར་གྱི་རྒྱུ་ཆ་འཚོལ་སྡུད་དང་ལེགས་སྒྲིག སྲུང་སྐྱོབ། རྒྱུན་འཛིན། ཞིབ་འཇུག་སོགས་ཀྱི་ལས་ཀ་གཙོ་བོར་གཉེར་བའི་ལས་ཁུངས་ཤིག་ཡིན། ལས་ཁུངས་འདིར་ཟློས་གར་སྒྱུ་རྩལ་ཞིབ་འཇུག་ཚན་ཁག་དང་ཕྱོགས་བསྡུས་སྒྱུ་རྩལ་ཞིབ་འཇུག་ཚན་ཁག ཐང་ག་སྒྱུ་རྩལ་ཞིབ་འཇུག་ཚན་ཁག «རེབ་གོང་སྒྱུ་རྩལ་ཞིབ་འཇུག»དུས་དེབ་རྩོམ་སྒྲིག་ཁང་། ཡིག་ཚགས་ཁང་བཅས་ཞིབ་འཇུག་ཚན་ཁག་ལྔ་རུ་བགོས་ཡོད་པ་དང་། མཚོ་སྔོན་མི་རིགས་སློབ་གྲྭ་ཆེན་མོའི་མི་རིགས་དང་སྤྱི་ཚོགས་རིག་པའི་སློབ་གླིང་གི་དངོས་སྦྱོང་རྟེན་གཞིའང་འདི་རུ་བཙུགས་ཡོད།

       2020ལོར། སྒྱུ་རྩལ་ཞིབ་འཇུག་ཁང་གིས་ཞིང་ཆེན་ཕྱི་ནང་གི་རེབ་གོང་རིག་གནས་ཐད་དུ་ཞིབ་འཇུག་གནང་གིན་པའི་ཆེད་མཁས་པ་གདན་ཞུ་གནང་སྟེ། རེབ་གོང་རིག་གནས་གླེང་སྟེགས་སྐབས་གསུམ་པ་བསྡུས་ཤིང་། ཚོགས་འདུའི་སྟེང་། རེབ་གོང་སྐྱེ་ཁམས་རིག་གནས་དང་ལོ་རྒྱུས་རིག་གནས་ཐད་ཀྱི་སྲུང་སྐྱོབ་དང་ལག་ལེན། རེབ་གོང་ས་ཁུལ་གྱི་མངོན་མིན་ཤུལ་བཞག་རིག་གནས་ཀྱི་ཕྱོགས་ནས་དཔྱད་ཞིབ་དང་བགྲོ་གླེང་གང་མང་གནང་བར་མ་ཟད། རེབ་གོང་སྤྱིའི་སྒྱུ་རྩལ་རིག་གནས་ཀྱི་ཞིབ་འཇུག་དང་ཉམས་ཞིབ། ལག་ལེན་གྱི་ཐད་མཛུབ་ཁྲིད་དང་ཉམས་མྱོང་གི་གྲུབ་འབྲས་མི་དམན་པ་ཐོབ། 2023ལོར་རིག་གནས་གླེང་སྟེགས་ཀྱི་ཉམས་མྱོང་དང་དཔྱད་འབྲས་གཞིར་བཅོལ་ཏེ། རེབ་གོང་སྐྱེ་ཁམས་རིག་གནས་སྲུང་སྐྱོབ་ཁུལ་གྱི་ཤེས་ལྡན་མི་སྣའི་གསོ་སྦྱོང་ཚོགས་འདུ་བསྡུས་ལ། རེབ་གོང་སྐྱེ་ཁམས་རིག་གནས་སྲུང་སྐྱོབ་ཀྱི་ཉམས་མྱོང་དང་ལམ་ཕྱོགས་ཐད་གྲོས་ཞིབ་དང་གླེང་མོལ་མཛད་ཅིང་། སྒྱུ་རྩལ་ཞིབ་འཇུག་གི་སྤྱིའི་རིག་གཞུང་ཁ་ཕྱོགས་དང་ཞིབ་འཇུག་མི་སྣ་གསོ་སྐྱོང་གི་ཐད་ཕན་ནུས་གང་ལེགས་ཐོན། 2021ལོ་ནས་བཟུང་སྟེ། «རེབ་གོང་སྒྱུ་རྩལ་ཞིབ་འཇུག»དུས་དེབ་རྩོམ་སྒྲིག་ཚན་ཁག་གིས«རེབ་གོང་སྒྱུ་རྩལ་ཞིབ་འཇུག»ཅེས་པའི་རྒྱ་བོད་ཡིག་རིགས་གཉིས་ཀྱི་རིག་གཞུང་དུས་དེབ་རྩོམ་སྒྲིག་གནང་གིན་ཡོད་ལ། དེས་ཐོག་མཐའ་བར་གསུམ་དུ་རེབ་གོང་ཡུལ་གྱི་རིག་གནས་སྒྱུ་རྩལ་ཞིབ་འཇུག་གི་ལམ་བུ་སྔར་ལས་མངོན་གསལ་དང་འབུར་ཐོན་ཡོང་བ་གཙོ་གནད་དུ་བཟུང་ནས། ས་གནས་ཀྱི་རིག་གནས་དང་སྒྱུ་རྩལ་གྱི་འཕེལ་རྒྱས་ལ་གཞུང་ལུགས་ཀྱི་རྒྱབ་རྟེན་དང་ལག་ལེན་གྱི་ཉམས་མྱོང་འདོན་སྤྲོད་བྱེད་ཀྱིན་ཡོད། སྔ་རྗེས་སུ་རྩོམ་སྒྲིག་ཁང་འདིར་ཁྱོན་བསྡོམས་རྩོམ་ཡིག་ལྔ་བརྒྱ་ལྷག་འབྱོར་ལ། བོད་ཡིག་དང་རྒྱ་ཡིག་གི་རྩོམ་ཡིག་བརྒྱ་དང་དགུ་བཅུ་ལྷག་དུས་དེབ་སྟེང་བཀོད་ཅིང་། (སྤྱིའི་འདོན་ཐེངས་ལྔ་པ)རྨ་ལྷོ་ཁུལ་ཡོངས་ཀྱི་ལས་ཁུངས་སོ་སོ་གཙོ་བྱས་རྒྱལ་ཡོངས་སྤྱི་ཚོགས་ཞིབ་འཇུག་ཚན་ཁག་བཞི་བརྒྱ་ལྷག་ལ་འདོན་ཐེངས་རེ་རེའི་དུས་དེབ་སྐྱེལ་བ་དང་། ཕྱོགས་ཡོངས་ནས་ཉམས་མྱོང་བརྗེ་རེས་དང་བསམ་འཆར་སྡུད་ལེན་བྱས་ཏེ། སྤྱི་ཚོགས་ལས་རིགས་སོ་སོའི་མི་སྒེར་དང་སྤྱི་པའི་ངོས་ནས་ཀྱང་གདེང་འཇོག་གང་ལེགས་ཐོབ།

       ལོ་འདི་གར། ཞིབ་འཇུག་ཁང་གིས་རེབ་གོང་རིག་གནས་སྐྱེ་ཁམས་སྲུང་སྐྱོབ་དོ་དམ་ལས་ཁུངས་དང་འབྲེལ་ཡོད་གོང་རིམ་ལས་ཁུངས་ཀྱི་ལས་གཞི་ལ་བརྟེན་ནས། རེབ་གོང་ས་ཁུལ་གྱི་ཉིན་སྲིབ་ལྟའི་རྙིང་མའི་དགོན་སྡེ་དྲུག་དང་གྲུབ་པའི་གནས་ཆེན་བརྒྱད། རེབ་གོང་མཆོད་རྟེན། ཤ་སྦྲང་མཆོད་རྟེན། ཆོས་སྤྱོད་ཀྱི་ཆོ་ག་སྣ་ཚོགས་ལས་དྲིལ་བུ་སོགས་རོལ་ཆའི་སྐོར། ཟློས་གར་ཞལ་འབག་སྣ་ཚོགས། རེབ་གོང་ཡུལ་གྱི་གནའ་མཁར་སྐོར་གྱི་ལོ་རྒྱུས་དང་ཡིག་ཚགས་སོགས་འཚོལ་ཞིབ་གནང་བར་མ་ཟད། རེབ་གོང་སྒྱུ་རྩལ་གྱི་རྨང་གཞིའི་དར་སྤེལ་དང་འཕེལ་རྒྱས་ཐད་དུ་གྲུབ་འབྲས་མི་དམན་པ་བཞག་མྱོང་བའི་སྒ་རུ་ལྷ་བཟོ་བློ་བཟང་ཤེས་རབ་དང་བིས་ཐང་འཇའ་མོ་དཔལ་ལྡན་རྒྱ་མཚོ། རྐ་སར་ལྷ་རིས་པ་བྱང་ཆུང་རབ་གསལ། དགེ་འདུན་ཆོས་འཕེལ་བཅས་ཀྱི་རྣམ་ཐར་དང་ལྷ་རིས་སྒྱུ་རྩལ་སྐོར་གྱི་ཁྱད་ཆོས་སྔོག་འདོན་དང་དག་སྒྲིག་གནང་། 2023ལོར། རེབ་གོང་ས་ཁུལ་དང་རྩེ་ཁོག གཅན་ཚ། ཧོ་ནན་བཅས་སུ་སོང་ནས། རེབ་གོང་དྲུག་པའི་ཀླུ་རོལ་དང་རྩེ་ཁོག་ཧོར་བཀའ་བསྟན་རྡོ་རྩིག་ཆེན་མོའི་སྲུང་སྐྱོབ་དང་ལག་ལེན་ཐད་དུ་ཉམས་ཞིབ་གནང་བ་དང་། ཧོ་ནན་རྫོང་དང་གཅན་ཚ་རྫོང་གཉིས་སུ་སོང་སྟེ་རིག་གནས་ཐོན་ལས་ཀྱི་གྲུབ་འབྲས་དང་ཉམས་མྱོང་གི་ཕྱོགས་ནས་བློ་འདྲི་མང་དུ་གནང་སྟེ་ཡུལ་དངོས་བརྟག་དཔྱད་བྱས་པར་གྲུབ་འབྲས་མི་དམན་པ་ཐོབ་བོ། །