སན་ཞིང་ཏུའེ་ནས་གནམ་ལྕགས་ཡོ་ཆས་ཐོག་མར་རྙེད་པ།

       དངོས་བཤེར་ཁང་གིས་དབྱེ་ཞིབ་བྱས་པ་བརྒྱུད། ཞིབ་འཇུག་ཚོགས་པས“ཡོ་ཆས་ལྐོག་གྱུར་མ”དེ་ནི་གནམ་ལྕགས་བཟོས་རྫས་ཡིན་པ་ངོས་འཛིན་བྱས་ཤིང་། དེ་ནི་ད་ལྟའི་བར་དུ་ཀྲུང་གོའི་ལྷོ་ནུབ་ས་ཁུལ་ནས་གསར་རྙེད་བྱུང་བའི་གནམ་ལྕགས་ཀྱི་རིག་རྫས་སྔ་ཤོས་ཡིན་ལ། མིག་སྔར་ཀྲུང་གོའི་ལི་ཆས་དུས་རབས་སུ་ཤེས་རྟོགས་བྱུང་བའི་རིགས་མཚུངས་རིག་རྫས་ཁྲོད་ཀྱི་བོངས་ཚད་ཆེ་ཤོས་ཤིག་ཀྱང་ཡིན།
       ལི་ཧའེ་ཁྲའོ་ཡིས“ལྕགས་ཆས་ཉེར་སྤྱོད་བྱས་པ་ལས་མིའི་རིགས་ཀྱི་ཐོན་སྐྱེད་ནུས་ཤུགས་ལ་འཕོ་འགྱུར་ཆེན་པོ་བྱུང་བ་མཚོན་པ་དང་། འདི་ནི་སན་ཞིང་ཏུའེ་ནས་གནམ་ལྕགས་ཡོ་ཆས་ཐོག་མར་གསར་རྙེད་བྱུང་བ་ཞིག་རེད། མིས་བཟོས་ལྕགས་སྦྱངས་ཐོན་རྫས་ཤིག་མིན་རུང་། རང་རྒྱལ་གྱི་ལྷོ་ནུབ་ས་ཁུལ་གྱི་མེས་པོ་ཚོས་ལྕགས་ཀྱི་རིགས་ལ་ངོས་འཛིན་དང་བེད་སྤྱོད་བྱས་པ་མངོན་ཡོད”ཅེས་བཤད།
       མིག་སྔའི་བར་དུ་ཀྲུང་གོས་གསར་རྙེད་བྱུང་བའི་གནམ་ལྕགས་རིག་རྫས་མང་ཆེ་བ་བྱང་ཕྱོགས་ཀྱི་པེ་ཅིན་དང་ཧོ་ནན། ཧོ་པེ་སོགས་སུ་གཅིག་འདུས་ཀྱི་རྣམ་པར་གནས་ཡོད་པ་དང་། ལྷོ་ཕྱོགས་ས་ཁུལ་དུ་ཧུའུ་པེ་ཡི་ཡེ་ཅ་རི་བོའི་དུར་ས་གཅིག་པུ་ལས་རྙེད་མེད། དབུས་ཐང་ས་ཁུལ་གྱི་རྒྱུན་མཐོང་གི་ལི་ཆས་དང་གནམ་ལྕགས་འདྲེས་སྦྱོར་ཡོ་ཆས་དང་མི་འདྲ་སྟེ། སན་ཞིང་ཏུའེ་ལས་གསར་དུ་རྙེད་པའི་གནམ་ལྕགས་ཡོ་ཆས་ནི་གནམ་ལྕགས་རྐྱང་མའི་བཟོས་རྫས་ཡིན་པས། ཐུན་མོང་མ་ཡིན་པའི་སྲོལ་རྒྱུན་གྱི་ལྕགས་རིགས་བཙོ་སྦྱང་ལག་རྩལ་མངོན་ཡོད། ཡོ་ཆས་ཉར་ཚགས་བྱས་པ་ཅུང་ཞན་པས་བྱེད་ནུས་བརྡར་ཤ་གཅོད་དཀའ་མོད། འོན་ཀྱང་གནམ་ལྕགས་ཡོ་ཆས་ཀྱི་མཁྲེགས་ཚད་ཅུང་མཐོ་བ་དེ་སན་ཞིང་ཏུའེ་ལི་ཆས་སྟེང་དུ་ལུགས་བརྒྱབ་རྗེས་གཅོད་འབྲེག་དང་ལས་སྣོན་བྱེད་པའི་སྣང་ཚུལ་དང་འབྲེལ་བ་ཡོད་མེད་ལ་ད་དུང་གོམ་གང་མདུན་སྤོས་ཀྱིས་ཞིབ་འཇུག་བྱ་འོས།
       ཐེངས་འདིར་གསར་རྙེད་བྱུང་བ་དང་ཞིབ་འཇུག་བྱས་པ་དེས་ས་ཁོངས་ལྕགས་རིགས་བཙོ་སྦྱང་ལོ་རྒྱུས་ཀྱི་ཞན་ཆ་གལ་ཆེན་བསྐངས་པ་དང་། སྔ་དུས་ཀྱི་གནམ་ལྕགས་ཡོ་ཆས་ཉེར་སྤྱོད་ཀྱི་ཁོངས་བརྒལ་བར་ཁྱད་ལ་ཤེས་རྟོགས་བྱེད་པར་དངོས་པོའི་གཞི་འཛིན་ས་གསར་བ་འདོན་སྤྲོད་བྱས་ཡོད། མིག་སྔར་རིག་རྫས་ཉིད་གནམ་རྡོའི་ཚོགས་ཀྱི་རིགས་གང་ལ་གཏོགས་པ་ད་དུང་གཏན་ཁེལ་བྱས་མེད་པ་དང་། རྗེས་སོར་ཞིབ་འཇུག་གིས་གནམ་ལྕགས་ཀྱི་འབྱུང་ཁུངས་གསལ་བར་གཏོང་བ་དང་བསྡོངས་ནས་དེའི་བྱེད་ནུས་དང་ངོ་བོ་སྔར་བས་འཚོལ་ཞིབ་བྱ་རྒྱུ་རེད།