ལྷ་ཁང་བློ་བཟང་རྡོ་རྗེ་མཆོག་གིས་ཆབ་ཆ་ནས་གཙང་བྲིས་ཀྱི་ཡིག་གཟུགས་སློབ་ཁྲིད་གནང་བ།

ལྷ་ཁང་བློ་བཟང་རྡོ་རྗེ་མཆོག

     མཁས་བཙུན་བཟང་གསུམ་གྱི་དགེ་བའི་བཤེས་གཉེན་ཆེན་པོ༧ལྷ་ཁང་བློ་བཟང་རྡོ་རྗེ་མཆོག་ནི་སྤྱི་ལོ1938ལོར་བོད་ལྗོངས་གཙང་ཁུལ་གྱི་གྲོ་མོ་རྫོང་དུས་སྣེ་ཤང་དུ་སྐུ་འཁྲུངས། དགུང་ལོ་བཅུའི་སྟེང་བཀྲས་དགོན་དུ་ཆོས་ཞུགས་གནང་ཞིང་དགེ་བའི་བཤེས་གཉེན་དཀའ་ཆེན་མགོན་པོ་ལགས་དང་། རྒན་བློ་བཟང་ལགས། དཀའ་ཆེན་པདྨ་ལགས། གྲུབ་པའི་དབང་ཕྱུག་དཀའ་ཆེན་པོ་ཤེས་རབ་ཚེ་རིང་ལགས། མཁན་པོ་རིན་པོ་ཆེ་ཤེས་རབ་ཆོས་དར་སོགས་མཁས་བཙུན་བཟང་གསུམ་གྱི་སློབ་དཔོན་དགེ་བའི་བཤེས་གཉེན་མང་པོ་བསྟེན་ཏེ་ཡིག་གཟུགས་སུམ་རྟགས་ནས་གཞུང་ཆེན་མདོ་སྔགས་དང་བཅས་པ་དཔྱིས་ཕྱིན་པར་སྦྱང་བརྩོན་གནང་ཞིང་མཁས་པའི་ཕུལ་དུ་གྱུར། 1982ལོར༧པཎ་ཆེན་སྣང་བ་མཐའ་ཡས་སྐུ་ཕྲེང་བཅུ་པ་ཆེན་པོའི་བཀའ་གསུང་བཞིན་དེ་སྔོན1958ལོར་བཙུགས་གནང་བའི་བཀྲས་ལྷུན་དགོན་རྩེ་སློབ་གྲྭའི་ཡིག་གཟུགས་ཁྲིད་རྒྱུན་མུ་མཐུད་འཛིན་སྐྱོང་སྤེལ་གསུམ་བྱེད་དགོས་པའི་ཐུགས་དགོངས་སྤྱི་བོར་བཞེས་ནས་ད་ལྟའི་བར་དུ་ཡིག་གཟུགས་ཁྲིད་རྒྱུན་གྱི་བཀའ་དྲིན་བསྐྱངས། ལོ་ངོ་མང་པོར་སུན་སྣང་དང་དཔེ་ཁྱུད་ཅི་ཡང་མེད་པར་བཀྲས་དོན་དང་ཕྱོགས་ཡོངས་ནས་ཕེབས་པའི་སློབ་མ་ཧ་ཅང་མང་པོར་སློབ་ཁྲིད་དང་ཡིག་གཟུགས་ཁྲིད་སྟོན་གནང་བཞིན་ཡོད། གསུང་རྩོམ་ཀྱང་སུམ་རྟགས་དང་སྙན་ངག་སོགས་ཀྱི་རྩ་འགྲེལ་སོགས་མང་པོ་གནང་ཡོད་ལ། ཡིག་གཟུགས་ལ་སྤྱི་ལོ1991ལོར་གཞིས་རྩེ་ས་ཁུལ་བོད་ཡིག་འགྲེམས་སྟོན་ནང་ས་ཁུལ་རིམ་པའི་ཚད་འཛིན་ཡིག་གཟུགས་ཀྱི་བྱ་དགའ་ཐོབ།
