བོད་ཀྱི་རིག་དངོས་སྲུང་སྐྱོང་གི་ལེའུ་གསར་པ།

       བོད་ལྗོངས་ནི་ཀྲུང་ཧྭ་མི་རིགས་ཀྱི་ཁྱད་ལྡན་རིག་གནས་སྲུང་སྐྱོང་ཁུལ་གལ་ཆེན་ཞིག་ཡིན་པས། རིག་དངོས་ཐོན་ཁུངས་ཕུན་སུམ་ཚོགས་ལ་ཐུན་མོང་མ་ཡིན་པའི་ཁྱད་ཆོས་ལྡན་ཡོད། གསར་འགོད་པར་བོད་རང་སྐྱོང་ལྗོངས་རིག་དངོས་ཅུད་ནས་ཤེས་རྟོགས་བྱུང་བར་གཞིགས་ན། མིག་སྔར་ལྗོངས་ཡོངས་སུ་བརྟག་དཔྱད་ཐོ་འགོད་བྱས་པའི་གནས་སྤོ་མི་ཐུབ་པའི་རིག་དངོས་ས་ཚིགས4468དང་། རིམ་ཁག་རིག་དངོས་སྲུང་སྐྱོང་ཚན་པ2373(དེའི་ནང་རྒྱལ་ཡོངས་ཀྱི་གཙོ་གནད་རིག་དངོས་སྲུང་སྐྱོང་ཚན་པ70དང་། རང་སྐྱོང་ལྗོངས་རིམ་པ603 གྲོང་ཁྱེར་དང་རྫོང་རིམ་པ1700)ཡོད་པ་དང་། འཛམ་གླིང་རིག་གནས་ཤུལ་བཞག་ཁོངས་སུ་ཚུད་པ་ས་ཆ1ལ་ས་ཚིགས3(ཕོ་བྲང་པོ་ཏ་ལ་དང་། ནོར་བུ་གླིང་ཁ། གཙུག་ལག་ཁང་)ཡོད་པ་རེད།
       གནས་སྤོ་ཐུབ་པའི་རིག་དངོས་ས་ཡ་གཅིག་ལྷག་ཡོད། བོད་རང་སྐྱོང་ལྗོངས་དབུ་བརྙེས་ནས་ལོ60སོང་རིང་། རིག་དངོས་སྲུང་སྐྱོང་གི་བྱ་གཞག་མེད་པ་ནས་ཡོད་པ་དང་། ཆུང་བ་ནས་ཆེ་བར་འཕེལ་ཞིང་། རིག་དངོས་ཀྱི་རྨང་གཞི་རྒྱུན་ཆད་མེད་པར་བརྟན་དུ་སོང་བ་དང་། རིག་དངོས་སྲུང་སྐྱོང་བྱེད་ཚུལ་རྒྱུན་ཆད་མེད་པར་ལེགས་སུ་སོང་བ། རིག་དངོས་དང་གནའ་རྫས་རྟོག་ཞིབ་ཀྱི་ཞིབ་འཇུག་རྒྱུན་ཆད་མེད་པར་གཏིང་ཟབ་ཏུ་སོང་བ། རིག་དངོས་སྲུང་སྐྱོང་དང་གྲུབ་འབྲས་བེད་སྤྱོད་རྒྱུན་ཆད་མེད་པར་རྒྱ་ཆེར་སོང་བ། རིག་དངོས་གསོན་ཤུགས་རྒྱས་པར་ཕན་འབྲས་མངོན་གསལ་དོད་པོ་ཐོན་པ་བཅས་བྱུང་ནས། བོད་ལྗོངས་ཀྱི་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་དང་། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་འཛུགས་པའི་ཁྲོད་དུ་ལེགས་སྐྱེས་ཧུར་ཐག་ཕུལ་ཡོད།
       གོམ་སྟབས་རྗེས་མར། བོད་རང་སྐྱོང་ལྗོངས་རིག་དངོས་ཅུད་ཀྱིས་གནའ་རྫས་རྟོག་ཞིབ་ཀྱི་ཞིབ་འཇུག་ལ་བརྟེན་ནས་ལོ་རྒྱུས་ཀྱི་བརྒྱུད་རིམ་བསྐྱར་སྒྲིག་བྱེད་པ་དང་། ཚན་རྩལ་གསར་གཏོད་ལ་བརྟེན་ནས་ཤེས་དཔལ་རྒྱུན་མཐུད་པ། སློབ་གསོར་བརྟེན་ནས་ངོས་འཛིན་གཅིག་མཐུན་གྱི་རྩ་བ་གསོ་སྐྱོང་བྱེད་པ། རིག་དངོས་ཀྱི་སྤྱི་ཡོངས་རང་བཞིན་དང་རྒྱུད་རིམ་རང་བཞིན་གྱི་སྲུང་སྐྱོང་ལ་ཕྱོགས་ཡོངས་ནས་ཤུགས་སྣོན་རྒྱག་པ། རིག་དངོས་སྲུང་སྐྱོང་དང་བེད་སྤྱོད་ཀྱི་ཆུ་ཚད་རྒྱུན་ཆད་མེད་པར་མཐོ་རུ་གཏོང་བ་བཅས་བྱས་ཏེ། “རིག་དངོས་གསོན་ཤུགས་རྒྱས་སུ་འཇུག་པར”སྐུལ་འདེད་ཏན་ཏིག་བཏང་ཐོག སྒྱུར་བཅོས་གསར་གཏོད་ཀྱི་སྙིང་སྟོབས་ལ་བརྟེན་ནས་བོད་ལྗོངས་ཀྱི་རིག་དངོས་བྱ་གཞག་སྤུས་ཚད་མཐོ་བའི་འཕེལ་རྒྱས་ཀྱི་ལེའུ་གསར་པ་རྩོམ་རྒྱུ་རེད།