མཚོ་བྱང་ཁུལ་མི་རིགས་སྐད་ཡིག་ལས་དོན་ལྟེ་གནས་ཀྱིས༢༠༢༦ལོའི“ཚོགས་ཆེན་གཉིས”ཀྱི་ཡིག་ཆ་ལོ་ཙཱ་བྱེད་པའི་བཀོད་སྒྲིག་ཚོགས་འདུ་འཚོགས།

       ཚོགས་ཐོག་ཏུ“ཚོགས་ཆེན་གཉིས”ཀྱི་ཡིག་ཆ་ལོ་ཙཱ་བྱེད་པ་ནི“ཚོགས་ཆེན་གཉིས”ཀྱི་གྲ་སྒྲིག་ལས་དོན་གྱི་ཆེས་གལ་ཆེ་བའི་ལྷུ་ཚིགས་ཤིག་ཡིན་ལ། རིགས་སོ་སོའི་འཐུས་མི་དང་ཨུ་ཡོན་གྱིས་རང་གི་འགན་ནུས་ལེགས་པར་སྒྲུབ་པའི་སྔོན་འགྲོའི་ཆ་རྐྱེན་གལ་ཆེན་ཞིག་ཀྱང་ཡིན། དེ་བས། ལོ་ཙཱའི་ཚན་ཆུང་གིས“དོན་དང་ཡང་མི་འགལ་ལ་བོད་སྐད་ལ་ཡང་གར་བདེ་བའི”རྩ་དོན་ལྟར། མང་ཚོགས་ཀྱིས་གོ་སླ་ལ་མང་ཚོགས་དང་ཁ་ཐག་ཉེ་བའི་སྐད་ཀྱིས“ཚོགས་ཆེན་གཉིས”ཀྱི་ཡིག་ཆ་ཡང་དག་པའི་སྒོ་ནས་ལོ་ཙཱ་བྱེད་དགོས་པའི་བླང་བྱ་བཏོན།

       ཐེངས་འདིའི“ཚོགས་ཆེན་གཉིས”ཀྱི་ཡིག་ཆ་ལོ་ཙཱ་བྱེད་པར་མཚོ་བྱང་ཁུལ་མི་རིགས་སྐད་ཡིག་ལས་དོན་ལྟེ་གནས་ཀྱི་ལས་སྒྲུབ་པ་ཡོངས་དང་། མདོ་ལ་རྫོང་མི་རིགས་སྐད་ཡིག་ལས་དོན་ལྟེ་གནས། རྐང་ཚ་རྫོང་མི་རིགས་སྐད་ཡིག་ལས་དོན་ལྟེ་གནས། མདའ་བཞི་རྫོང་མི་རིགས་སྐད་ཡིག་ལས་དོན་ལྟེ་གནས། རྐང་ཚ་རྫོང་མཉམ་འདྲེས་སྨྱན་བྱད་ལྟེ་གནས། མདའ་བཞི་རྫོང་མཉམ་འདྲེས་སྨྱན་བྱད་ལྟེ་གནས་བཅས་ཀྱི་རྐང་འཛིན་པ་ཞུགས་ཡོད།