ཕོ་བྲང་པོ་ཏཱ་ལ་ནས་འབུ་སྲིན་གསར་པ་ཞིག་རྙེད་འདུག

       ཀྲུང་གོ་ཚན་རིག་ཁང་སྲོག་ཆགས་ཞིབ་འཇུག་སོའོ་ཡི་ཞིབ་འཇུག་པ་པའེ་མིང་གིས་ཕོ་བྲང་པོ་ཏཱ་ལ་ལྟ་བུའི་རིག་གནས་ཀྱི་རིན་ཐང་དང་སྤྱི་ཚོགས་ཀྱི་དོ་ཁུར་བྱེད་ཚད་ཧ་ཅང་མཐོ་བའི་འཛུགས་སྐྲུན་ལ་འབུ་སྲིན་གྱི་རིགས་གསར་པ་ཤེས་རྟོགས་བྱུང་བ་དེའི་ཐོག་ནས། འཛམ་གླིང་ཐོག་ད་དུང་ངོས་འཛིན་ཐུབ་མེད་པའི་སྐྱེ་དངོས་ལྐོག་གྱུར་སྣ་མང་རང་བཞིན་འབོར་ཆེན་གནས་ཡོད་པ་གང་ལེགས་མཚོན་པར་བྱས་ཡོད་ལ། སླད་ཕྱིན་བརྒྱུད་རིམ་ལྡན་པའི་ངང་བརྟག་དཔྱད་བྱས་ན་ཤེས་རྟོགས་བྱ་ཐུབ། གཞན་ཡང་གྲུབ་འབྲས་དེས་རང་རྒྱལ་གྱི་སྡོམ་རིགས་འབུ་སྲིན་གྱི་རིགས་དབྱེ་རིག་པའི་ཞིབ་འཇུག་ཕུན་སུམ་ཚོགས་པར་བཏང་བར་མ་ཟད། གོ་ལ་ཧྲིལ་པོའི་རིགས་དེའི་དངོས་རིགས་ཀྱི་མིང་ཐོ་འཐུས་སྒོ་ཇེ་ཚང་དུ་གཏང་རྒྱུར་གཞི་འཛིན་ས་གལ་ཆེན་མཁོ་འདོན་བྱས་ཡོད། དེ་དང་ཆབས་ཅིག་ས་བབ་མཐོ་ལ་གསོ་རླུང་ཉུང་བའི་ས་ཁུལ་གྱི་འབུ་སྲིན་འཕེལ་འགྱུར་ལམ་སྲོལ་དང་འཚམ་པ་གསལ་སྟོན་བྱ་རྒྱུར་ཡང་རིགས་པའི་གཞུང་ལུགས་ཀྱི་དོན་སྙིང་གལ་ཆེན་ལྡན་ཞེས་བརྗོད་པ་རེད།
       ཤེས་རྟོགས་བྱུང་བར་གཞིགས་ན། རྣམ་པ་གསར་པའི་མ་དཔེ་དེ་བོད་རང་སྐྱོང་ལྗོངས་ས་མཐོའི་སྐྱེ་དངོས་ཞིབ་འཇུག་སོའོ་དང་། ཕོ་བྲང་པོ་ཏཱ་ལའི་དོ་དམ་ཁྲུའུ། དེ་བཞིན་ཀྲུང་གོ་ཚན་རིག་ཁང་སྲོག་ཆགས་ཞིབ་འཇུག་སོའོ་བཅས་སོ་སོར་ཉར་ཚགས་བྱས་ནས་རྗེས་མཐུད་ཞིབ་འཇུག་དང་བེད་སྤྱོད་བྱ་རྒྱུར་མ་དཔེ་མཁོ་འདོན་བྱས་ཆོག ཞིབ་འཇུག་རུ་ཁག་གིས་མ་འོངས་པར་སྔར་ལས་ལྷག་པའི་སྒོ་ནས་སྐྱེ་དངོས་རིགས་དེའི་སྐྱེ་དངོས་རིག་པའི་ཁྱད་ཆོས་དང་། རིགས་ཚོགས་ཀྱི་འགུལ་རྣམ། གནའ་བོའི་འཛུགས་སྐྲུན་གྱི་ཁོར་ཡུག་བཅས་ཕན་ཚུན་བར་ནུས་པ་ཐོན་པའི་མ་ལག་ལ་ཞིབ་འཇུག་བྱ་རྒྱུ་རེད།