ཡུལ་ཤུལ་ཁུལ་མི་རིགས་མཐོ་རིམ་སློབ་འབྲིང་གཉིས་པའི་ཕུལ་བྱུང་དགེ་རྒན་གྱི་མུ་འབྲེལ་འཆད་ཁྲིད།

ཡུལ་ཤུལ་ཁུལ་མཐོ་གཉིས་ཀྱི་སློབ་གཙོ་རྒན་དབང་འདུས་ལགས་ཀྱིས་མདོ་འཛིན་གནང་བཞིན་པ།

དགེ་རྒན་ལང་ཐོའོ་ཡིས་འཆད་ཁྲིད་མཛད་བཞིན་པ།

དགེ་རྒན་སྟག་ལྷས་འཆད་ཁྲིད་མཛད་བཞིན་པ།

དགེ་རྒན་ཚེ་འབར་ལགས་ཀྱིས་འཆད་ཁྲིད་མཛད་བཞིན་པ།

     སྤྱི་ཟླ9ཚེས15ནས16བར་ཉིན་གཉིས་ཀྱི་རིང་དུ། ཡུལ་ཤུལ་བོད་རིགས་རང་སྐྱོང་ཁུལ་མི་རིགས་མཐོ་རིམ་སློབ་འབྲིང་གཉིས་པས་མཚོ་སྔོན་ཞིང་ཆེན་སློབ་གསོ་ཐིན་མི་རིགས་སློབ་གཞི་རྩོམ་སྒྲིག་ཁང་གི་དགེ་རྒན་ཚེ་འབར་དང་སྟག་ལྷ། ལང་ཐོའོ་བཅས་གདན་ཞུས་ཀྱིས་ཁུལ་མཐོ་གཉིས་ཀྱི་ཐེམ་སྐས་སློབ་ཁང་དང་རིག་གཞུང་སྙན་ཞུ་ཁང་དག་ཏུ་མཐོ་འབྲིང་གི་སྐད་ཡིག་སློབ་གསོའི་ཐད་ནས་འཆད་ཁྲིད་གཟབ་རྒྱས་ཤིག་སྤེལ།
     འཆད་ཁྲིད་དེར་ཚོགས་ཞུགས་སུ་ཡུལ་ཤུལ་ས་ཁུལ་གྱི་སློབ་གྲྭ་ཆུང་འབྲིང་མཐོ་གསུམ་གྱི་དགེ་རྒན་རྣམ་པ་མཉམ་ཞུགས་གནང་ལ། སློབ་གཙོ་རྒན་དབང་འདུས་དང་སློབ་དཔྱོད་ཁང་གི་འགན་འཛིན་རྒན་ཚེ་ལོ་བརྒྱ་རྣམ་གཉིས་ཀྱིས་འཆད་ཁྲིད་དག་གི་མདོ་འཛིན་མཛད།
འཆད་ཁྲིད་དེ་དག་གི་བརྗོད་བྱ་གཙོ་བོ་ནི།
     བསླབ་ཚན་གྱི་ངོ་བོ། བསླབ་ཚན་གྱི་གཞི་རྩའི་ལྟ་བ། བསླབ་ཚན་འཆར་འགོད་ཀྱི་རིག་ལམ། ངེས་སྦྱོང་བསླབ་ཚན་གྱི་དམིགས་ཚད་དང་འདེམ་སྦྱོང་བསླབ་ཚན་གྱི་དམིགས་ཚད། ལག་བསྟར་གྱི་གྲོས་གཞི་སྟེ་སློབ་ཁྲིད་ཀྱི་གྲོས་གཞི་དང་དཔྱད་འཇོག་གི་གྲོས་གཞི། སློབ་དེབ་རྩོམ་སྒྲིག་གི་གྲོས་གཞི། བསླབ་ཚན་གྱི་ཐོན་ཁུངས་འདོན་སྤེལ་དང་བེད་སྤྱོད། མཐོ་རྒྱུགས་ཀྱི་རྒྱུགས་ཤོག་སྒྲིག་སྟངས་དང་མཐོ་རྒྱུགས་ལ་ཁ་ཕྱོགས་པའི་སློབ་སྦྱོང་བྱེད་ཐབས་སྐོར་ནས། རྒྱས་བསྡུས་རན་ཞིང་ཁ་གསལ་ལ་གོ་བདེ་བ། གནད་ལ་སྨིན་པ་བཅས་ཀྱི་ཁྱད་ཆོས་ལྡན་པའི་འཆད་ཁྲིད་ཚོགས་བཞུགས་དགེ་རྒན་རྣམ་པའི་འདོད་བློ་ཚིམ་པ་ཞིག་གནང་གྲུབ་པ་དང་།
     ཚོགས་བཞུགས་དགེ་རྒན་རྣམ་པས་སྤྲོ་སེམས་འཕེལ་བའི་ངང་ནས་བཀའ་དྲིན་ཞུ་ཕྱིར། གུས་ལུགས་དང་བཅས་ཏེ་འདུག་སྟེགས་ལས་བཞེངས་ནས། དགའ་བསུའི་ལག་ཟུང་ཐལ་སྒྲའི་ཁྲོད་ནས་འཆད་ཁྲིད་དེ་ཉིད་རེ་ཞིག་མཇུག་ལེགས་པར་བསྡུས་པ་རེད།