ཁྲི་ཀ་རྫོང་མི་རིགས་བཅའ་སྡོད་སློབ་གྲྭས་ཆུང་འབྲིང་རིམ་པའི་བོད་རྩོམ་འགྲན་སྡུར་སྤེལ།

ཁྲི་ཀ་རྫོང་མི་རིགས་བཅའ་སྡོད་སློབ་གྲྭས་ཆུང་འབྲིང་རིམ་པའི་བོད་རྩོམ་འགྲན་སྡུར་སྤེལ་བ།

     སྲིད་པ་ཆགས་པའི་ཚུན་ཆད་དུ་བོད་ཅེས་པའི་མི་རིགས་ཤིག་འཚོ་སྡོད་བྱས་པ་དང་བསྟུན་ནས་དཀའ་བ་འཛེམ་མེད་ཀྱི་མཁས་མཆོག་གམ་སློབ་དཔོན་ཐོན་མི་རྒྱ་གར་ཡུལ་ཁམས་ཀུན་ཏུ་མྱུལ་ནས་བོད་ཡིག་གསར་བཟོ་བྱས་པ་དང་། རིམ་བཞིན་གནམ་གྱིས་ས་བཀབ་པ་ལྟ་བུའི་བོད་གངས་ཅན་གྱི་མཁས་དབང་མང་པོའི་ཆུ་མིག་བརྡོལ་བ་དང་ལྷན་དུ་འཆད་རྩོད་རྩོམ་གསུམ་ལ་དཔྱིས་ཕྱིན་པའི་མཁས་པ་འདི་དག་གིས་དཔེ་ཆ་རི་རབ་ཀྱི་གཏོས་དང་མཉམ་པ་ང་ཚོ་རྗེས་རབས་དག་ལ་ལྟ་བའི་མིག་དང་ཉན་པའི་བདུད་རྩི་ཡིད་ཚིམས་པ་ཞིག་གནང་ཡོད་ལ། ང་ཚོས་མ་ཉམས་གོང་སྤེལ་དང་ཉམས་པ་སླར་གསོའི་ལས་བགྱི་བ་ལ་ད་ནས་མགོ་བཟུང་སྟེ་རྩོམ་ཡིག་ཕུལ་དུ་བྱུང་བ་འབྲི་བར་བརྩོན་པས་སྦྱང་དགོས་པ་དང་། སྦྱངས་ནས་ཕུལ་བྱུང་རྩོམ་པ་པོ་རུ་འགྱུར་རྒྱུ་དེ་ནི་དེ་བས་ཀྱང་གལ་ཆེ་བས།  ཁྲི་ཀ་རྫོང་མི་རིགས་བཅའ་སྡོད་སློབ་གྲྭའི་ཤེས་རིག་ཡར་སྐུལ་ཚོགས་པས་ཀྱང་འདི་ལྟ་བུའི་དམིགས་འབེན་གཙིགས་སུ་བཟུང་ནས་སློབ་མའི་རྩོམ་འབྲིའི་ནུས་པ་སྔོག་འདོན་བྱེད་ཆེད། ཉེ་སྔོན་བོད་དམངས་ཁྲོད་སྲོལ་རྒྱུན་རིག་གནས་སྐོར་གྱི་རྩོམ་ཡིག་འགྲན་བསྡུར་ཅིག་བདེ་བླག་ངང་སྤེལ།

བོད་རྩོམ་འགྲན་བསྡུར་བྱེད་པ།

     ཐེངས་འདིའི་རྩོམ་ཡིག་འགྲན་སྡུར་ཁྲོད་ལོ་རིམ་དྲུག་པའི་སློབ་གྲོགས་ཀླུ་མོ་ཐར་དང་། བདུན་པའི་སློབ་གྲོགས་མཁར་བྱམས་རྒྱལ་དང་ལོ་རིམ་བརྒྱད་པའི་སློབ་གྲོགས་དོན་གྲུབ་སྐྱིད།  ལོ་རིམ་དགུ་བའི་སློབ་གྲོགས་རྡོ་རྗེ་སྒྲོལ་མ་བཅས་ལ་རིམ་བཞིན་ཨང་དང་པོ་དང་གཞན་པའི་སློབ་གྲོགས་དགུ་ལ་ཨང་གཉིས་་པ་དང་གསུམ་པའི་བྱ་དགའ་ཐོབ། བརྗོད་བྱ་གཅིག་པའི་རྩོམ་ཡིག་འགྲན་སྡུར་འདིའི་རིགས་སྤེལ་བ་ཡིས་སློབ་མ་ཀུན་ལ་རྩོམ་ཡིག་འབྲི་བའི་གོ་སྐོན་བློ་འགུག་གི་སློབ་གསོ་མི་དམན་པ་ཐོབ།

བོད་རྩོམ་འགྲན་བསྡུར་བྱེད་པའི་ཡུལ་དངོས།

     དེ་མིན།  བོད་ཡིག་ཁྲིད་དཔྱོད་ཁང་གི་དགེ་རྒན་རྣམས་ལ་སློབ་དཔྱོད་ཁང་གི་ཀྲུའུ་རིན་ཚེ་རིང་རྡོ་རྗེ་ལགས་ཀྱིས་ཚོགས་འདུ་བསྡུས་ཏེ་མ་འོངས་དམིགས་འབེན་དང་ལས་གཞོལ་ཕྱོགས་ལ་མཛུབ་སྟོན་དང་བསམ་འཆར་བསྡུ་ལེན་བྱས་ཏེ་སློབ་གྲྭའི་སློབ་དེབ་གསུམ་སྒྲིག་པའི་འཆར་བཀོད་བཟོས་པ་སོགས་སློབ་གསོའི་ཕྱོགས་ལ་སྐུལ་འདེད་ཀྱི་ནུས་པ་ཐོན་པའི་གཏམ་བཤད་གལ་ཆེན་གནང་པའོ། །