     སྤྱི་ཟླ7པའི་ཚེས21ཉིན་གྱི་སྔ་དྲོར། ཡིག་གཟུགས་གསོ་སྦྱོང་འཛིན་གྲྭ་སྤེལ་བའི་མཛད་སྒོ་མཇུག་རྫོགས་པ་དང་འབྲེལ། གཙང་བཀྲ་ཤིས་ལྷུན་པོ་དགོན་པའི་བྲིས་པ་གྲགས་ཅན་ལྷ་ཁང་བློ་བཟང་རྡོ་རྗེ་མཆོག་གིས་མཚོ་ལྷོ་ཁུལ་གསེར་ཆེན་རྫོང་ཆབ་ཆ་གྲོང་རྡལ་ནས་ཉིན་བཞིའི་རིང་ལ་ཐོག་མ་སྨྱུ་གུ་བཟོ་སྟངས་དང་འཛིན་སྟངས་ནས་སྦྱང་ཤིང་འདུལ་ཐབས། ཐིག་འཐེན་ཚུལ། འདུག་སྟངས། དེ་ནས་གཙང་བྲིས་དབུ་མེད་ལས་ཚུགས་རིང་དང་ཚུགས་ཐུང་། ཚུགས་མ་འཁྱུག འཁྱུག་བྲིས་བཅས་ཀྱི་སྨྱུག་ཁ་འཐེན་སྟངས་དང་སྨྱུག་རིམ། དཀར་ནག་གི་ཆ། གཞན་དོ་སྣང་བྱེད་དགོས་ས་སོགས་འབྲི་ཚུལ་རེ་རེ་ནས་མཛུབ་མོས་རི་སྟོན་གྱི་དཔེ་བཞིན་ཞིབ་ཆ་དོད་ནས་ཁྲིད་ཅིང་། ཞོར་ལ་ཐེངས་འདིའི་གསོ་སྦྱོང་གི་སློབ་མ་མང་ཆེ་བ་མི་རིགས་སློབ་གསོའི་ལས་དོན་ལ་གཞོལ་བའི་བོད་ཡིག་རྐང་འཛིན་དགེ་རྒན་ཡིན་པས། དགོས་མཁོ་ལྟར《ལེགས་བཤད་ལྗོན་པའི་དབང་བོ》དང《དཀའ་གནད་སེལ་བའི་མེ་ལོང》གཉིས་ཀྱི་ཁྲིད་ལུང་ཡང་བུམ་པ་གང་བྱོའི་ཚུལ་དུ་གནང་སྟེ་སློབ་བུ་ཡོངས་ཀྱི་བློ་ཁ་ཚིམས་པར་བྱས།

སློབ་མ་ཚོས་སྟ་གོན་བྱེད་བཞིན་པ།

རྒན་ལགས་ཀྱིས་ཐིག་གདབ་ཚུལ་གསུང་བཞིན་པ།

རྒན་ལགས་ཀྱིས་ཐིག་གདབ་ཚུལ་གསུང་བཞིན་པ།

སྨྱུག་ཁ་བཟོ་སྟངས་གསུང་བཞིན་པ།

སློབ་ཁྲིད་དངོས་གཞི།

སློབ་ཁྲིད་དངོས་གཞི།

སློབ་མ་ཚོས་ནན་ཏན་གྱིས་སྦྱོང་བཞིན་པ།

སློབ་མ་ཚོས་ནན་ཏན་གྱིས་སྦྱོང་བཞིན་པ།

རྒན་ལགས་ཀྱིས་ཞུ་དག་གནང་བཞིན་པ།

རྒན་ལགས་ཀྱིས་ཁྲིད་ལུང་གནང་བཞིན་པ།

རྒན་ལགས་ལ་བཀའ་དྲིན་གཏང་རག་འབུལ་བཞིན་པ།